१ कोरिन्थी 7 - ह्योल्मोपा़हमाकी तेहन्दाला 1 ता़हनी ङाह ख्याया़गी प्रुहक्योकी तामकी तेहन्दाला माउ येह। पा़हमा माहबेबा पेहती तेहक्योॱराङ या़हबु यिहम्बा। 2 यिहॱनाङ छ्येउ-छ्येंमुगी तेहन्दाला लेहमेन माहङबुराङ ङ्याहम्छेया़ येहकें सोङबे रेबेॱराङ क्येप-ख्योवाया़दी राहङदीराङ पी़हमी ओहले पी़हमी पेहजाया़दीॱआङ राहङदीराङ ख्योवा ओहङज्यु। 3 ओहले ख्योवा राहङगी पी़हमी ङ्याम्बु ङ्याहल कोहएँ। ओ़ह ल़ेहमुराङ पेहती पी़हमीॱआङ राहङगी ख्योवा ङ्याम्बु ङ्याल कोहएँ। दि पा़हमा लाहमले ज्योरक्योकी ओङ यिहम्बा दिगी तेहन्दाला च्यी़गी च्यी़ला मा-लोक पेहच्ये मेहयोहङगे। 4 पी़हमीगी राहङगी ज़ुबु ता़ह यिहन्ज्यु तिङ थु मोहती मिहम्बा ओ़ह ख्योवाती ओहङगे। ओ़ह ल़ेहमुराङ पेहती ख्योवाती ज़ुबुॱआङ ता़ह खोती मिहम्बा ओ़ह पी़हमीती ओहङगे। 5 च्यी़गी च्यी़ला मा-लोक माहबे। ङ्यिहमा तोबाज्यीगी तेहन्दाला टे़ह क्याहप्ती सोल्वाङ ताप्च्येला खा फ़ेदी तेहॱनाङ लेहमेन ती़हजीलाती ङ्याम्बुराङ तेहच्यु। मिहन्सीमाना ख्याया़गी सेम ज़ुङ मी़हखुरो ओहले ती़ह गो-छ्येवागी ख्याला तिहक्पाला छ्यि च्य़ूज्येला लोहङ ज्योर्च्ये येह। 6 दि ङाहगी ख्याला पेहॱराङ कोहएँ म़ेदी उर्चु पेहती माक्यो मिहम्बा दिनी ङाहगी ख्याला लोप्ताम च्यी़राङ क्याहप्क्यो यिहम्बा। 7 यिहन्ज्येनी मिह थाम्ज्यीराङ ङाह ल़ेहमु पा़हमा माहबेबा पेहती तेहच्यु माएँ ङाहती सेम्बा येह। यिहॱनाङ मिह थाम्ज्यीगी किन्ज्यो लाहमले नामे नाजो काबापया़ ज्योर्ती येहबा। च्यी़ ङ्याम्बु ना च्यी़गी काबाप येहबा मासीमाना लेहमेन ङ्याम्बु लेहमेनॱराङ काबाप येहबा। 8 यिहॱनाङ ताहन्दा पा़हमा माहबेबा दाङ ह्युग्मोया़ला ङाह माएँ, ख्याया़ ङाह ल़ेहमुराङ पा़हमा माहबेबा पेहती तेह ख़ूसीमाना ख्याया़गी तेहन्दाला ओ़ह ज्यिबुराङ या़हबु यिहम्बा। 9 यिहॱनाङ का़हलेॱआङ सेम ज़ुङ मी़हखुसीमानानी पा़हमाराङ पेहतोङ। च्यिबेमाना राहङ सेम ज़ुङ मा़हखुबा पेहती तिहक्पा पेहकें म़ेदीनी पा़हमा पेहकेन्दीराङ या़हबु यिहम्बा। 10 ता़ह ङाह पा़हमा पेह सिहन्ग्योया़ला दि का तेर्के (दि ङाहती का मिहम्बा, दि चो़वोगी का यिहम्बा) पी़हमीगी ख्योवाला मा़हक्युरच्यु। 11 यिहॱनाङ का़हलेॱआङ खाॱराङ फ़ेदी तेहसीमाना मोहगी पा़हमा माहबेच्यु, तोहरोङ राहङगी ख्योवा ङ्याम्बु येहपाराङ डी़दे तेहच्यु। ख्योवागी राहङगी पी़हमीला मा़हक्युरच्यु। 