Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

एफिसी 3 - ह्योल्‍मो


लेहमेन क्‍यिहपाकी पाहर्क्‍यीला पावलकी छ्या़ले

1 ओ़ह सोङबे ख्‍या लेहमेन क्‍यिहपाकी मिहया़गी तेहन्‍दाला मास्‍यीकाकी छ्या़ले पेहकेमु ङाह पावल चोन-खाङला छ्यिती येह।

2 ख्‍याया़गी तेहन्‍दाला ङाहला चि क्‍याहप नाङग्‍यो किन्‍ज्‍योकी काटीनकी ठालगी तेहन्‍दाला ख्‍याया़गीॱआङ थे़दी येह म़ेदी ङाहला ने़दी येह।

3 ओ़ह तिहङ-रिहङबुकी केच्‍या किन्‍ज्‍योगी ङाहला तेन नाङदी ङोह स्‍य़े च्‍य़ू नाङसीन।

4 ङाहगी प्रुहक्‍यो दि यिहगी ख्‍याया़गी टा़ह फान्‍ज्‍यो, मास्‍यीकाकी तिहङ-रिहङबुकी केच्‍याया़ ङाहगी काहजेबा ङोह स्‍य़ेक्‍यो दुबा माएँ ताम ख्‍याया़गी ङोह स्‍ये़ज्‍ये येह।

5 दि तिहङ-रिहङबुकी केच्‍या तोहङमागी मिहदोकी मिहया़ला ङोह स्‍य़े च्‍य़ू माहनाङ येहकें यिहॱनाङ ताहन्‍दा दि तिहङ-रिहङबुकी केच्‍या नाम्‍पार-ताहक्‍पा थु लाहमले राहङगी टाहङबु ल़ेह-पेनया़ दाङ लुहङतेम्‍बाया़ला किन्‍ज्‍योगी ङोह स्‍य़े च्‍य़ू नाङदी येह।

6 ओ़ह तिहङ-रिहङबुकी केच्‍या च्‍यि यिहम्‍बा मासीमाना, लेहमेन क्‍यिहपाकी मिहया़गीॱआङ या़हबु लेहङगु लाहमले इस्राएलीया़गी ल़ेहमुराङ किन्‍ज्‍योकी मेलामया़ ज्‍योर ख़ूएँ काहल्‍सीन। लेहमेन क्‍यिहपाकी मिहया़ॱआङ ज़ुबु च्‍यी़गी ओङबुया़ यिहन ओहले मास्‍यीका येशू लाहमले किन्‍ज्‍योगी ज़्‍या़ नाङग्‍योकी ताहम्‍ज्‍या पी़मागी हकदार काहल्‍दी येह।

7 किन्‍ज्‍योगी ओङगी छ्या़ले लाहमले मिहरोगी ङाहला काटीन जे-नाङदी काबाप नाङसीन ओहले ङाह या़हबु लेहङगु स्‍येकेन्‍गी योक्‍पु काहल्‍सीन।

8 मास्‍यीकाकी नाम्‍पार-ताहक्‍पा मिहया़ नाहङला ङाह थाम्‍ज्‍यी म़ेदी फेनराङ मे़हथोएँ येहॱनाङ मिहकी नावागी ङोहॱराङ स्‍य़े मी़हखुएँ मिहरोकी क्‍युहकी या़हबु लेहङगु लेहमेन क्‍यिहपाकी मिहया़ला स्‍येकेन्‍गी काटीन किन्‍ज्‍योगी ङाहला नाङसीन।

9 ना थाम्‍ज्‍यी से़हया़ छ्या़ च्‍य़ू नाङगे किन्‍ज्‍योगी काल्‍बा-काल्‍बा यिहन्‍ज्‍यु साङदे ज़्‍या़ नाङग्‍योकी तिहङ-रिहङबुकी केच्‍याया़ च्‍यि यिहम्‍बा, ओ़ह मिह थाम्‍ज्‍यीला प्रा साल्‍गेन्‍गी काटीन ङाहला नाङसीन।

