गलाती 6 - ह्योल्मोच्यी़गी च्यी़ला रो़हराम पेहतोङ 1 आदा-नो़ह दाङ आज्यी-नुहमुया़, सुज्यीगी तिहक्पाकी ल़ेहया़ पेह तेहक्यो च्य़ेह सिहन्सीमाना नाम्पार-ताहक्पा थु लाहमले राहङगी डोलु-तेहलु पेहकेन मिहया़गी स्यिहवा पेहती खोला लोप्ताम क्याहप्ती लाहम या़हबुला ख्योङ कोहएँ। ओहले ख्या राहङगी तेहन्दालाॱआङ या़हबु जेम्बु पेहतोङ मिहन्सीमानानी ख्याया़ॱआङ ङ्याहम्छेला छ्यिच्ये येह। 2 तुहक्पु-तुहङालकी खुरुया़ खुर्च्येला च्यी़गी च्यी़ला रो़हराम पेहतोङ। दि ल़ेहमुराङ पेहती ख्यागी मास्यीकाकी छ्य़े-ठिम छाङबु पेहच्ये येह। 3 का़हलेॱआङ सुज्यीगी राहङगी राहङला ङाहराङ यिहन म़ेदी ठासक तेन्गे यिहॱनाङ यिहन्ज्येदी खो च्यिॱआङ मिहम्बा यिहन्सीमानानी खो राहङगी राहङलाराङ गो़ कोर च्य़ूगे। 4 मिह थाम्ज्यीगी राहङ-राहङगी ल़ेहया़ या़हबु पेहती ङ्याहम्ज्यी पेहच्यु ओहले च्यी़राङ खो राहङगी राहङलाराङ लेहमेन मिहया़ ङ्याम्बु माहतुहर्पा पेहती राहङगी पेहक्योकी ल़ेहया़ थो़ला क़ेहनाङ पेह ख़ूज्ये येह। 5 च्यिबेमाना ख्या थाम्ज्यीगी राहङगी ल़ेहया़ राहङगीराङ छाङबु पेह कोहएँ यिहम्बा। 6 ओहले किन्ज्योगी सुङदेन ज्योर्केन्दीगी किन्ज्योगी सुङदेन लोप्कें लोबेन ङ्याम्बु राहङ ङ्याम्बु येहकेन्की थाम्ज्यीराङ या़हस्यो से़हया़ कोह कोहकें। 7 राहङगी राहङला गो़ कोर मा़हच्यु, सुगीॱआङ किन्ज्योला स्ये़हन्डील पेह मी़हखुएँ, च्यिबेमाना मिहगी राहङ स्यिहङला च्यि कामे क्याहप्के खोगी ओ़हदीॱराङ टू़हगे यिहम्बा। 8 का़हन्दीगी तिहक्पाकी सेम्बा लाहमले सेनया़ ताप्के खोगी ओ़ह लाहमलेॱराङ स्यिएँगी कामेया़ रुज्ये येह यिहॱनाङ का़हन्दीगी यिहक्तेन सेनया़ ताप्के खोगीती ओ़ह लाहमलेॱराङ नाहमॱआङ मिहस्यीएँगी मिहलीकी कामेया़ रुज्ये येह। 9 या़हबु ल़ेह पेहच्येकी तेहन्दाला ओहराङ नाहमॱआङ थाङ छ्येच्ये मेहयोहङगे च्यिबेमाना का़हलेॱआङ ओहराङ खोदा माहछ्येपा पेहती या़हबु ल़ेहया़ पेहतीराङ तेहसीन माना ती़हजी लेप फान्ज्योनी ओहराङगी राहङगी कामेया़ रु-ङ्युहङज्ये येह। 10 ओ़ह सोङबे लोहङ येहताङलाॱराङ ओहराङगी मिहया़ला या़हबु पेह कोहएँ ओहले खास पेहतीती मास्यीकाला यिह-छ्य़े पेहक्योकी खाङबा मे़हमेया़ला या़हबु पेह कोहएँ। पावलकी तिङस्यो लोप-तामया़ 11 त़ेदोङ, ङाह काहजे छ्यिम्बु-छ्यिम्बु यिहगीया़गी राहङदीराङ लाहक्पागी ख्याया़ला प्रुहएँॱराङ येहबा। 12 मास्यीकाकी क्याहङस्यीङकी तेहन्दागी पेहती तुहक्पुला माहछ्यीज्यु म़ेदी यिहन्दो तेन्ज्ये सेम्बा पेहकेनया़गीॱराङ ख्याला स्या-ताक पेहॱराङ कोहकें म़ेदी उर्चु पेहकें। 13 च्यिबेमाना स्या-ताक पेहकेनया़ राहङगीराङ छ्य़े-ठिम मी़हचीएँ, यिहॱनाङ ख्याया़ला स्या-ताक पेह च्य़ूदी खुङलाॱआङ ओहराङ यहूदीया़ ल़ेहमुराङ ज़ो ख़ूसीन म़ेदी छ्य़ेन्दो तेन्ज्येकी तेहन्दाला गा खुङया़गी ख्याया़ला स्या-ताक पेह च्य़ूज्ये छोल्गे। 14 यिहॱनाङ ङाहदी येशू मास्यीकाकी क्याहङस्यीङ म़ेदी लेहमेन का़हन्दीॱआङ से़हला छ्य़ेन्दो मेहतेन। मिहरोकी क्याहङस्यीङगी पेहती ङाहगी तेहन्दाला जाम्बुलीङ स्यि सिहन्ग्यो येह ओहले जाम्बुलीङकी तेहन्दाला ङाह स्यि सिहन्ग्यो येह। 15 स्या-ताक पेहॱनाङ, स्या-ताक मेहबेॱनाङ ओ़हला च्यिॱआङ ख्येपार म़ेह। यिहॱनाङ थाम्ज्यी म़ेदी छ्यिम्बु केच्याती दिराङ यिहम्बा– मास्यीका लाहमले मिहली साम्बा ज्योर्के दिराङ थाम्ज्यी म़ेदी चा़ छ्यिम्बु यिहम्बा। 16 ता़ह दि तामया़ला ङ्यिहन्दी राहङगी डोलु-तेहलु या़हबु पेहकेनया़ दाङ किन्ज्योकी इस्राएल क्यिहपाया़ थो़ला स्य़िहदे दाङ थुज्यी ज़ी़-नाङज्यु। 17 ता़ह यिहन्ज्यु ङाहला सुज्यीगीॱआङ तुहक्पु माहतेर्च्यु, च्यिबेमाना येशूगी नाहन्दीकी मेम्बाया़ ता़ह ङाहगीॱआङ राहङगी ज़ुबुला खुर्ती येह। 18 ए आदा-नो़ह दाङ आज्यी-नुहमुया़, ओहराङ चो़वो येशू मास्यीकाकी काटीन ख्यागी नाम्स्यी ङ्याम्बु ज्यू़-नाङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.