12 यिहॱनाङ ङाह ख्याया़ला माएँ दि ङाहगी ताम यिहम्बा, चो़वोदी मिहन, का़हलेॱआङ किन्ज्योला यिह-छ्य़े पेहक्यो नो़हदी किन्ज्योला यिह-छ्य़े माहबेबाकी पी़हमी येहना ओहले मोह खो ङ्याम्बुराङ तेहच्ये सेम पेहसीनमाना खोगी पी़हमीला मा़हक्युरच्यु। 13 का़हलेॱआङ किन्ज्योला यिह-छ्य़े पेहक्यो पी़हमीती किन्ज्योला यिह-छ्य़े माहबेबाकी ख्योवा येहना, ओहले खो मोह ङ्याम्बुराङ तेहच्ये सेम पेहसीमाना, मोहगी खोला मा़हक्युरच्यु। 14 च्यिबेमाना किन्ज्योला यिह-छ्य़े माहबेबाकी ख्योवा राहङगी पी़हमी लाहमले नाम्पार-ताहक्पा ओहङगे, ओहले किन्ज्योला यिह-छ्य़े माहबेबाकी पी़हमी राहङगी ख्योवा लाहमले नाम्पार-ताहक्पा ओहङगे, मिहन्सीमानानी खुङगी पुह पोहमोया़ मेहचाङा ओहङज्ये येह। यिहॱनाङ खुङया़नी नाम्पार-ताहक्पा काहल्दी येह। 15 यिहॱनाङ किन्ज्योला यिह-छ्य़े मेहबेकें ख्योवागी यिहॱनाङ पी़हमीगी यिहॱनाङ खा फ़ेगे सेम पेहसीनमाॱनाङ खा फ़ेज्यु। ओ़ह ती़हजी यिहन्ज्यु किन्ज्योला यिह-छ्य़े पेहकें ख्योवा यिहॱनाङ पी़हमी यिहॱनाङ राहङवाङ ओहङज्ये येह। च्यिबेमाना किन्ज्योगी ओहराङला सेम लो तेहमु पेहती तेहच्येला क़े क्याहप नाङग्यो यिहम्बा। 16 ए पी़हमी, ख्येला च्यि क्यी़ह! का़हलेॱआङ ख्येगी राहङगी ख्योवाला थार च्य़ू ख़ूएँ गा यिहम्बानी? ए ख्योवा, ख्येला च्यि क्यी़ह! का़हलेॱआङ ख्येगी राहङगी पी़हमीला थार च्य़ू ख़ूएँ गा यिहम्बानी? 17 चो़वोगी ख्या रे़ह-रे़हला काह-ठि मिहली दाङ छ्या़ला क़े क्याहप नाङग्यो यिहम्बा, ओ़हला ते़बे राहङगी डोलु-तेहलु पेहतोङ। थाम्ज्यी छेन्छोकया़गी तेहन्दाला दि ङाहती ठिम यिहम्बा। 18 सुज्यीला किन्ज्योगी क़े क्याहप नाङगेमु खोती तोहङलेराङ स्या-ताक काहल सिहन्ग्यो यिहन्सीमानानी ता़ह खोगी स्या-ताक सेच्ये माहछोल्ज्यु। ओहले किन्ज्योगी स्या-ताक माहबेबा सुज्यीला क़े क्याहप नाङग्यो येहसीमानानी ता़ह खोगी स्या-ताक पेहच्ये माहछोल्ज्यु। 19 च्यिबेमाना स्या-ताक पेहकें दाङ स्या-ताक मेहपेहकेला च्यिॱआङ ख्येपार म़ेह, यिहॱनाङ किन्ज्योगी का ङ्यिहन्गेन्दी थाम्ज्यी म़ेदी चा़ छ्यिम्बु यिहम्बा। 20 काह-ठि छ्याला किन्ज्योगी मिहया़ला क़े क्याहप नाङग्यो यिहम्बा, ओ़ह छ्यालाराङ मिहया़ तेहच्यु। 21 किन्ज्योगी क़े क्याहप नाङगेमु च्यि ख्ये लाबु येहकें? का़हलेॱआङ येहकें येहसीमाना ख्ये ओ़हगी तेहन्दाला मा-फाम्बु माहबे, यिहॱनाङ राहङवाङ डो ख़ूएँ यिहन्सीमाना ओ़हगी खेप्साङ लेहन्दोङ। 