हिब्रू 10 - ह्योल्मोमास्यीकाकी मार्च्ये नाहम्स्यी किन्दुकी तेहन्दाला 1 मोशाकी छ्य़े-ठिमगी तिङला ओहङगेन्गी या़हबु केच्याया़ तेन्गेन्गी टिहप्सा ल़ेहमु च्यी़राङ यिहम्बा, यिहॱनाङ ओ़ह तेहन्दामकी पे़दी मिहम्बा। ओ़ह सोङबे लो़ह टाहङमाराङ फुल्ग्यो ओ़ह मार्च्येया़गी किन्ज्योला छ्येपा फुल्गे मिहया़ला छाङबु पेहती चाङमा ज़ो मी़हखुएँ। 2 सेम्ज्येनया़ फुल्दी माॱराङ चाङमा डो ख़ूएँ यिहन्सीमानानी च्यिबे येहपा-येहपाराङ मार्च्ये फुल कोहच्ये येहकें ले? का़हलेॱआङ ओ़हगी मार्च्ये फुल्गेया़ला चाङमा ज़ो ख़ूएँ यिहन्सीमानानी नाहम-मानागी तेहन्दाला लेहमा च्यी़लाॱराङ चाङमा डोज्ये येहकें ओहले ना थाम्ज्यीले चाङमा काहल्दी खुङया़गी नावाला च्यिॱआङ तिहक्पाया़ लिहच्ये म़ेहबा येहकें। 3 यिहॱनाङ ओ़ह मार्च्ये फुल्ग्यो सेम्ज्येनया़गी ठा़गी मिहया़ला लो़ह टाहङमाराङ राहङगी पेहक्यो तिहक्पाया़ टेहम्बा साल च्य़ूएँ। 4 च्यिबेमाना लाङगो दाङ राहया़गी ठा़गी तिहक्पा ता़ह च्यू़ॱराङ मी़हखुएँ। 5 ओ़ह सोङबे जाम्बुलीङला फेप नाङगेमु मास्यीकागी किन्ज्योला दि ल़ेहमु सुङ नाङसीन, “मार्च्ये दाङ डेल्बाया़ राहङगी थु-सेम जे माहनाङ, यिहॱनाङ राहङगी ङाहगी तेहन्दाला ज़ुबु च्यी़ ठाबे जे-नाङदी येह। 6 सेम्ज्येन सा़क्योगी मार्च्ये दाङ तिहक्पाकी तेहन्दाला फुल्ग्योगी मार्च्ये राहङगी थु-सेम जे माहनाङ।” 7 ओ़ह सोङबे ङाहगी मासीन, “ओ़ किन्ज्यो, ङाह देला ओहङदी येह। छ्य़ेला प्रुहक्यो ल़ेहमुराङ, ङाह किन्ज्योगी थु-सेम छाङबु पेहच्येला ठाबे काहल्दी येह।” 8 तोहङस्यो मास्यीकागी दि ल़ेहमु सुङ नाङसीन, “मार्च्ये दाङ डेल्बाया़, सेम्ज्येन सा़क्योकी मार्च्ये दाङ तिहक्पाकी तेहन्दाला फुल्ग्योकी मार्च्येया़ राहङगी थु-सेम जे माहनाङ। ओ़ह से़हया़ला राहङगी थु काहसो म़ेहबा येहकें।” (यिहन्ज्येनी दि थाम्ज्यीराङ से़हया़ पेह कोहएँ म़ेदी छ्य़ेला प्रुहक्यो येहकें।) 9 ओ़ह तिङला मास्यीकागी सुङ नाङसीन, “ओ़ किन्ज्यो, ङाह देला राहङगी थु-सेम छाङबु पेहच्येला ओहङदी येहबा।” ओ़ह सोङबे किन्ज्योगी तोहङमागी मार्च्ये फुल्गेन्गी ठिमया़ला च्ये नाङदी ओ़हगी छापला मास्यीकाकी मार्च्ये छ़ू नाङसीन। 10 ओ़ह थु-सेम लाहमलेॱराङ येशू मास्यीकागी राहङगी कुसो मार्च्ये फुल नाङदी नाहम-मानागी तेहन्दाला ओहराङला नाम्पार-ताहक्पा ज़ो नाङसीन। 11 थाम्ज्यी पूजाहारीया़गी दार-च्यी़राङ लाहङदी किन्ज्योला मार्च्ये फुल्गेन्गी ल़ेह पेहकें ओहले खुङगी ङ्यिहमा टाहङमा ना च्यी़राङ मार्च्येया़ फुल्गे। यिहॱनाङ दि ल़ेहमु मार्च्येया़गी नाहमॱआङ तिहक्पा ता़ह च्य़ू मी़हखुएँ। 12 यिहॱनाङ मास्यीकागीनी नाहम-मानागी तेहन्दाला दाङस्यी जेती राहङगी राहङलाराङ तिहक्पाकी तेहन्दाला च्यी़मे च्यी़राङ मार्च्ये फुल नाङसीन। दि छ्या़ले छार फान्ज्यो मिहरो किन्ज्योकी योबा ङो़ले ज़्य़ू नाङसीन। 