10 दि ल़ेहमु पेहती छेन्‍छोक लाहमले किन्‍ज्‍योकी नामे-नाजो येहन्‍देनया़ स्‍यिहङगामकी ग्‍या़या़ला ठिम तेन्‍गेया़ दाङ ओङ ज्‍योरक्‍योया़की पाहरक्‍यीला तेन ख़ूज्‍यु।

11 दि थाम्‍ज्‍यी किन्‍ज्‍योगी राहङदी था़ म़ेहबागी राहङगी ज़ोक्‍योकी च्‍याहम्‍दा यिहम्‍बा। ओहले दि ओहराङ चो़वो मास्‍यीका येशूला मिहरोगी तेहन्‍दा डुप च्‍य़ू नाङसीन।

12 मास्‍यीकाला क्‍याप्‍ती ओहले मिहरोला तेहपा पेहतीराङ ओहराङगी किन्‍ज्‍योगी दिनला डोज्‍येला स्‍युक दाङ आ़र ज्‍योर्ती येह।

13 ओ़ह सोङबे ङाह ख्‍याया़ला ओहर-छ्य़े स्‍युहउ येह, ख्‍याया़गी तेहन्‍दाला ङाहगी तुहक्‍पु खुरक्‍यो थोङदी ख्‍याया़ सेम मा़हस्‍यी। दिनी ख्‍याया़लाॱराङ ख्‍येप्‍साङ ओहङगेन स़ेह यिहम्‍बा।


एफिससकी छेन्‍छोककी तेहन्‍दाला सोल्‍वाङ

14 ओ़ह सोङबे ङाह किन्‍ज्‍यो याहपकी स्‍याहपला पी़मु च़ूदी सोल्‍वाङ ताप्‍को येह।

15 मिहरो लाहमलेॱराङ स्‍यिहङगाम दाङ जाम्‍बुलीङला येहकेन्‍की थाम्‍ज्‍यी खाङबा मे़हमेया़की मिहन ज़्‍या़ नाङदी येह।

16 मिहरोकी चा़ छ्यिम्‍बु क्‍युह दाङ थु लाहमले ख्‍याया़गी ओङ ज्‍योर ख़ूज्‍यु ओहले ओ़ह ओङगी ख्‍याया़ला नाहङ यिहन्‍ज्‍युराङ स्‍युक छ्यिम्‍बु ज़ो ख़ूज्‍यु म़ेदी ङाह किन्‍ज्‍यो ङ्याम्‍बु सोल्‍वाङ ताप्‍को येह।

17 ओहले यिह-छ्य़े लाहमले मास्‍यीका ख्‍याया़की यिहला ज़्‍य़ू नाङज्‍यु, ओहले चेवाला चार्ङ्यी सू़हदी ओहले सान्‍दी काहल्‍दी,

18 मास्‍यीकाकी नाम्‍पार-ताहक्‍पा मिहया़ ङ्याम्‍बु स्‍याहङ, रिहङबु, थुम्‍बु ओहले तिहङ रिहङबु च्‍यि दुबा ओ़ह ङोह स्‍य़े ख़ूएँगी ओङ ज्‍योर ख़ूज्‍यु,

19 थाम्‍ज्‍यी रिहक्‍पा दाङ रिहक्‍स्‍यीगी छोल मी़हखुएँ मास्‍यीकाकी चेवा ख्‍याया़गी ङोह स्‍य़े ख़ूज्‍यु ओहले ख्‍याया़दी मिहली किन्‍ज्‍योगीॱराङ काङ नाङज्‍यु।

20 ओहराङ नाहङला छ्या़ले जे नाङगे मिहरोकी ओङ लाहमले ओहराङगी लाङग्‍यो दाङ सेमला ने़क्‍यो म़ेदीॱआङ माहङबु जेती नाङ थुप्‍कें,

21 किन्‍ज्‍योलाॱराङ काल्‍बा-काल्‍बा थु छेन्‍छोक दाङ मास्‍यीका येशूला नाहम्‍स्‍यी किन्‍दुॱराङ ज़िज्‍यिद ओहङज्‍यु। आमेन।

© 2023 (Active), Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