22 च्यिबेमाना किन्ज्योगी क़े क्याहप नाङगेमु का़हन्दी मिह लाबु येहकें, ता़ह खो चो़वोला राहङवाङ काहल्दी येह। ओ़हठीॱराङ पेहती किन्ज्योगी क़े क्याहप नाङग्यो ती़हजीला का़हन्दी मिह राहङवाङ येहकें, ता़ह खो मास्यीकाकी लाबु काहल्दी येह। 23 ख्याया़ला रिहन च्याल्दी ङ्योक्यो यिहम्बा ओ़ह सोङबे ख्याया़ सुज्यीदीॱआङ लाबु माहबे। 24 ओ़ह सोङबे आदा-नो़ह दाङ आज्यी-नुहमुया़, किन्ज्योगी ख्याया़ला काह-ठि छ्याला क़े क्याहप नाङग्यो यिहम्बा, ओ़ह छ्यालाराङ ख्याया़ किन्ज्योला क्याप्ती तेहतोङ। 25 ता़ह पा़हमा माहबेबाकी पोहमो स्यार्मा याहङबाया़की तेहन्दाला चो़वोकी का ङाह ङ्याम्बु म़ेह। यिहॱनाङ चो़वोगी काटीन लाहमले किन्ज्योगी ज़ी़लुला ङाह यिह छ्य़ेक्यो सोङबे ङाह ख्याया़ला लोप्ताम क्याहप्को येह। 26 ताहन्दाकी तुहक्पुला ताएँमुनी ख्या ताहन्दा काह-ठि छ्याला येहबा ओ़हठीॱराङ छ्याला तेहसीमाना या़हबु ओहङडो म़ेदी ङाहला ने़उ दु। 27 च्यि ख्येगी पा़हमा पेहक्यो येहबा? ओ़हठी यिहन्सीमाना राहङ पी़हमी ङ्याम्बु खा फ़ेज्ये माहछोल। च्यि ख्येगी पा़हमा पेहक्यो म़ेहबा? ओ़हठी यिहन्सीमाना ता़ह पा़हमा पेहच्ये माहछोल। 28 यिहॱनाङ ख्येगी पा़हमा पेहॱनाङ ओ़ह तिहक्पानी मिहन। पा़हमा माहबेबा पोहमो स्यार्मा याहङबागी पा़हमा पेहकेमु मोहगी तिहक्पा पेहक्यो मेहयोहङगे। यिहन्दी सुङनाङ पा़हमा पेहकेनया़गी दि मिहलीला तुहक्पु खुर कोहच्ये येह, ओ़ह सोङबे ङाहगी ख्याला दि तुहक्पुले थार च्य़ूज्ये छोल्ग्यो यिहम्बा। 29 आदा-नो़ह दाङ आज्यी-नुहमुया़, ङाहगी माएँ ताम देजेराङ यिहम्बा, ता़ह ती़हजी माहङबु म़ेह, ओहले ता़ह यिहन्ज्यु पी़हमी येहकेनया़ पी़हमी म़ेहबा ल़ेहमुराङ पेहती तेहच्यु। 30 तुहङाल पेहकेनया़ तुहङाल माहबेबाकी मिहया़ ल़ेहमु पेहती तेहच्यु ओहले क़ेहनाङ पेहकेनया़ क़ेहनाङ मेहबेकें मिहया़ ल़ेहमु पेहती तेहच्यु। ङ्योहप्च्या क्याहप्केया़ राहङ ङ्याम्बु च्यि से़हॱआङ म़ेहबा रोहवा पेहती तेहच्यु। 31 ओहले दि जाम्बुलीङकी क्युह-नोहर थो़ला खाम्साङ-ङ्याहम्साङ पेहकेनया़ला त़ेदी राहङॱआङ ओ़ह ल़ेहमुराङ पेहच्ये माहछोल्ज्यु ओ़हला राहङदी च्यिॱआङ च्योल्दो म़ेहबा रोहवा पेहती तेहच्यु, च्यिबेमाना जाम्बुलीङगी ताहन्दागी ती़हजी ता़ह माहङबु थु लिहच्ये म़ेह। 