ल़ेह-पेन 25 - ह्योल्मोपावलगी रोमी क्याहल्बु छ्यिम्बुला ह्ओर-छ्ये स्युहक्यो 1 फेस्तस राहङ लुहङबाले ओहङदी ङ्यिहमा सुम तिङले कैसरिया क्याहसाले यरूशलेमला काहल्सीन। 2 ओहले फेस्तस ओ़हला येहकेंमु पूजाहारी छ्यिम्बु दाङ यहूदीया़की गोबाया़गी पावलला टाह पेहती फातुर च़ूसीन। 3 ओहले खुङया़गी, “पावलला यरूशलेमला ताङ नाङदोङ” म़ेदी फेस्तसला स्युहसीन। च्यिबेमाना पावलला लाहमला ओहङगे ओहङगेमुॱराङ सेच्ये म़ेदी खुङगी टे़ह क्याहप सिहन्दी येहकें। 4 ओहले फेस्तसगी मासीन, “पावलला कैसरियागी चोन-खाङलाराङ ज़्या़दी येहबा, ङाहॱआङ ग्यो़बाराङ ओ़ह ग्या़ला डोउ येहबा। 5 ख्या नाहङला लाहला गोबाया़ ङाह ङ्याम्बु डोज्ये सेम येहसीमाना ताङ चाहङदोङ। का़हलेॱआङ पावलगी च्यिरा ल़ेह नोहर च्य़ूक्यो येहसीमानानी खुङया़गी ओ़हलाराङ उजूर पेह ख़ूज्ये येह।” 6 ओहले फेस्तस ङ्यिहमा क्ये़हजे-च्युजे थु यरूशलेमला तेहती कैसरिया क्याहसाला लो़ह ओहङसीन। ओहले लो़ह ओहङगेन्गी नाहङबार च्युङ ङ्यिहमुराङ ठिम ताङगेन्गी ज़्य़ू-ठिला ज़्य़ूदी पावलला ख्येर-स्यो म़ेदी का नाङसीन। 7 पावल ओहङ फान्ज्यो यरूशलेमले ओहङग्यो यहूदीया़गी पावलला छ्यो़ ज़्यिलेराङ क्यिल्दी यिहन्जे मिहन्जे ङ्य़ेहबा माहङबुराङ केन्सीन। यिहॱनाङ खुङगी च्यिॱआङ दास्यी तेन मा़हखु। 8 ओहले पावलगी राहङगी तेहन्दाला ताम प्रा साल्दी मासीन, “ङाहगी यहूदी छ्य़े-ठिम, छ्योखाङ दाङ रोमी क्याहल्बु छ्यिम्बुगी तेहन्दाला टाह पेहती च्यिॱआङ चोक्पा ल़ेहया़ पेहती म़ेह।” 9 ओहले फेस्तसगी यहूदीया़ला क़ेहनाङ लाहङ च्य़ूज्येला पावलला मासीन, “ख्येला ङाह यरूशलेमला ताङ चाहङगे ओहले दि तामगी तेहन्दाला ख्येगी ठिम ओ़हलाराङ ताङ तेर्कें, मेहयोहङगे ले?” म़ेदी टी़हसीन। 10 ओहले पावलगी मासीन, “ङाह रोमी क्याहल्बु छ्यिम्बुगी ठिम-खाङगी दिनला लाहङ तेहती येहबा, ङाहगी ठिम देलाराङ ता कोहएँ। ङाहगी यहूदीया़ला टाह पेहती च्यिॱआङ ल़ेह चोक्पा पेहती मेह माएँ ताम राहङलाॱआङ थुयी़ येहबा। 11 का़हलेॱआङ ङाहगी छ्य़े-ठिमला गोम्ग्यो यिहन्सीमाना ओहले स्यिॱराङ कोहएँ थुगी ल़ेह चोक्पाया़ पेहक्यो यिहन्सीमाना ङाह स्यिज्येॱलाङ ठाबे येह। यिहॱनाङ, यहूदीया़गी ङाह थो़ला केन्ग्योगी ङ्य़ेहबाया़ तेहन्दाम मिहन्सीमानानी खुङगी ङाहला सुज्यीगी लाहक्पालाॱआङ च्योल मी़हखुएँ। ङाहला ठिम ताङज्येला रोमी क्याहल्बु छ्यिम्बु सालाराङ नोम फेप्तोङ म़ेदी स्युहउ येहबा।” 12 ओहले फेस्तसगी राहङगी रो़हया़ ङ्याम्बु टे़ह क्याहप्ती मासीन, “ख्येगी कैसर साला ख्येर्च्येला ङाहला माक्यो सोङबे ख्येला ङाह कैसर सालाराङ ताङ चाहङगे।” फेस्तसगी अग्रिपास ङ्याम्बु टे़हरिम लेहन्ग्यो 13 स्याहक्पु तोबा तिङले क्याहल्बु अग्रिपास दाङ खोगी नुहमु बरनिकी रोमी स्युहङ-पेन छ्यिम्बु फेस्तसला फेप स्यी़हदी कैसरिया लुहङबाला ओहङसीन। 14 ओहले खुङ ङ्यिहमा तोबा थु कैसरिया लुहङबाला तेह फान्ज्यो फेस्तसगी क्याहल्बुला पावलगी ताम दि ल़ेहमु म़ेदी स्येसीन, “देला फेलिक्सगी चोन-खाङला लू़क्योगी मिह च्यी़ येहबा। 