२ थेसलोनिकी 1 - ह्योल्मो1 पावल, सिलास, दाङ तिमोथी लाहमले, किन्ज्यो ओहराङगी याहप दाङ चो़वो येशू मास्यीकाकी थेसलोनिकीया़की छेन्छोकला: 2 किन्ज्यो याहप दाङ चो़वो येशू मास्यीकागी ख्याया़ला काटीन दाङ स्य़िहदे नाङज्यु। पावलगी किन्ज्योला थुज्यी-छ्ये़ फुल्ग्यो 3 आदा-नो़ह दाङ आज्यी-नुहमुया़, ख्याया़गी तेहन्दाला नाहम्माॱनाङ ङ्यिहगी किन्ज्योला थुज्यी-छ्ये़ फुलॱराङ कोहएँ। ओहले ओ़ह ल़ेहमु पेहक्योदी या़हबु यिहम्बा च्यिबेमाना ख्या फे़बे मे़हमेया़की तेहपा माहङरो माहङरो पेहती काहल्दी येह। ओहले ख्या राहङ नाङदोङगी चेवाॱआङ जेन-जेन माहङरो माहङरो पेहती डोॱराङ येह। किन्ज्योगी जे नाङगेन्गी ठिम 4 ओ़ह सोङबे काहन्डुमु तुहक्पु दाङ हाल्ग्यीया़ ओहङॱनाङ ख्या फ़ेबे-म़ेहमेॱया थिर जेती किन्ज्योला तेहपा पेहती ज़्य़ू नाङसीन, दिगी तेहन्दाला किन्ज्योगी छेन्छोकया़की पाहरक्यीला ङ्यिह छ्य़ेन्दो तेन्दी ताम मा ख़ूएँ। 5 किन्ज्योकी टाहङबु ठिमकी दास्यी दिराङ यिहम्बा ख्या फ़ेबे-म़ेहमेॱया किन्ज्योगी क्याहल्सीला स्य़ूहज्येला सी़ह ख़ूज्यु, ओ़हगी तेहन्दाला ख्या नाहरे तुहक्पु खुर्केॱराङ येहबा। 6 ओहराङगी किन्ज्यो ठिम जेनाङगेन्गीकी किन्ज्यो यिहम्बा, ख्या फ़ेबे-म़ेहमेया़ला तुहक्पु तेर्केनया़ला मिहरोगीॱराङ ङ्य़ेहबा काल नाङज्ये येह। 7 ओहले ख्या तुहक्पु ङ्युहङगेनया़ला ङ्यिह ङ्याम्बुराङ मिहरोगी थाङ सो च्य़ू नाङज्ये येह। ओहले दि थाम्ज्यी मिहरोगी चो़वो येशू ओङ छ्यिम्बुकी स्यिहङगामकी स्याहप्च्यीया़ ङ्याम्बु स्यिहङगामले माहर फेप नाङगेमु जे नाङज्ये येह। 8 ओहले किन्ज्योला ङोह मे़हस्येगेया़ दाङ ओहराङकी चो़वो येशूकी या़हबु लेहङगु मिहङ्यीहन्गेनया़ला मिहरोगी मेहबुङ नाहङला फेप्ती ङ्य़ेहबा काल नाङज्ये येह। 9 ओहले खुङया़ला था़ म़ेहबा तोङदी डोएँगी ङ्य़ेहबा फो़ज्ये येह, ओहले चो़वो ङ्याम्बुकी छोक्पा दाङ मिहरोकी ओङ छ्यिम्बु ज़िज्यिद लाहमले खा फ़ेदी तेह कोहच्ये येह। 10 ओ़ह ङ्यिहमाला चो़वो येशूगी राहङगी नाम्पार-ताहक्पा मिहया़ लाहमले ज़िज्यिद नोम नाङज्ये येह ओहले यिह छ्य़ेगेया़ थाम्ज्यीलाराङ ह्अ ल़ेह च्य़ू नाङज्येला मिहरो फेप नाङज्ये येह ओहजेला राहङ फे़बे-मे़हमेया़ॱआङ ओ़हला ओहङज्ये येह, च्यिबेमाना ङ्यिहगी तामला ख्या फ़ेबे-म़ेहमेया़गी यिह-छ्य़े जे नाङसीन। 11 ओ़ह सोङबे किन्ज्योगी का़हन्दी मिहलीगी तेहन्दाला ख्या फ़ेबे-म़ेहमेया़ला क़े क्याहप नाङग्यो यिहम्बा, ओ़ह मिहलीला ते़बे राहङगी मिहजी ताङज्येला सी़हएँगी मिहया़ ज़ो नाङज्यु ओहले राहङ फ़ेबे-म़ेहमेया़गी सेमला या़हबु ऩेक्योगी थाम्ज्यीराङ से़हया़ दाङ तेहपागी छ्या़लेया़ किन्ज्योकी ओङगी जेतीॱराङ तेहन्दा डुप च्य़ू नाङज्यु। 12 ओ़ह ल़ेहमु डोसीमाना ओहराङगी किन्ज्यो दाङ चो़वो येशू मास्यीकाकी काटीन लाहमले चो़वो येशूकी छेनला चा़ ओहङज्ये येह ओहले मिहरो लाहमले ख्या फे़बे-मे़हमेया़दीॱआङ चा़ ओहङज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.