हिब्रू 4 - ह्योल्मोमास्यीकाला यिह छ्य़ेगे मिहया़ला थाङ सोएँगी ग्या़ 1 ओ़ह सोङबे किन्ज्योगी ओहराङला थाङ सोएँगी ग्या़ तेर्के सुङदी ताहम्ज्या ज़्या़ नाङग्यो ताहन्दा थु येहॱराङ येह यिहॱनाङ ओहराङ जेम्बु पेह कोहएँ ओहले किन्ज्योगी थाङ सो नाङगेन ग्या़ला स्य़ूह मिहङ्युहङगेन मिह ख्या नाहङला सुज्यीॱआङ माहयोहङज्यु। 2 च्यिबेमाना ङ्यिहलाॱआङ खुङला ल़ेहमुराङ या़हबु लेहङगु स्य़ेक्यो यिहम्बा। यिहॱनाङ थे़क्यो सुङगी खुङया़ला च्यिॱआङ फेन मा़हथो, च्यिबेमाना थे़गे मिहया़गी या़हबु लेहङगुला तेहपा पेहती लोक माहबे। 3 च्यिबेमाना ओहराङ यिह-छ्य़े पेहकेनया़दी ओ़ह थाङ सोएँगी ग्या़ला स्य़ूहज्ये येह, किन्ज्योगी दि ल़ेहमु सुङ नाङसीन, “ओ़ह सोङबे ङाहगी स्यिहताङ लाहङगेमु दि ल़ेहमु म़ेदी तोहदाम ज़्या़सीन, ‘ङाह थाङ सोएँ ग्या़ला खुङ नाहमॱआङ स्युह ङ्युहङज्ये म़ेह’।” यिहन्ज्येनी किन्ज्योगी छ्या़लेया़ साज्या-नाम्ज्या छ्या़ले यिहन्ज्युराङ तेहन्दा डुप सिहन्दी येह। 4 च्यिबेमाना छ्य़ेला ग्या़ च्यी़ला ङ्यिहमा तिहनगी तेहन्दाला दि ल़ेहमु सुङ नाङदी येह, “रेबेॱराङ छ्या़लेया़ लाहमले किन्ज्योगी ङ्यिहमा तिहनला थाङ सो नाङसीन।” 5 ओहले येहपाराङ लेहमेन स्योयाङला किन्ज्योगी दि ल़ेहमु सुङ नाङदी येह, “ङाह थाङ सोएँ ग्या़ला खुङ नाहमॱआङ स्य़ूह ङ्युहङज्ये म़ेह।” 6 लाहला मिहया़ स्य़ूहज्येला तोहरोङॱआङ खादीॱराङ येह, ओहले तोहङ तोहङले सु सुगी या़हबु लेहङगु थे़बा खुङगी या़हबु लेहङगुला मा़हचीबा सोङबे खुङ किन्ज्योगी थाङ सो नाङगेन्गी ग्या़ला स्युह माहङ्युहङ। 7 ओ़ह सोङबे किन्ज्योगी लेहमेन ङ्यिहमाला येहपाराङ “तिहरीङ” म़ेदी सुङ नाङसीन। ओ़हठीॱराङ पेहती लो़ह माहङबु तिङले येहपाराङ किन्ज्योगी दाऊद लाहमले दि ल़ेहमु सुङ नाङसीन “तिहरीङ ख्यागी किन्ज्योगी सुङ-क़े थ़ेसीन माना ख्यागी सेम सान्दी माहबे।” 8 च्यिबेमाना यहोशूगी खुङला थाङ सो च्य़ूक्यो यिहन्गे यिहनानी किन्ज्योगी तिङले येहपाराङ लेहमेन ङ्यिहमागी तेहन्दाला सुङ नाङज्ये म़ेहबा येहकें। 9 ओ़ह सोङबे किन्ज्योगी मिहया़गी तेहन्दाला थाङ सोएँ शबाथकी ङ्यिहमा खादीॱराङ येहबा। 10 किन्ज्योगी राहङगी छ्या़लेन छार्ती थाङ सो नाङसीन ओ़हठीॱराङ पेहती मिहरोगी थाङ सो नाङगे ग्या़ला स्य़ूहगे मिह सुगी माॱनाङ राहङगी ल़ेहलेगी थाङ सोएँ। 11 ओ़ह सोङबे ओ़ह थाङ सोएँ ग्या़ला स्य़ूहज्येला ला़ खाजेबा स्युक पेहतोङ। ओहराङ सुज्यीॱआङ किन्ज्योकी का मा़हचीबा सोङबे तोङदी माहन्डोज्यु। 12 च्यिबेमाना किन्ज्योगी सुङ सोम्बो येह ओहले दिगी छ्या़ले जे नाङगेराङ येहबा। ओहले दि, खा ङ्यी़ येहकेन्गी पादाङ म़ेदीॱआङ नोम्बु येहबा। ओहले दिगी सो दाङ नाम्स्यीला ओ़हगी छी़ दाङ रेहको नाहङगी काङ थु तोल्गे ओहले सेम नाहङगी तामया़ दाङ सेम्बाया़ला दिगी ङ्याहम च्येती ताएँ। 13 किन्ज्योगी ज़ी़ मी़हथुप्केन्गी से़हया़ च्यिॱआङ म़ेह। मिहरोगी दिनला रेबेॱराङ से़हया़ खा फे़क्यो येहबा ओहले छ्यिसाल-नाहङसाल थोङ ख़ूएँ। मिह-रो़हलाॱराङ ओहराङगी पेहक्यो ल़ेहया़गी तेहन्दाला स्य़े कोहज्ये येह। येशूॱराङ गो-छ्येवा पूजाहारी 14 स्यिहङगामला फेप नाङग्यो किन्ज्योकी स़ेबु येशू ओहराङगी गो-छ्येवा पूजाहारी यिहन्गे सोङबे ओहराङगी सेम तिहङ यिहन्ज्युराङ ची़दे ओहङग्यो यिह-छ्य़ेला सान्दी पेहती तेह कोहएँ। 15 च्यिबेमाना ओहराङ मा-फाम्बु डोएँमु ओहराङगी गो-छ्येवा पूजाहारीगी ओहराङला सेम सो च्य़ू नाङ ख़ूएँ। ओहराङ ल़ेहमुराङ मिहरोॱआङ थाम्ज्यीराङ से़हया़ला ङ्याहम्छेला छ्यि नाङसीन, यिहॱनाङ मिहरोगी तिहक्पा च्यिॱआङ जे माहनाङ। 16 ओ़ह सोङबे ओहराङ स्युक छ्यिम्बु पेहती किन्ज्योकी काटीनकी ज़्य़ू-ठि पोहला डो। ओहराङला कोम्बु डोएँमु ओ़हला ओहराङगी किन्ज्योकी थुज्यी दाङ काटीन ज्योर्च्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.