15 ङाह यरूशलेमला डोएँ ती़हजीला यहूदीया़की पूजाहारी छ्यिम्बु दाङ गोबाया़गी ‘खोला टाह पेहती फातुर च़ूक्यो येहकें ओहले तुहङ कोहकें’ म़ेदीॱआङ मासीन। 16 ओहले ङाहगी खुङला मासीन, ‘रोमी क्याहल्बुगी क्याहल-खापला मिहला ल़ेह नोहरक्यो स्यी़हक्योगी तामगी दास्यी माहन्ज्योर थु ङ्य़ेहबा काल्गे ठिम म़ेह। फातुर च़ूगे मिहगी दिनला ओहङदी खोगी राहङगी ताम स्येच्येला लोहङ ज्योर कोहएँ’। 17 ओहले खुङ देला ओहङ फान्ज्यो ङाहगी यिहन मा़हथोबा पेहती नाहङबार च्युङॱराङ ‘पावलला ठिम-खाङला ख्येर-स्यो’ म़ेदी कुल्सीन। 18 पावलला टाह पेहकेया़गी खोगी ल़ेह चोक्पा पेहक्योगी फातुर च़ू डोएँ माएँ सेम क्ये़दी येहकें, यिहॱनाङ खुङया़गी ओ़ह ल़ेहमु च्यिॱआङ फातुर च़ू मा़हखु। 19 खुङराङगी छ्य़े दाङ स्यि सिहन्ग्यो येशू माएँ मिहगी तेहन्दाला च्यी़राङ खुङया़दी पावल ङ्याम्बु ठ़ूस्यी काहल्ग्यो दुबा। पावलदी स्यि सिहन्ग्योगी येशू तोहरोङॱआङ सोम्बोराङ येह म़ेदी क्याहल्गु दुबा म़ेदी मासीन। 20 दि तामगी तेहन्दाला ङाहगीनी च्यिॱआङ टी़ह मा़हखु। ओ़ह सोङबे ङाहगी खोला, ‘यरूशलेमला काहल्दी ख्येती ठिम ओ़ह ग्या़लाराङ ताॱनाङ ओहङगेनी’ म़ेदी टी़हसीन। 21 यिहॱनाङ पावलगी रोमी क्याहल्बु छ्यिम्बु लाहमलेॱराङ ङाहगी ठिम ज्योर कोहकें म़ेदी माक्यो सोङबे ङाहगी रोमी क्याहल्बु छ्यिम्बु साला माहताङ थु खोला या़हबु पेहती सुङदी ज़्या़दोङ म़ेदी का तेर्ती येह।” 22 दि ताम थे़दी अग्रिपासगी फेस्तसला मासीन, “ओ़ह मिहगी ताम ङाह राहङगीराङ ङ्यिहन ङ्युहङना ओहङज्ये येहकें।” ओहले फेस्तसगी मासीन, “नाहङबारॱराङ राहङगी सेन थुप्च्ये येह।” पावल अग्रिपासगी दिनला 23 ओहले नाहङबार च्युङ अग्रिपास दाङ बरनिकी स्येर्क्या तेन्दी माक्पेन छ्यिम्बु दाङ क्याहसाकी छ्यिम्बु मिहया़ ङ्याम्बु छो़खाङ नाहङला स्य़ूहसीन, ओहले फेस्तसगी का नाङ फान्ज्यो पावलला छो़बागी दिनला ख्योङसीन। 24 ओहले फेस्तसकी मासीन, “क्याहल्बु अग्रिपास दाङ देला ज़्य़ू नाङग्यो खेम्बा ताहक्पुया़, यहूदी थाम्ज्यीगी ङाहसाला उजूर पेहक्योगी मिह दिराङ यिहम्बा। दि मिहला सेॱराङ कोहएँ म़ेदी यहूदी थाम्ज्यीगी यरूशलेम दाङ दि ग्या़ॱलाङ माक्यो येहकें। 25 खोला सेॱराङ कोहएँगी ल़ेह नोहरक्यो स्यी़हक्यो ल़ेहमुनी ङाहगी च्यिॱआङ च्य़ेह माहसीहन। ओहले खो खोराङगीराङ रोमी क्याहल्बु छ्यिम्बु साला ख्येर्तोङ म़ेदी माक्यो सुङगोराङ ङाहगी खोला रोमी क्याहल्बु छ्यिम्बु साला ताङज्येला साम्लु ताङसीन। 26 यिहॱनाङ ङाहगी रोमी क्याहल्बु छ्यिम्बुला खोगी तेहन्दाला च्यिॱआङ प्रुह मा़हखु। ओ़ह सोङबे ङाहगी खोला राहङ फे़बेया़गी दिनला तेहम्बाराङ माज्ये माना क्याहल्बु अग्रिपासगी दिनला ख्योङज्ये सेम पेहक्यो यिहम्बा। राहङ फे़बेया़गी दि तामकी तेहन्दाला ताम टी़हदाप जे नाङसीमानानी ङाहला प्रुहज्ये ताम ज्योर्केनी म़ेदी रेहवा पेहती येहबा। 27 च्यिबेमाना खोगी ङ्य़ेहबा क्यी़ह माहन्ज्योर थु खोला स्युहङ-पेन छ्यिम्बु कैसर साला ताङज्येला ङाहला या़हबु मा़हने।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.