हिब्रू 12 - ह्योल्मोकिन्ज्योॱराङ ओहराङगी याहप यिहम्बा 1 ओहराङ देजे माहङा मिह पाङबुया़गी पाहरक्यीला येहकें सोङबे ओहराङ डोएँगी लाहमला का़ज्ये छोल्गेन्गी से़हया़ ओहले ओहराङला कोहल च्य़ूगेन्गी तिहक्पाया़ला ओहराङगी क्युर कोहएँ ओहले ओहराङ थाक-ताङदी किन्ज्योगी ते़ च्यू़ नाङग्योगी ग्या़ ङो़ले छ्योङ कोहएँ। 2 ओहराङ यिह-छ्य़ेला छ़ू नाङगे दाङ छाङबु जे नाङगेन्गी येशूला ओहराङगी त़ेदी तेहतोङ। राहङ आब्रु डोएँगी तामला येशूगी च्यिॱआङ नाङदा जे माहनाङ यिहॱनाङ मिहरोगी तिहङला ओहङगेन्गी सेम काहसोगी तेहन्दाला क्याहङस्यीङगी तुहक्पु खुर नाङसीन, ओहले मिहरो किन्ज्योगी ज़्य़ू-ठिकी योबा ङो़ले ज़्य़ू नाङसीन। 3 तिहक्च्येम्बा मिहया़गी येशूला ओहजे टाह पेहतीॱआङ मिहरोगी काह-ठि जेती ना़दी ज़्य़ू नाङबा यिहन्डो ओ़हदी नोम्साङ ताङदोङ ओहले ख्याया़ थाङ छ्येच्ये म़ेह ओहले सेम स्यिज्ये म़ेह। 4 तिहक्पा थो़ला क्याहल्ज्ये छोल्गेमु ख्यागी राहङगी ज़ुबुराङ तोर कोहएँगी छ्यालानी माहलेप येह ले। 5 किन्ज्योगी ख्याला राहङ पेहजाया़ॱराङ सुङदी लोप्ताम क्याहप नाङग्यो येहकें च्यि ख्यागी टेहम्बा च्येहपा? “ए ङाहगी पेहजा, चो़वोगी ख्येला टिहला ज़्या़ नाङज्ये छोल्गेमु या़हबु ङ्यिहन्दी पेह ओहले मिहरोगी ख्येला काप्क्येन नाङगेमु सेम मा़हस्यीपा पेहती तेह, 6 च्यिबेमाना सुला चो़वो छ्येवागी चेवा जे नाङगे खोलाराङ मिहरोगी टिहला ज़्या़ नाङगे, ओहले ‘ख्या ङाहगी पेहजा यिहन’ सुङ नाङगेया़ला मिहरोगी च्युर नाङगे।” 7 राहङ आबागीराङ ख्याया़ला टिहला ज़्या़ज्ये छोल्ग्यो यिहम्बा माएँ ने़दी ख्याया़ तुहक्पु ना़दोङ। किन्ज्योगी ख्याया़ला राहङगी पेहजाला ल़ेहमुराङ जेती छ्याप्स्यीया़ जे नाङगे। च्यिबेमाना आबागी टिहला मा़हज्याबा का़हन्दी पेहजा येहबा ले? 8 मिहरोगी ख्याया़ला राहङ पुह पोहमोया़ला ल़ेहमु जेती टिहला ज़्या़ नाङग्यो मे़हनानी ख्याया़ मिहरोगी पुह-पोहमो मिहम्बा, ख्या छ्येउ-छ्येंमु लाहमले क्येक्यो पुह पोहमोया़ यिहम्बा। 9 ओहराङला टिहला ज़्या़गेन आबाया़ला ओहराङगी ची़नाङ पेहक्यो ल़ेहमु ओहराङगी यिहक्तेन आबागी ओहराङला टिहला ज़्या़ नाङगेमु मिहरोला ओहराङगी जेन माहङबु ची़नाङ पेहती था़ म़ेहबा मिहजी ताङ कोहएँ। 