यहूदा 1 - ह्योल्मो1 ङाह येशू मास्यीकाकी लाबु, याकूबकी नो़ह यहूदा लाहमले– पाहङज्येन क्याहप्क्योया़, पे यिहॱना़ किन्ज्यो याहपकी चेवा जे नाङग्योया़ दाङ येशू मास्यीकाकी जेम्बु जेती ज़्या़ नाङग्योया़ला दि यिहगी प्रुहएँॱराङ येहबा। 2 ख्याया़ला माहङबु म़ेदी माहङबु थुज्यी, स्य़िहदे दाङ चेवा ओहङज्यु। माहताहक्पाकी लोबेनया़ 3 ए च्याहम्बु रो़हया़, ओहराङ थाम्ज्यीगी ज्योरक्योकी थार्पाकी तेहन्दाला ख्या फ़ेबे-म़ेहमेया़ला दि यिहगी प्रुहज्येला ङाहला ज्यिबुराङ या़हबु ने़क्यो येहकें यिहॱनाङ ताहन्दा ओ़हगी छापला किन्ज्योकी स़ेबु-स़ेमुया़ला नाहम्स्यी किन्दुकी तेहन्दाला चि क्याहप नाङग्योकी तेहपाला सी़दे ज़्या़दोङ म़ेदी मा कोहच्ये ल़ेहमु च्यी़ गा ङाहगी सेमला ऩेसीन। 4 च्यिबेमाना माहङबुराङ तोहङले ङ्य़ेहबा फो़ज्ये सी़ह सिहन्ग्योकी लाहला मिहया़ खाजुम्बाला ख्या फे़बे मे़हमेया़की पाहरक्यीला स्युहसीहन्दी येह। खुङ किन्ज्योला मेहक्याप्केन्गी मिहया़ यिहम्बा, खुङगी ओहराङकी किन्ज्योकी काटीनला ल़ेह ङ्येहम्बा पेहकेन्गी छेन्ज्याया़ जे़दी येह ओहले ओहराङगी च्यिमी च्यी़राङ ताहक्पु दाङ चो़वो, येशू मास्यीकाला मा-लोक पेहकें। 5 ख्याया़गी दि थाम्ज्यी लेहमा च्यी़ ङोह स्य़ेदीॱराङ येहकें यिहॱनाङ ताहन्दा ङाह ख्याया़ला टेहम्बा साल च्य़ूएँ चो़वोगी राहङगी मिहया़ला मिश्र क्याहल-खापले तेन्दी नोम फेप्सीन। यिहॱनाङ यिह मे़हछ्य़ेगेया़ला मिहरोगी तोङ च्य़ू नाङसीन। 6 किन्ज्योगी नाङग्यो ओङ चो़ला माहतेहपा पेहती राहङगी ग्या़ क्युर ज़्या़दी डोएँगी स्यिहङगामकी स्याहप्च्यीया़ला मिहरोगी साप्स्यी तिहङकी ना़-जुबेला ठिम ताङ नाङगेन ओ़ह छ्यिम्बु ङ्यिहमा थु नाहम-आङ स्योर मी़हखुएँ पेहती ताहम्दी ज़्या़ नाङदी येह। 7 काह-ठि पेहती सदोम, गमोरा दाङ ओ़ह साहर-सुहरकी क्याहसाया़ छ्येउ-छ्येंमु पेहती पे-मिहस्यीएँ ल़ेह चोक्पाया़ला छ्यिक्यो येहकें, खुङया़गी नाहम-आङ मिहस्यीएँगी मेहकी ङ्य़ेहबा खुर्ती येह। दि ल़ेहमु पेहती खुङ ओहराङगी तेहन्दाला पे च्यी़ काहल्दी येह। 8 दि ल़ेहमु पेहती ओ़ह मिलाम थोङगे दि मिहया़गी राहङगी ज़ुबुला मेहचाङा ज़ोएँ, ओङला मा-लोक पेहकें ओहले स्यिहङगामला येहकेनया़ला स्याहम्डेन तेन्गे। 9 यिहॱनाङ स्यिहङगामकी ल़ेह-पेन मिखाएलगीॱआङ मोशागी कुबुरकी तेहन्दाला दियाबलस ङ्याम्बु स्येपा तुहर्केमु खोला स्याहम्डेन तेन्दी क्येन माहता। “ख्येला चो़वोगी कप्क्येन नाङज्ये येह” म़ेदी मिखाएलगी मासीन। 10 यिहॱनाङ दिया़गी का़हन्दीला स्याहम्डेन तेन तेहती येहबा ओ़ह खुङया़ला क्यी़हराङ म़ेह, ओहले खुङगी राहङगी सेमला ने़जेबाकी ल़ेहया़ पेहक्यो सोङबे खुङ रिहक्स्यी म़ेहबाकी सेम्ज्येनया़ ल़ेहमुराङ पेहती तोङज्ये येह। 11 खुङया़ला क्येवा क्येमु! च्यिबेमाना खुङ कयिनकी लाहमला स्युहसीन, खेप्साङ लेहन्ज्येकी तेहन्दाला बालामगी पेहक्योगी ल़ेह चोक्पाकी लाहम ज़ुङदी येह, ओहले कोरहगी ल़ेहमुराङ खुङया़गी टा़ह पेहसीन ओहले खुङया़ ओ़ह ल़ेहमुराङ पेहती तोङदी डोएँ। 