13 किन्ज्योगी मास्यीकाकी टाहया़ला मास्यीकाकी स्याहप चो़ला छ्यि च्य़ू माहनाङ थु मिहरो ओ़हलाराङ कू़हदी ज़्य़ू नाङज्ये येह। 14 मिहरोगी फुल नाङग्यो च्यिमे च्यी़राङ मार्च्येगी तिहक्पालेगी चाङमा काहल्ग्योया़ला नाहम-मानागी तेहन्दाला छाङबु ज़ो नाङदी येह। 15 ओहले नाम्पार-ताहक्पा थुगीॱआङ ओहराङला दि ल़ेहमु जेती पाङबु नाङगे, 16 “चो़वो छ्येवागी सुङ नाङगु दु, ‘ओहङगे ङ्यिहमाया़ला ख्या ङ्याम्बु ज़्या़गेन्गी साम्बा ताहम्ज्या दिराङ यिहम्बा। ङाहगी छ्य़े-ठिम खुङया़गी सेमला ज़्या़ तेर्च्ये येह ओहले ओ़ह खुङया़गी नावाला प्री़ह तेर्च्ये येह’।” 17 मिहरोगी दि ल़ेहमु सुङ नाङगु दु, “खुङया़गी पेहक्यो तिहक्पा दाङ ल़ेह ङ्येहम्बाया़ ङाहगी येहपाराङ नाहमॱआङ टेहम्बा साल्ज्ये म़ेह।” 18 ओ़ह सोङबे दि थाम्ज्यी तिहक्पालेगी कोहङदा ज्योर सिहन फान्ज्यो येहपाराङॱआङ तिहक्पा टोहल च्य़ूज्येला मार्च्ये फुल मेहकोहएँ। 19 ओ़ह सोङबे आदा-नो़ह दाङ आज्यी-नुहमुया़, येशूगी ठा़गी पेहती ओहराङ चा़ छ्यिम्बु नाम्पार-ताहक्पा ग्या़ला स्युक छ्यिम्बु पेहती स्य़ूह ख़ूएँ। 20 येशू टोहङ नाङदी ओहराङगी तेहन्दाला मिहली तेर्केन्गी लाहम साम्बा च्यी़ ज़ो नाङसीन ओहले मिहरोगी कुसो लाहमले चा़ छ्यिम्बु नाम्पार-ताहक्पा ग्या़ला क्याहप्क्योकी योल्बा ओहराङगी तेहन्दाला खा फे़ नाङसीन। 21 किन्ज्योगी ज़िम्गाङला ता़ह थाम्ज्यी म़ेदी चा़ छ्यिम्बु पूजाहारी ज़्य़ू नाङदी येह ओहले मिहरोगीॱराङ ओ़ह ज़िम्गाङला ओङ छ्य़े नाङगे सोङबे, 22 ता़ह ओहराङ किन्ज्योकी कुम्देनला डोएँमु च्याहङज्यु सेम्बा थो़दी, सेम तिहङ यिहन्ज्युराङ यिह छ्य़ेदी ओहले थाक ताङदे किन्ज्योगी दिनला डो। च्यिबेमाना नावा चोक्पा लाहमले मिहरोगी ओहराङगी सेमला चाङमा ज़ो नाङदी येह ओहले छ्यु चाङमागी ओहराङगी ज़ुबुला ठु नाङदी येह। 23 ओहराङगी सेम तिहङ यिहन्ज्युराङ यिह छ्य़ेक्यो रेहवाला ओहराङ सेम माहयाहङबा पेहती सान्दी पेहती ज़ुङदी ज़्या़ कोहएँ, च्यिबेमाना ताहम्ज्या ज़्या़ नाङगेन्गी किन्ज्यो यिह-छ्य़ेबु ज़्य़ू नाङदी येह। 24 ओहराङगी च्यी़गी च्यी़ला निङज्यी दाङ या़हबु ल़ेहगी तेहन्दाला काह-ठि पेहती आ़र क्ये च्य़ूज्ये माएँ तामला नोम्साङ ताङ कोहएँ। 25 लाहला मिहया़ छोक्पाला मेहन्डोएँगी बा़नी ओहङगे ल़ेहमु ओहराङ ङ्याम्बुदी ओ़ह ल़ेहमु बा़नी ओहङज्ये मेहयोहङगे। चो़वोकी ङ्यिहमा पोहला ओहङगेॱराङ पेहक्यो ख्याया़गी थोङग्यो सोङबे छोक्पा पेहच्येला च्यी़गी च्यी़ला जेन माहङबु आ़र क्ये च्य़ूदोङ। 26 च्यिबेमाना तेहन्दामकी रिहक्स्यी ज्योर्तीॱआङ ओहराङगी ङोह स्य़ेदी स्य़ेदीॱआङ तिहक्पा पेहसीनमाना ता़ह तिहक्पाकी तेहन्दाला लेहमेन का़हन्दीॱआङ मार्च्ये म़ेह। 