10 ओहराङ आबाया़गी ओहराङला खुङला च्यि ठाबे ने़गे ओ़हला ते़बे ङ्यिहमा ङ्ये़हमुज्यीगी तेहन्दाला च्यी़राङ टिहला ज़्या़क्यो यिहम्बा, यिहॱनाङ किन्ज्यो याहपगीनी नाहम्स्यी किन्दुगी तेहन्दाला ओहराङलाॱराङ या़हबु ओहङज्यु ओहले मिहरो ल़ेहमुराङ नाम्पार-ताहक्पा डो ख़ूज्यु सुङदीमाराङ ओहराङला च्युर नाङगे। 11 किन्ज्योगी ओहराङला च्युर नाङगेमु ओ़ह ती़हजीला क्यिपु म़ेदी माहङबु तुहक्पु ओहङगे। यिहॱनाङ ओहराङ टिहला तेहती च्याहङदार पेह सिहन्ग्योया़गी तेहन्दाला ओ़हगी तिङले टाहङदेनकी स्य़िहदे ओहङ च्य़ूएँगी सेदो या़ह च्य़ूगे। लोप्ताम दाङ ज्यी़-ङोर नाङग्यो 12 ओ़ह सोङबे ङाहल्ग्योगी लाहक्पाया़ ता़ह क्या़दोङ, ओहले स्युक म़ेहबा पेहती दार्केन्गी पीमुया़ ता़ह सान्दी जे़दोङ। 13 काङबा कुच्या काहल्ग्योया़ काङबा मा़हठोज्यु यिहॱनाङ खुङ टा़ह ख़ूज्यु म़ेदीमाॱराङ ख्या डोएँगी लाहमया़ थेका जे़दोङ। 14 मिह थाम्ज्यी ङ्याम्बु थिन्दी तेहच्येला ओहले नाम्पार-ताहक्पा मिहजी ताङज्येला स्युक पेहतोङ च्यिबेमाना नाम्पार-ताहक्पा माहकाहल थु सुगीॱआङ चो़वोला थोङ मी़हखुएँ, 15 जेम्बु पेह, सु मिहज्यीॱआङ किन्ज्योकी काटीन ज्योर्च्येला ल़े टोहल (छूट) माहती़ज्यु, ओहले ख्या यिहला खाक्ती ज़ोएँगी तू़हगी तोहङबो ल़ेहमु बी़दी ओहङदी मिहया़ला तुहक्पु तेर्केन्की मिहया़ माहन्डोज्यु, मिहन्सीमाना ख्यागी मिह माहङबुलाराङ मेहचाङा ज़ोज्ये येह। 16 सुज्यीॱआङ छ्येउ-छ्येंमु पेहकेन्की मिह माहन्डोज्यु ओहले एसाव ल़ेहमु तिहक्च्येम्बा मिह माहन्डोज्यु। एसावगीनी तो छाक च्यी़गी तेहन्दाला पुह छ्येस्योगी ज्योर्केन्गी हकराङ चोङसीन। 17 ख्याया़ला क्यी़हराङ येह, तिङले खोगी राहङ आबा लाहमले मेलाम सेहच्ये छोल्सीन यिहॱनाङ खोगी माहन्ज्योर। खो राहङगी चोङग्योगी थोप-थाङ ङी़हदीमाॱराङ लो़दी लेहन्ज्ये छोल्गेमु ओ़ह खोगी माहन्ज्योर। 18 ख्याया़ राहङ लाहक्पागी दे़ ख़ूएँगी सीनै लाहला ओहङग्यो मिहम्बा, ओहले ख्याया़ जाङ-जाङ ती़हदी तेहक्यो मेहबुङ, मुक्पा नाहक्पु, ना़-जुबेगी यिहल तुम्ग्यो दाङ ल्हा़बा लुङजी पोहलाॱआङ ओहङदी म़ेह। 19 रोहवा-लीङकी क़े दाङ सुङ-क़े च्यी़ पोहलाॱआङ ख्याया़ ओहङदी म़ेह, मिहरोकी सुङ-क़े थे़गेया़गी “ता़ह दि म़ेदी ल्हाक्पु स्याहल छिका च्यी़ॱआङ सुङ माहनाङ” म़ेदी ओहर-छ्य़े स्युहसीन। 