१ पत्रुस 2 - ह्योल्मोसोम्बो तोह-पा़रा दाङ नाम्पार-ताहक्पा क्यिहपा 1 ओ़ह सोङबे ख्यागी ना थाम्ज्यीगी ल़ेह चोक्पाया़ क्युर्तोङ, चिहन माहक्याहप, यिहन्दो माहतेन, ठादो माहतेन ओहले मिह ताम च्येहकेन्गी तामया़ माहलाप। 2 थेरेरे क्येक्योगी पेहजा ओहमा थुङज्ये म़ेदी ङुहक्यो ल़ेहमुराङ ख्याया़ॱआङ किन्ज्योकी तेहन्दामगी सुङया़ ङोह स्येच्येला सेम ताङदोङ दि लाहमलेॱराङ ख्यागी ज्योरक्योकी थार्पाला ख्या जेन-जेन याहरक्यी पेहती डो ख़ूज्ये येह। 3 च्यिबेमाना चो़वो थुज्यी ज़ी़ नाङगेन्गी चो़वो यिहम्बा म़ेदीनी ख्यागी प्रे़ह ङ्याम सिहन्दी येह। 4 चो़वो साला स्यो। मिहरोनी सोम्बो तोह-पा़रा यिहम्बा। मिहया़गी मिहरोला मा-लोक पेहक्यो येहकें, यिहॱनाङ किन्ज्योगी ज़ी़लुलानी मिहरो दाम नाङग्यो दाङ ज्यिबुराङ चा़ छ्यिम्बु ज़्य़ू नाङदी येह। 5 ख्याया़ॱआङ येशू मास्यीका लाहमले किन्ज्योकी ज़ी़लुला सी़ह ख़ूएँगी यिहक्तेन मार्च्ये फुल्गेन्गी नाम्पार-ताहक्पा पूजाहारीगी तेहन्दाला सोम्बो तोह-पा़रा ल़ेहमुराङ राहङला यिहक्तेन खाङबा ज़ो नाङगेराङ येहबा। 6 च्यिबेमाना सुङरापला दि ल़ेहमु सुङदी येहबा, “त़ेदोङ, ङाहगी दाम्ग्यो दाङ रिहन माहङबु डोएँगी सुहर-तोह सियोनला ज़्या़दी येह। ओहले का़हन्दीगी मिहरोला यिह छ्य़ेगे खो नाहमॱआङ ङोहजाला छ्यिच्ये म़ेह।” 7 ओ़ह सोङबे ख्याया़ का़हन्दीगी यिह छ्य़ेगे खुङया़गी तेहन्दाला मिहरो माहङबुराङ चा़ छ्यिम्बु येह, यिहॱनाङ यिह मे़हछ्येगेया़गी तेहन्दालानी, “का़हन्दी तोह खाङबा ज़ोएँ चिक्सो-खे़बाया़गी फेन मे़हथोएँ म़ेदी क्युर चाहङग्यो येहकें ताहन्दा ओ़ह तोहॱराङ चिक्पाकी थाम्ज्यी म़ेदी चा़ छ्यिम्बु सुहर-तोह काहल्सीन।” 8 छ्य़ेगी सुङ नाङगे, “तोह च्यी़, का़हन्दीगी मिहया़ला नार्तो क्याहप च्य़ूगे, तोह-पा़रा च्यी़, का़हन्दीगी खुङया़ला रिहल च्य़ूगे।” च्यिबेमाना खुङ लुहङला मी़हचीएँ ओहले रिहल्गे। दि केच्या खुङया़गी तेहन्दाला किन्ज्योगी राहङगी थुला तोहङलेराङ ठुङ सिहन्दी येहकें। 