२ कोरिन्थी 8 - ह्योल्मोसेम तिहङ यिहन्ज्युराङ तेर्च्येला आ़र क्ये च्य़ूक्यो 1 आदा-नो़ह दाङ आज्यी-नुहमुया़, माकेडोनियाकी छेन्छोकया़ला किन्ज्योगी नाङग्यो काटीनगी तेहन्दाला ङ्यिह ख्याया़ला माएँ। 2 ज्यिबुराङ तुहक्पुगी ती़हजीॱलाङ खुङया़गी सेम काहसो पेहसीन ओहले प्राङबु येहॱनाङ खुङया़गी सेम ज़ाङबु पेहती डेल्बा फुल्सीन। 3 च्यिबेमाना ङाह खुङया़गी तेहन्दाला माएँ, खुङया़गी राहङगी ला़ खाएँ दाङ ला़ खाएँ म़ेदीॱआङ माहङबु पेहती राहङदी सेमला ने़जेबा तेर्सीन। 4 खुङया़गी “यरूशलेमगी किन्ज्योगी पुह पोहमोया़ला रो़हराम पेहच्येला ङ्यिहया़लाॱआङ लोहङ नाङदोङ” म़ेदी ङ्यिहला माहङबुराङ ओहर-छ्य़े स्युहसीन। 5 ङ्यिहगी रेहवा पेहक्यो म़ेदीॱआङ माहङबु खुङया़गी पेहसीन, यिहॱनाङ खुङया़गी तोहङस्यो राहङला चो़वोला चि क्याहप्सीन, ओहले किन्ज्योगी थु ङ्य़ेबु राहङला ङ्यिहगी लाहक्पाला चि क्याहप्सीन। 6 ओ़ह सोङबे तोहङस्यो दि ल़ेह तीतसगी छ़ूक्यो सोङबे ख्याया़गी पाहरक्यीॱलाङ ओ़ह ल़ेह छाङबु पेहच्यु म़ेदी ङ्यिहगी खोला ओहर-छ्य़े स्युहसीन। 7 ख्याया़ थाम्ज्यीराङ से़हया़ला माहङरो माहङरो पेहती काहल्दी येह– पे यिहॱना़: तेहपाला, लोप्च्युङला, येहन्देनला, मिहया़ला रो़हराम पेहच्येला ओहले ङ्यिह ङो़ले येहकेन्गी ख्याया़गी निङज्यीला, ओ़हठीॱराङ पेहती ख्याया़ दि या़हबु ल़ेहया़लाॱआङ याहरक्यी पेहती सोङ। 8 ङाहगी दि ख्याया़ला पेहॱराङ कोहएँ म़ेदी का तेरक्यो मिहम्बा, यिहॱनाङ लेहमेन छेन्छोकया़की स्युक ङ्याम्बु तुहर्ते ख्याया़गी चेवाॱआङ तेहम्बा-तेहन्सुम यिहम्बा म़ेदी दास्यी तेर्च्येला ङाहगी दि माक्यो यिहम्बा। 9 च्यिबेमाना ओहराङ चो़वो येशू मास्यीकागी काटीन ख्याया़ला क्यी़हराङ येह। मिहरो छ्युक्पु येहकें यिहॱनाङ ख्याया़गी तेहन्दाला मिहरो प्राङबु काहल्सीन च्यिबेमाना मिहरो प्राङबु काहल्दे ख्याया़ छ्युक्पु डो ख़ूज्यु म़ेदी यिहम्बा। 10 ता़ह ङाह ख्याया़ला दिगी तेहन्दाला लोप्ताम च्यी़ क्याहप्को येह– नाहनीङ यिहन्ज्यु तेर्च्ये छ़ूक्योगी दि ल़ेह ता़ह ख्यागी छाङबु पेहतोङ च्यिबेमाना दि तेर्केन्की ल़ेह तोहङस्यो ख्याया़गीॱराङ छ़ूक्यो येहकें ओहले दि तेर्च्येला सेम्बा पेहकेन्दीॱआङ ख्याया़राङ यिहन। 11 ओ़ह ती़हजीला ख्यागी तेर्केन्गी सेम्बा ज्यिबुराङ छ्यिम्बु येहकें ओ़हला ते़बे राहङगी ला़ खाएँ तेर्ती ता़ह दि ल़ेहला छाङबु पेहतोङ। 12 च्यिबेमाना ख्याया़गी तेर्केन्गी सेम छ्यिम्बु येहसीमाना ख्याया़ ङ्याम्बु च्यि येहबा ओ़ह लाहमलेॱराङ किन्ज्योगी नोम नाङगे, यिहॱनाङ ख्याया़ ङ्याम्बु म़ेहबा से़हया़ किन्ज्योगी नोम मेहनाङगे। 