१ कोरिन्थी 6 - ह्योल्मोराहङ नाहङदुगी ठू़स्यीया़ 1 ख्या नाहङला नो़ह च्यी़ लेहमेन नो़ह च्यी़ ङ्याम्बु ठुक्पा स्योर्सीमाना ठिम ताङज्येगी तेहन्दाला किन्ज्योला यिह-छ्य़े पेहक्यो मिहया़साला माहकाहल्बा पेहते च्यि किन्ज्योला यिह-छ्य़े माहबेबाकी मिहया़साला डोएँ ले? 2 मास्यीकाकी नाम्पार-ताहक्पा मिहया़गीराङ जाम्बुलीङगी ठिम ताङज्ये येह माएँ ताम च्यि ख्याला क्यी़ह म़ेहबा? जाम्बुलीङदीनी ठिम ताङगे मासीमाना च्यि ख्यादी देजे फेमा-फेमा ठुक्पाया़ डी़ च्यु मी़हखुएँ ले? 3 ङ्यिहगी स्यिहङगामकी स्याहप्च्यीॱलाङ ठिम ताङगे माएँ ताम च्यि ख्याला क्यी़ह म़ेहबा? ओ़हठी यिहन्सीमानानी च्यि दि मिहलीला ओहङगेन्की तामया़ छ्यिम्बु यिहम्बा ले? 4 ओ़ह ल़ेहमु ठुक्पाया़ ख्याया़गी पाहरक्यीला येहसीमानानी च्यिबे ख्याया़ छेन्छोकगी लोला मेहन्डोएँ मिहया़साला काहल्दी “ङाहगी ठुक्पा डी़ च्यु नाङदोङ लाह” म़ेदी ओहर-छ्य़े स्युह डोएँ? 5 दिनी ख्याया़ला ङोह छा कोहएँकी ताम यिहम्बा। ख्या नाहङदुङ ठुक्पा स्योर्केमु ठुक्पा डी़ च्य़ूगे ख्याया़गी पाहरक्यीला मास्यीकापा आदा-नो़ह च्यी़ॱआङ म़ेहबा ले? 6 यिहॱनाङ मास्यीकापा नो़ह च्यी़गी लेहमेन नो़ह च्यी़ ङ्याम्बु ठुक्पा क्याहप्ती ठिम-खाङला डोएँ, ओ़हदीॱआङ किन्ज्योला यिह-छ्य़े माहबेबाकी मिहया़गी दिनला! 7 ख्या नाहङला च्यी़गी च्यी़ला टाह पेहती खाम्ज्यु चेएँगी तामॱराङ ख्याया़ फाम्ग्यो यिहम्बा। तोहरोङ आन्याला छ्यिकेॱराङ या़हबु यिहम्बा। तोहरोङ लेहमेन मिहया़गी ख्याया़ला ठाग ती़क्योॱराङ या़हबु यिहम्बा। 8 यिहॱनाङ ख्याया़गीॱराङ आन्या पेहकु दु ओहले ठागॱआङ ती़उ दु, ओ़हदीॱआङ राहङदीराङ आदा-नो़हया़ नाहङला। 9 टाहङबु म़ेहबाकी मिहया़ स्यिहङगामकी क्याहल्सीला स्युह ङ्युहङज्ये म़ेह माएँ ताम च्यि ख्याया़ला क्यी़ह म़ेहबा? राहङगी राहङला चिहन माहक्याहप। देक्षागी बान्डन ल़ेह पेहकेनया़, कुला छ्येपा फुल्गेया़, छ्येउ-छ्येंमु पेहकेनया़, मिहगी ख्योवा दाङ पी़हमी थो़ला देक्षागी सेम च्याङगेनया़, ख्योवा पेहजा नाहङदोङ पा़हमा पेहकेनया़, 10 कुमेन क्याहप्केनया़, ह्अम्बा पेहकेनया़, छ्याङसीवाया़, ङ्याप्च्यु पेहकेनया़ ओहले च्याहक्पा पेहकेनया़ किन्ज्योगी क्याहल्सी नाहङला स्य़ूह ङ्युहङज्ये म़ेह। 