9 यिहॱनाङ ख्याया़नी दाम्ग्योगी मिहया़, क्याहल्बुला स्याहप्तो स्युहएँगी पूजाहारी, नाम्पार-ताहक्पा क्यिहपाया़, किन्ज्योगी राहङदीराङ मिहया़ यिहम्बा। मिहरोगी ख्याया़ला ना़-जुबेलेगी याहम्जेन छ्येवा जेती क्या-साङेला नोम फेन नाङसीन च्यिबेमाना ख्याया़गी किन्ज्योकी याहम्जेन छ्येवागी छ्या़लेया़ मिहया़ला स्युक छ्यिम्बु पेहती स्ये ख़ूज्यु म़ेदी यिहम्बा। 10 तोहङलेनी ख्याया़ किन्ज्योकी मिहया़ मिहम्बा यिहन्गे, यिहॱनाङ ताहन्दानी ख्याया़ किन्ज्योगी मिहया़ काहल्दी येह। तोहङले ख्याया़गी किन्ज्योकी थुज्यी ज्योर्ती म़ेहबा येहकें, यिहॱनाङ ताहन्दा ख्याया़गी किन्ज्योकी थुज्यी ज्योर्ती येह। किन्ज्योला स्याहप्तो स्युहएँगी मिहया़ 11 ए ङाहगी च्याहम्बु रो़हया़, दि जाम्बुलीङला ख्या छ्यि-क्याहपा मिहया़ दाङ फि क्याहल-खापला तेहकेन्गी मिहया़ ल़ेहमुराङ यिहम्बा। ङाह ख्याया़ला ओहर-छ्य़े स्युह येहबा, ज़ुबुगी लाङ माएँगी यिहन्जे मिहन्जे से़हया़ छाङबु पेहच्ये माहछोल। दि ल़ेहमु यिहन्जे मिहन्जे ज़ुबुकी सेम्बाया़गी नाहम-माना नाम्स्यीला टाह पेहती मा़ क्याहप्के। 12 किन्ज्योला यिह-छ्य़े माहबेबाकी मिहया़गी पाहरक्यीला ख्याया़गी डोलु-तेहलु या़हबु ओहङज्यु। सुज्यीगीॱआङ ख्याया़ला मिह चोक्पा म़ेदी ख्याला टाह पेहसीनमाॱनाङ खुङया़गी ख्यागी पेहक्योगी ल़ेह या़हबुया़ थोङज्यु, ओहले किन्ज्योगी ठिम ताङ नाङगेन ङ्यिहमाला खुङया़गी किन्ज्योला त़ेरा तेच्या फुल्ज्यु। 13 चो़वोकी तेहन्दाला, मिह थाम्ज्यी ठिम-पेन दाङ चा़ छ्यिम्बु क्याहल्बुया़ 14 ओहले स्युहङ-पेनया़गी ओङ चो़ला ज्युल्दी तेहतोङ। खुङ, ल़ेह ङ्येहम्बा पेहकेनया़ला ङ्य़ेहबा काल्ज्येला ओहले ल़ेह या़हबु पेहकेनया़ला चा पेहच्येला किन्ज्यो लाहमले ताङ नाङग्योगी मिहया़ यिहम्बा। 15 च्यिबेमाना उल्दुम्बा मिहया़गी ङोह मा़हस्येबा पेहती माक्यो तामया़ ख्यागी पेहक्योगी या़हबु ल़ेहया़ लाहमलेॱराङ खुङया़ला खाजुम तेहच्यु ख़ू कोहएँ म़ेदी किन्ज्योकी थु-सेम जे नाङगे यिहम्बा। 16 राहङवाङ मिहया़गी ल़ेहमुराङ राहङगी मिहजी ताङदोङ, यिहॱनाङ राहङ राहङवाङ येह म़ेदी चोक्पा ल़ेहया़दी माहबे। बरु किन्ज्योकी योक्पुया़ ल़ेहमु पेहती राहङगी मिहजी ताङदोङ। 