27 ओ़हगी छापला दि ल़ेहमु तिहक्पा पेहकें मिहया़गी ज्यिक्पा खुर्केॱराङ किन्ज्योगी काल नाङगेन्गी ङ्य़ेहबा क़ूह कोहएँ। ओहले मेह ल़ेहमु ती़हदी तेहकेन किन्ज्योकी थुयालगी टाहया़ला थाला फुङे ज़ो नाङज्ये येह। 28 मोशाकी छ्य़े-ठिम गोम्गे मिहला मेहन्दा ङ्यी़ सुम पाङबु ज़्या़दी निङ मा़हच्येहबा पेहती खोला से कोहएँ। 29 ख्याया़ राहङगीराङ नोम्साङ ताङदोङ: किन्ज्योकी स़ेबुला राहङ काङबा चो़ला ज़्या़गे ओहले तिहक्पालेगी नाम्पार-ताहक्पा ज़ो नाङगे किन्ज्योकी ताहम्ज्या थिउ-निउ पेहकें मास्यीकाकी ठा़ला च्यि ल़ेहमुज्यीॱआङ मे़हनेगे ओहले काटीन नाङगेन्गी नाम्पार-ताहक्पा थुला स्ये़हन्डील पेहकें मिहला जेन काहजे छ्यिम्बु ङ्य़ेहबा फो़रो? 30 च्यिबेमाना “क्यिम्बा लेहन्गेन्गी ल़ेह ङाहती यिहम्बा, ङाहराङगी क्यिम्बा च्याल्गे” म़ेदी सुङ नाङगेन्दीला ओहराङगी ङोह स्य़ेएँ। ओहले छ्य़ेला दि ल़ेहमु म़ेदीॱआङ प्री़हदी येहबा, “चो़वो छ्येवागीराङ राहङ मिहया़ला ठिम ज़ी़ नाङज्ये येह।” 31 सोम्बो ज़्य़ू नाङगेन किन्ज्योकी छ्या़ला छ्यिकें माक्योदी काहजे ज्यी़सुकी ताम यिहम्बा! 32 ओ़ह तोहङमागी ङ्यिहमाया़ टेहम्बा साल्दोङ। ओहजे काहङला ख्याया़गी किन्ज्योकी क्या-साङे ज्योर फान्ज्यो माहङबुराङ तुहक्पु खुर कोहसीन यिहॱनाङ ख्याया़गी सेम मा-फाम्बु माहकाहल। 33 लेहमा माहङबुराङ ख्याया़ मिहया़गी दिनला आब्रु काहल्सीन ओहले खुङया़गी ख्याला ङ्येन्ज्येन पेहसीन। ओहले दि ल़ेहमुराङ तुहक्पु ङ्युहङग्यो मिहया़ला ख्याया़गी रो़हराम पेहसीन। 34 चोन-खाङला छ्यिक्योया़ला ख्यागी निङज्यी पेहसीन। राहङ ङ्याम्बु येहकेन्की थाम्ज्यी क्युह नोहरया़ मिहया़गी फ्रो़दी ख्येर्केमुॱआङ ख्यागी सेम काहसो पेहती ना़दीराङ तेहसीन। च्यिबेमाना नाहम्स्यी किन्दु लिहकेन्गी ओ़ह म़ेदीॱआङ छ्यिम्बु क्युह-नोहर राहङ ङ्याम्बुराङ येह माएँ ताम ख्याया़ला क्यी़ह येहकें। 35 ओ़ह सोङबे सेम मा-फाम्बु माहबे। ख्येला दिती च्याहगा छ्यिम्बु ज्योर्च्ये येह। 36 किन्ज्योकी थु-सेम छाङबु पेहच्येला ओहले मिहरोगी ताहम्ज्या ज़्या़ नाङग्योकी केच्याया़ ज्योर्च्येला ख्या थिक-चि पेहती कू़हदी तेहतोङ। 37 च्यिबेमाना छ्य़ेला दि ल़ेहमु प्री़हदी येहबा, “मिहरो फेप नाङगेन्दी, फेपॱराङ नाङज्ये येह ओहले फिमु जे नाङज्ये म़ेह। 38 यिहॱनाङ ङाहती टाहङदेनगी मिहया़दी यिह-छ्य़े लाहमलेॱराङ थार्च्ये येह, ओहले ओ़हया़ नाहङला सुज्यीॱआङ तेहपा लो़हदी डोउ दु मासीमाना ङाह खो ङ्याम्बु क़ेहनाङ लाहङज्ये म़ेह।” 39 यिहॱनाङ ओहराङनी तेहपा लो़हदी तोङदी डोएँया़ नाहङदी मिहम्बा, यिहॱनाङ ओहराङनी यिह-छ्य़े पेहती थार्क्योया़ नाहङदी गा यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.