32 ख्या सुज्यीॱआङ तुहङाल माहबेबा पेहती तेहच्यु माएँ ङाहगी सेम येहबा। पा़हमा माहबेबा मिहगी चो़वोला काह-ठि पेहती चो़वोकी थु काहसो ज़ोज्ये म़ेदी चो़वोगी तेहन्दालाराङ तुहङाल पेहकें। 33 यिहॱनाङ पा़हमा पेहक्यो मिहगी राहङ पी़हमीला काह-ठि पेहती क़ेहनाङ लाहङ च्य़ूज्ये म़ेदी जाम्बुलीङगी से़हला तुहङाल पेहकें। 34 दि ल़ेहमु मिहगी सेम ग्या़ ङ्यी़ला ओहङगे। पा़हमा माहबेबा पी़हमी दाङ पोहमो स्यार्मा याहङबागी ज़ुबु दाङ सेम ङ्यिकालाराङ काह-ठि पेहती नाम्पार-ताहक्पा ओहङ ख़ूज्ये म़ेदी चो़वोगी तेहन्दालाराङ तुहङाल पेहकें। यिहॱनाङ पा़हमा पेहक्यो पी़हमीगीती राहङगी ख्योवाला काह-ठि पेहती क़ेहनाङ लाहङ च्य़ूज्ये म़ेदी जाम्बुलीङगी से़हला तुहङाल पेहकें। 35 दि तामगी ख्याला ठिमगी ल़ेहमु पेहती ताहम्ज्येला मिहम्बा यिहॱनाङ ख्याराङदी या़हबुकी तेहन्दाला ङाहगी माएँराङ येहबा। यिहॱनाङ ख्यागी सेम तिहङ यिहन्ज्युराङ चो़वोला क्याप्ती किन्ज्योकी थु ङ्ये़बाकी मिहजी ताङ ख़ूज्यु म़ेदी यिहम्बा। 36 का़हलेॱआङ सुज्यीदी लाङज्याङ काहल्ग्यो येहसीमाना ओहले ओ़ह मिहगी लाङज्याङ काहल्ग्यो पी़हमी ङ्याम्बु, ङ्याम्बुराङ ङ्याहल्ज्ये सेम पेहसीनमाना ओहले मोहती लोहॱआङ पा़हमा पेहच्येला काहल सिहन्ग्यो यिहन्सीमाना ओहले खुङ ङ्यी़ पा़हमा पेहच्ये सेम्बा पेहसीमाना खुङया़ला पा़हमा पेह च्य़ूदोङ। ओहले खोला तिहक्पा फो़ज्ये म़ेह। 37 यिहॱनाङ ओ़ह मिहती सेम सान्दी येहसीमाना ओहले सुतीॱआङ उर्चुला छ्यिक्यो मे़हसीमाना ओहले राहङगी सेम ज़ुङ ख़ूसीमाना राहङगी लाङज्याङ पेहक्यो पी़हमीला मेहख्योङॱनाङ डी़एँ ओ़ह खोगी ठाबेराङ पेहक्यो यिहम्बा। 38 दि ल़ेहमु पेहती का़हन्दीगी ओ़ह पोहमो स्यार्मा याहङबाला पा़हमा पेहकें, खोगी ठाबेराङ पेहक्यो यिहम्बा, यिहॱनाङ का़हन्दीगी ओ़ह पोहमो स्यार्मा याहङबाला पा़हमा मेहबेकें, खोगी तोहरोङ या़हबु पेहक्यो यिहम्बा। 39 ख्योवा येहकें थु पी़हमी राहङवाङ मेहयोहङगे। का़हलेॱआङ ख्योवा स्यिसीमाना मोह येहपाराङ राहङगी सेम थेप्क्यो मिह ङ्याम्बु पा़हमा पेह ख़ूएँ, यिहॱनाङ खोदी चो़वोला यिह-छ्य़े पेहकेन्गी मिहराङ ओहङ कोहएँ। 40 यिहॱनाङ मोहगी पा़हमा माहबेबा पेहती तेह ख़ूसीमाना मोहला तोहरोङ क्यिपु ओहङज्ये येह, दि ङाहगी नोम्साङ यिहम्बा ओहले ङाहला दि ल़ेहमु ने़उ दु ङाह ङ्याम्बु किन्ज्योगी थु ज़्य़ू नाङदी येहबा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.