11 ख्या नाहङला लाहला ओ़ह ल़ेहमुराङ येहकें, यिहॱनाङ ताहन्दा चो़वो येशू मास्यीका लाहमले ख्याया़ चाङमा दाङ नाम्पार-ताहक्पा काहल्सीन ओहले किन्ज्योकी थु लाहमले ख्याला च्यिॱआङ क्येन म़ेहबा सी़ह ख़ूसीन। 12 सुज्यीगी मारो, “ङाहगी च्यि पेहॱनाङ ओहङगे।” यिहॱनाङ थाम्ज्यी से़हगी ख्याया़ला या़हबु मेहबेएँ। ङाहगीॱआङ मा ख़ूज्ये येहकें, “ङाहगीॱआङ च्यि पेहॱनाङ ओहङगे।” यिहॱनाङ ङाह च्यि से़हगीॱआङ लाबु डोज्ये सेम म़ेह। 13 “तोप्च्या टेहपागी तेहन्दाला यिहम्बा, ओहले टेहपा तोप्च्यागी तेहन्दाला।” यिहॱनाङ किन्ज्योगी ङ्यिकालाराङ तोङ च्य़ू नाङज्ये येह। ज़ुबु छ्येउ-छ्येंमु पेहच्येगी तेहन्दाला मिहम्बा, यिहॱनाङ चो़वोकी तेहन्दाला यिहम्बा, ओहले चो़वो ज़ुबुकी तेहन्दाला यिहम्बा। 14 किन्ज्योगी राहङगी ओङगी जेती चो़वोला सोम्बो ज़्याङ च्य़ू नाङसीन, ओहले ओहराङॱलाङ मिहरोगी ओङगी जेती सोम्बो ज़ो नाङज्ये येह। 15 ख्याया़गी ज़ुबु मास्यीकाकी ओङबुया़ यिहन म़ेदी च्यि ख्याया़ला क्यी़ह म़ेहबा? ओ़हठी यिहन्सीमाना च्यि ङाह मास्यीकाकी ओङबुला ख्येर्ती बान्डनकी ओङबु ज़ोज्ये ले? दि ओहङॱराङ मी़हखुएँकी ताम यिहम्बा। 16 बान्डन साला डोएँ मिह बान्डन ङ्याम्बु ज़ुबु च्यी़राङ ओहङगे माएँ ताम च्यि ख्याया़ला क्यी़ह म़ेहबा? छ्य़ेला दि ल़ेहमु प्री़हदी येहबा, “ओ़ह ङ्यिकाराङ ज़ुबु च्यी़राङ ओहङज्ये येह।” 17 यिहॱनाङ मास्यीका ङ्याम्बु डी़गेन्दी मिहरोगी यिह ङ्याम्बु ओहराङ च्यी़राङ ओहङज्ये येह। 18 छ्येउ-छ्येंमु पेहकेन्दी क्युर्तोङ। मिहगी लेहमेन तिहक्पा च्यि पेहॱनाङ राहङगी ज़ुबु म़ेदी फिला पेहकें, यिहॱनाङ छ्येउ-छ्येंमु पेहकें मिहगी राहङदीराङ ज़ुबुला टाह पेहती तिहक्पा पेहकें। 19 च्यि ख्याया़गी ज़ुबु नाम्पार-ताहक्पा थुगी छ्योखाङ यिहम्बा म़ेदी ख्याया़ला क्यी़ह म़ेहबा? किन्ज्योगी नाङग्योकी नाम्पार-ताहक्पा थुराङ ख्याया़गी ज़ुबु नाहङला ज़्य़ू नाङगे। ओ़ह सोङबे ख्याया़ राहङॱआङ राहङदी मिहम्बा। 20 ख्याया़ला किन्ज्योगी रिहन च्याल्दी ङ्योह नाङग्यो यिहम्बा। ओ़ह सोङबे ख्याया़गी ज़ुबु लाहमले किन्ज्योला ज़िज्यिद फुल्दोङ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.