17 मिह थाम्ज्यी आदा-नो़हया़ला ची़नाङ पेहतोङ। यिह-छ्य़ेबाया़ला चेवा पेहतोङ। किन्ज्योकी ज्यिक्पा खुर्तोङ। क्याहल्बुला ची़नाङ पेहतोङ। तुहक्पु खुर्च्येला मास्यीकाकी पे त़ेदोङ 18 योक्पु-यो़मुया़, राहङ ताहक्पुया़ला ची़नाङ पेहती खुङया़गी ओङ चो़ला ज्युल्दी तेहतोङ। ख्याया़ला चेवा पेहकें दाङ खा साल्बु पेहती ताम माएँ ताहक्पुया़दी च्यी़राङ ओङ चो़ला ज्युल्दी तेहकें मिहम्बा, यिहॱनाङ ताहक्पु ठोक्पुया़ॱलाङ ची़नाङ पेहतोङ। 19 ख्याया़गी ल़ेह नोहरक्यो स्यी़हक्यो च्यिॱआङ माहबेबाॱलाङ ख्यागी किन्ज्योला टेहम्बा साल्दी तुहक्पु ना़सीमाना किन्ज्योगी ख्याला थुज्यी ज़ी़ नाङज्ये येह। 20 च्यिबेमाना ख्याया़गी ल़ेह चोक्पा पेहती तुहङदा साहएँमु ना़स्यीङ छ्यिम्बु पेहती तुहङदा साहसीन माना ओ़हला छ्यिम्बु ताम च्यि येहबा ले? यिहॱनाङ ख्याया़गी ल़ेह या़हबु पेहतीॱआङ तुहक्पु खुर कोहकेमु ना़स्यीङ छ्यिम्बु पेहती तुहक्पु ना़सीन माना ओ़ह किन्ज्योगी ज़ी़लुला यिह-छ्य़ेबु ओहङगे, 21 च्यिबेमाना दिगी तेहन्दालाराङ ख्याया़ला क़े क्याहप नाङग्यो यिहम्बा। मास्यीकागीॱआङ ख्याया़गी तेहन्दाला तुहक्पु खुर नाङसीन, ओहले ख्याया़गी तेहन्दाला पे च्यी़ तेन नाङसीन, ओ़ह सोङबे ख्याया़ मिहरोगी फेप-लाहमलाॱराङ डोएँ कोहएँ। 22 “मास्यीकाकी तिहक्पाया़ च्यिॱआङ जे माहनाङ, ओहले मास्यीकाकी स्याहललेगी चिहन क्याहप्केन्गी स्याहलया़ नाहमॱआङ सुङ माहनाङ।” 23 खुङया़गी मास्यीकाला स्ये़हन्डील पेहकेमुॱआङ मिहरोगी खुङला च्यिॱआङ ल़ेहन क्याहप माहनाङ। तुहक्पु खुर नाङगेमु मास्यीकागी खुङला क्यिम्बा च्याल्गेन्की ज्यी़-ङोर तेन माहनाङ। यिहॱनाङ सुलाॱआङ ङ्येम्बा-ङ्य़ेहरी जे माहनाङबा जेती ठिम ताङ नाङगेन किन्ज्यो थो़लाराङ मास्यीकागी म़ेहबा जे नाङसीन। 24 तिहक्पाकी ल़ेहया़ क्युर्ती ओहराङगी किन्ज्योकी थु ङ्ये़बाकी मिहजी ताङ ख़ूज्यु म़ेदी मास्यीकागी ओहराङगी तिहक्पाया़ राहङगी कुसोला खुर्ती क्याहङस्यीङला टोहङ नाङसीन। 25 च्यिबेमाना ख्या ल़ूहया़ ल़ेहमुराङ पेहती आला ख्याम्दी येहकें, यिहॱनाङ ता़ह ख्याया़गी नाम्स्यीला कोहरोवा जे नाङगे दाङ सुङ नाङगे साला ख्याया़ लो़ह ओहङदी येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.