12 ख्या फे़बे मे़हमेया़की चेवाकी डेनला दि मिहया़ ङ्योहक्तोङया़ यिहम्बा। खुङ लेहमेन मिहया़ला ताॱराङ मा़हतेबा पेहती राहङगी फोवा च्यी़राङ क्योङज्ये छोल्गे। खुङनी ल्हा़बागी क्या़दी ख्येर्केन नाम मेहक्याहप्केन्गी मुक्पा ल़ेहमु यिहम्बा। खुङ सेर्का दावाकी सेदो मे़हयाहगेन्गी तोहङबो ल़ेहमु यिहम्बा, ओ़ह चार्ङ्यी यिहन्ज्युराङ पो़ सिहन्ग्यो ओहङगे ओहले लेहमा ङ्यी़ स्यि सिहन्ग्यो ओहङगे। 13 खुङ छो-क्याहम्जोकी ज्यी़ज्ये ल़ेहमु छ्यु-पाहलापया़ ल़ेहमुराङ यिहम्बा ओहले राहङगी नाम्दो लाहङज्ये ल़ेहमु से़हया़ छो-क्याहम्जोगी पोहवाल ल़ेहमुराङ पेहती तेन्गे। खुङ राहङगी लाहमला मा़हस्युहबा पेहती काहने थेतेराङ कोरा क्याहप्ती डोएँगी नामगी कार्माया़ ल़ेहमु यिहम्बा। खुङगी तेहन्दाला नाहम्स्यी किन्दु ज़ी़ज्ये ल़ेहमु ना़-जुबे ग्या़ सी़दे ज़्या़क्यो येहबा। 14 आदमकी मिहदो तिहन हनोकगीॱआङ दि मिहया़गी तेहन्दाला तिङले ओहङगेन्गी तामया़ तोहङलेराङ दि ल़ेहमु जेती सुङ नाङग्यो येहकें, “त़ेदोङ चो़वो, टाहङमाराङ क्याहप मी़हखुएँगी राहङगी नाम्पार-ताहक्पा मिहया़ ङ्याम्बु फेप नाङगेराङ येह, 15 मिहरोगी मिह थाम्ज्यीला ठिम ताङ नाङज्ये येह ओहले खुङया़गी प़ेह ज़्या़क्योगी ना थाम्ज्यी चोक्पा ल़ेहया़ ओहले चो़वोला टाह पेहती माक्यो तामया़गी तेहन्दाला ङ्य़ेहबा काल नाङज्ये येह।” 16 मुहर-मुहर म़ेदी तेहकेनया़, नाहमॱआङ सेन्दोग मेहयोहङगेया़, राहङगी सेमला ने़जेबा पेहती डोएँया़, छ्य़ेन्दो तेन्दी ताम माएँया़ ओहले राहङला खेप्साङ ओहङज्येगी तेहन्दाला लेहमेन मिहया़ ङ्याम्बु ज्याप्ला तेन्गेया़ दि मिहया़राङ यिहम्बा। यिह-छ्य़ेबु पेहती तेहतोङ 17 ए च्याहम्बु रो़हया़या़, ओहराङगी चो़वो येशू मास्यीकाकी ल़ेह-पेनया़गी तोहङलेराङ सुङ नाङग्योकी स्याहलया़ ख्या फ़ेबे-म़ेहमेया़गी टेहम्बा साल्दोङ। 18 “तिङमा ती़हजीया़ला स्या़ क्याहप्केया़ ओहङज्ये येह। खुङगी किन्ज्योला ची़ज्ये म़ेह ओहले राहङगी सेमला ने़जेबा पेहती डोज्ये येह” म़ेदी खुङया़गी माक्यो येहकें। 19 थिन मी़हच्युगेया़, जाम्बुलीङगी मिहया़ ओहले नाम्पार-ताहक्पा सेम म़ेहबाकी मिहया़ दिया़राङ यिहम्बा। 20 यिहॱनाङ ए ङाहगी च्याहम्बु रो़हया़या़, ख्या फ़ेबे-म़ेहमेॱयाती नाम्पार-ताहक्पा यिह-छ्य़ेला जेन-जेन याहरक्यी पेहती सोङ ओहले नाम्पार-ताहक्पा थुगी ओङ लाहमले सोल्वाङ ताप्तोङ। 21 राहङला किन्ज्योगी चेवाला ज़्या़दोङ ओहले नाहमॱआङ मिहस्यीएँगी मिहली ज़ाङबु नाङगेन चो़वो येशू मास्यीकाकी थुज्यीला कू़हदे तेहतोङ। 22 थेचुम पेहकेया़ला निङज्यी पेहतोङ। 23 ङ्याल्वागी मेहला छ्यिच्ये पेहक्योया़ला टिहती थार च्य़ूदोङ, लाहला मिहया़ला निङज्यी पेहकेमु जेम्बु पेहतोङ, तिहक्पा पेहकेन्गी पेहताङया़ लाहमले मेहचाङा काहल्ग्योगी काप्च्याया़ॱलाङ नाम्दो पेहतोङ। 24 ता़ह, का़हन्दीगी मिहया़ला रिहल्गे यिहन्ज्यु थार च्य़ू थुप्कें, ओहले का़हन्दीगी ख्याया़ला काहसो डो च्य़ू नाङदी किन्ज्योकी ज़िज्यिदगी दिनला च्यिॱआङ ङ्य़ेहबा-छ्यू़बा म़ेहबा जेती लाहङ च्य़ू थुप्कें, 25 ओ़ह च्यिमे च्यी़राङ किन्ज्यो, ओहराङला थार्पा नाङगेन येशू मास्यीका ओहराङ चो़वो लाहमले ज़िज्यिद, ची़नाङ, स्युक, ओङ काल्बा-काल्बा तोहङ यिहन्ज्यु ताहन्दा दाङ छे दाङ छे ओहङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.