13 ख्याया़ला खुर्पु काल्दी लेहमेनया़लादी याहङदी ओहङज्यु म़ेदी ङाहगी दि माक्यो मिहम्बा। 14 यिहॱनाङ थाम्ज्यीला ङ्याम्बा ओहङज्यु म़ेदी दि ताहन्दागी ती़हजीला ख्याया़ ङ्याम्बु येहकेन्गी बोल्बु लाहमले खुङया़गी कोहपुया़ छाङबु डो ख़ूज्यु, ओ़हठीॱराङ पेहती खुङया़गी बोल्बु लाहमले ख्याया़गी कोहपु छाङबु पेह तेर्च्यु। दि ल़ेहमु पेहती ख्या थाम्ज्यी ङ्याम्बा ओहङज्ये येह। 15 छ्य़ेला दि ल़ेहमु प्रुहक्यो येहबा, “माहङबु तुहएँदीला माहङबुॱआङ माहकाहल, ओहले ङ्युहङा तुहएँदीला ङ्युहङसे़ॱआङ माहकाहल।” तीतस कोरिन्थला 16 ख्याया़गी तेहन्दाला किन्ज्योगी तीतसगी सेमला ङाहती ल़ेहमुराङ सेम ज़्या़ नाङसीन। दिगी तेहन्दाला ङाह किन्ज्योला थुज्यी-छ्ये़ फुल्गे। 17 च्यिबेमाना खोगी ङ्यिहती तामला ङ्यिहन्ग्यो च्यी़राङ मिहम्बा, यिहॱनाङ खो राहङगीॱराङ सेम्बागी ज्यिबुराङ क़ेहनाङ पेहती ख्याया़साला ओहङग्यो यिहम्बा। 18 या़हबु लेहङगु स्येच्येला थाम्ज्यी छेन्छोकया़गी पाहरक्यीला मिहन छ्यिम्बु थोप्क्यो नो़ह च्यी़ॱलाङ ङ्यिह खो ङ्याम्बुराङ ताङगो येहबा। 19 ओहजे च्यी़राङ मिहम्बा, ङ्यिहगी तुहक्यो डेल्बा ख्येर्ती ङ्यिह ङ्याम्बुराङ यरूशलेमला डोज्येला छेन्छोकगी खोला दाम्ग्यो यिहम्बा। ङ्यिहगी दि ल़ेहमु चेवाकी ल़ेह पेहकेमु चो़वोकी ज़िज्यिद ओहङगे ओहले लेहमेनला रो़हराम पेहकेन्की सेम्बा ङ्यिह ङ्याम्बु दु म़ेदी मिहया़गी क्यी़ह ज्योर्च्ये येह। 20 सेम ज़ाङबु पेहती तेरक्योगी दि डेल्बा चा़ल्ती़एँमु ओ़हगी तेहन्दाला सुज्यीगीॱआङ ङ्यिहला क्येन माहता़ज्यु म़ेदी ङ्यिह या़हबु पेहती चाल ती़उ येह। 21 च्यिबेमाना ङ्यिह चो़वोगी ज़ी़लुला च्यी़राङ मिहम्बा, यिहॱनाङ मिहया़गी थोङदाङलाॱआङ च्यि पे सी़हगेन्दी येहबा ओ़ह पेहकेन्दी ङ्यिहती सेम्बा यिहम्बा। 22 ओहले खुङ ङ्याम्बु ङ्यिहती लेहमेन नो़ह च्यी़ॱलाङ ताङगेराङ येहबा, खोला ङ्यिहगी लेहमा माहङबुराङ ङ्याहम च्येती रेबेॱराङ तामला स्युक क्येक्यो थोङसीन। ख्या ङ्याम्बु येहकेन्गी खोती यिह-छ्य़े छ्यिम्बुगी पेहती खो तोहरोङ माहङबु स्युक काहल्दी येहबा। 23 तीतसती ङाहती रो़ह यिहम्बा ओहले ख्याया़ला स्याहप्तो स्य़ूहज्येला खोॱआङ ङ्यिह ङ्याम्बु-ङ्याम्बुराङ ल़ेह पेहको येहबा, ओहले खो ङ्याम्बु ओहङगेन्गी लेहमेन नो़हया़ला छेन्छोकया़गी ताङग्यो स्याहप्च्यी यिहम्बा ओहले खुङ मास्यीकाकी ज़िज्यिद यिहम्बा। 24 ख्यागी खुङया़ला राहङगी चेवा पेहक्योकी दास्यी तेर्तोङ ओहले ङ्यिहगी च्यिबे खुङया़गी तेहन्दाला छ्य़ेन्दो तेन्ग्यो दुबा माएँ ताम छेन्छोकगी थोङज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.