20 च्यिबेमाना “काहस्यीले का़हन्दीॱआङ सेम्ज्येनगी ओ़ह लाहला दे़सीन माना ओ़हदीला तोहगी क्याहप्ती सेतोङ” माएँ का खुङया़गी ना़ मा़हखु। 21 ओ़हला थोङग्यो से़हया़ ज्यिबुराङ ज्यी़ज्ये ल़ेहमु येहकें। ओ़ह सोङबे मोशागीॱआङ “ङाह ज्यी़दी दार्केॱराङ येह” म़ेदी माक्यो येहकें। 22 यिहॱनाङ ख्याया़नी सियोन लाह दाङ सोम्बो ज़्य़ू नाङगेन किन्ज्योकी क्याहसा ओहले स्यिहङगामकी यरूशलेमला ओहङदी येह। ओहले ख्या, टाहङमाराङ क्याहप मी़हखुएँ स्यिहङगामकी स्याहप्च्यीया़ खाम्साङबु पेहती जोम्ग्यो ग्या़ला ओहङदी येह। 23 स्यिहङगामला मिहन प्रुह सिहन्ग्यो तोहङस्यो क्येक्योया़गी छो़बाला ख्याया़ ओहङदी येह। ख्याया़ मिह थाम्ज्यीला ठिम ताङ नाङगे किन्ज्योगी ठिम-खाङला ओहले मिहरोगी याहङ-ताहक्पा ज़ो नाङग्यो टाहङदेन मिहया़गी नाम्स्यी येहकें ग्या़ला लेप्ती येह। 24 ख्या दाङ किन्ज्योगी पाहरक्यीला साम्बा ताहम्ज्या ज़्या़ज्येला लाहम्बा जे नाङगे येशूसाला ख्या ओहङदी येह। हाबिलगी ठा़ म़ेदी जेन या़हबु से़हदी ताहम्ज्या ज़्या़ नाङगे येशूकी कु-ठा़ला ओहङदी येह। 25 जेम्बु पेह, ख्या ङ्याम्बु स्याहल सुङ नाङगे सुङ-क़ेला मा-लोक माहबे। च्यिबेमाना दि जाम्बुलीङला ज्यी़-ङोर नाङगेन्दीला मा-लोक पेहकेनया़ थार मा़हखु मासीमाना स्यिहङगामले माहर ज्यी़-ङोर नाङगेन्दीला मा-लोक पेहसीमाना ओहराङ काह-ठि पेहती थार ख़ूज्ये ले? 26 सीनै लाहला किन्ज्योगी स्याहल सुङ नाङगेमु जाम्बुलीङॱराङ युहङग्यो येहकें। ताहन्दानी मिहरोगी दि ल़ेहमु सुङदी ताहम्ज्या ज़्या़ नाङग्यो येहबा, “ङाह येहपाराङ लेहमा च्यी़ जाम्बुलीङ च्यी़राङ मिहम्बा, स्यिहङगामलाॱआङ युहङ च्य़ूज्ये येह।” 27 “तोहरोङॱआङ लेहमा च्यी़” माएँ स्याहलगी, सा दाङ नामला येहकेन युङ ख़ूएँ थाम्ज्यीला तोङ च्य़ू नाङज्ये येह म़ेदी तेन्गे। यिहॱनाङ युङ मी़हखुएँ से़हया़ च्यी़राङ लिहच्ये येह। 28 ओ़ह सोङबे युङॱराङ मी़हखुएँगी क्याहल-खाप ओहराङगी ज़्योरक्यो सोङबे किन्ज्योला थुज्यी-छ्ये़ फुल्दोङ ओहले मिहरोला थु ङ्ये़हएँगी छ्याप्स्यी पेहती क्याप्तोङ ओहले किन्ज्योकी ज्यिक्पा खुर्ती मिहरोला छ्येपा फुल्दोङ। 29 च्यिबेमाना ओहराङगी किन्ज्योनी थाला फुङे ज़ो नाङगेन्गी मेह यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.