हिब्रू 5 - ह्योल्मो1 गो-छ्येवा पूजाहारी मिह नाहङलेगीॱराङ दाम्ग्यो ओहङगे, ओहले मिहया़गी छ्यो़ले तिहक्पाकी तेहन्दाला किन्ज्योला डेल्बा दाङ मार्च्ये फुल्ज्येला खुङला दाम्गे। 2 ओहले खोगी च्यिॱआङ क्यी़ह म़ेहबा दाङ लाहम जोल्ग्योया़ला स्यिहवा पेहती लोप्ताम क्याहप ख़ूएँ च्यिबेमाना खो राहङॱआङ मा-फाम्बु ओहङगे। 3 ओ़ह सोङबे मिहया़गी तिहक्पाकी तेहन्दाला च्यी़राङ मिहम्बा, यिहॱनाङ राहङगी तिहक्पाकी तेहन्दालाॱआङ मार्च्ये फुल्ज्येला खोला ठाल फो़गे। 4 सुज्यीगीॱआङ राहङगी राहङला गो-छ्येवा पूजाहारी ज़ो मी़हखुएँ, यिहॱनाङ हारूनला ल़ेहमु खोलाॱआङ किन्ज्योगी क़े क्याहप नाङगे। 5 मास्यीकागीॱआङ गो-छ्येवा पूजाहारी डोज्येला राहङगी राहङला छ्यिम्बु ज़ो माहनाङ, यिहॱनाङ मिहरोला दाम नाङगे किन्ज्योगी मिहरोगी तेहन्दाला दि ल़ेहमु सुङ नाङसीन, “ख्ये ङाहगी स़ेबु यिहम्बा, तिहरीङ ङाह ख्येगी याहप काहल्दी येह।” 6 ओहले लेहमेन ग्या़ला किन्ज्योगी दि ल़ेहमु सुङ नाङदी येह, “ख्ये मल्कीसेदेक ल़ेहमुराङ नाहम्स्यी किन्दु पूजाहारी यिहन।” 7 येशू राहङगी मिहगी मिहली नोम नाङगेमु राहङला स्यिएँगी ओङलेगी थार च्य़ू थुप्केन किन्ज्यो ङ्याम्बु स्योम्दी मिज्यु ताङगेराङ सोल्वाङ ताप नाङसीन। मास्यीकाकी दि रोहवा स्यिहवा दाङ किन्ज्योला क्याप्क्यो ज़ी़दी किन्ज्योगी मिहरोगी सोल्वाङ सेन नाङसीन। 8 मास्यीका किन्ज्योगी स़ेबु यिहन्गे यिहॱनाङ राहङगी खुरक्यो तुहक्पुया़ लाहमले मिहरोगी राहङ याहपकी काया़ ची़ज्ये लोप नाङसीन। 9 किन्ज्योगी मास्यीकाला छाङबु ज़ो छार फान्ज्यो मिहरोला ची़गे मिह थाम्ज्यीगी तेहन्दाला मिहरो था़ म़ेहबा मिहलीकी छ्येस्यो काहल्सीन। 10 ओहले किन्ज्योगीॱराङ मिहरोला मल्कीसेदेक ल़ेहमु गो-छ्येवा पूजाहारीकी ज़्य़ू-ठिला ज़्या़ नाङसीन। मास्यीकालेगी तेहपा मा़हलोह म़ेदी ज्यी़-ङोर तेरक्यो 11 दिगी तेहन्दाला ङ्यिहला माज्येनी माहङबुराङ येह, यिहॱनाङ ख्याला ङोह स्य़े च्य़ूज्येला का़हबु येह, च्यिबेमाना ख्यागी खोक्पा च्यान्दी काहल्दी येह। 12 देजे ती़हजी थुलानी ख्या लोबेन डो कोहच्ये येहकें, यिहॱनाङ जेन तोहरोङ ख्याला किन्ज्योगी तेहन्दाला फेमा-फेमा तामया़ क्यी़ह म़ेहबा सोङबे लेहमेन सुज्यीगी लोप तेर कोहएँगी छ्याप्स्यी गा काहल्सीन। ता़ह ख्येलानी मुहर कोहएँगी साहप्च्याया़ मिहम्बा ओहमा कोहएँ। 13 ओहमा च्यी़राङ थुङदी थार्के मिहती टाहङदेनकी सुङला खो पक्का काहल्ग्यो मेहयोहङगे, च्यिबेमाना खो पेहजाॱराङ ओहङगे। 14 यिहॱनाङ मुहर कोहएँगी साहप्च्याया़नी छार सिहन्ग्यो मिहया़गी तेहन्दाला यिहम्बा। च्यिबेमाना या़हबु चोक्पा च्यि यिहम्बा म़ेदी खा फे़ ख़ूएँगी नावा खुङला क़े सिहन्ग्यो ओहङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.