१ कोरिन्थी 4 - ह्योल्मोमास्यीकाकी ल़ेह-पेनया़ 1 दि ल़ेहमु पेहती ङ्यिहया़ला ख्यागी मास्यीकाकी लाबु दाङ किन्ज्योदी तिहङ-रिहङबुगी तेहन्दाया़ स्येच्येला चि क्याहप्क्योगी मिहया़ यिहम्बा म़ेदी ऩे कोहएँ। 2 ओहले किन्ज्योदी तिहङ-रिहङबुगी तेहन्दा स्येच्येला चि क्याहप्क्योगी मिहया़ किन्ज्योगी ज़ी़लुला यिह-छ्य़ेबु ओहङ कोहकें। 3 यिहॱनाङ ख्याया़ दाङ ठिम-खाङगी ङाहला फातुर च़ूॱनाङ ओ़हगी तुहङाल ङाहला सिपाज्यीॱआङ म़ेह, ङाह राहङॱआङ राहङदी ठिम ताङ मी़हखुएँ। 4 ङाहला च्यिरा क्येन येहबा ल़ेहमुनी ङाहला म़ेह ऩे दु यिहॱनाङ ओ़हगी ङाह नाम्पार-ताहक्पा येह म़ेदीनी दास्यी तेर मी़हखुएँ। ङाहला ठिम ताङ नाङगेनी चो़वोॱराङ यिहम्बा। 5 ओ़ह सोङबे किन्ज्योकी ठाबे जे नाङग्योकी ती़हजी म़ेदी तोहङले ठिम माहताङ, चो़वो फेप नाङगे ती़हजी थु कू़हदोङ। मिहरोगी ना़-जुबेला यिहप्ती तेहक्योकी से़हया़ क्या-साङेला नोम फेन नाङज्ये येह, ओहले मिहकी सेम नाहङकी तामया़ छ्यिसाल-नाहङसाल पेहती तेन नाङज्ये येह। ओ़ह ती़हजीला मिह थाम्ज्यीगी राहङगी ज्योर कोहएँकी स्याबास किन्ज्यो लाहमले ज्योर्च्ये येह। 6 आदा-नो़ह दाङ आज्यी-नुहमुया़, ख्याया़गी तेहन्दालाराङ ङाहगी अपोल्लोस दाङ राहङदीराङ पे तेन्दी दि थाम्ज्यीराङ प्रुहक्यो यिहम्बा, ख्यागी ङ्यिहगी पे त़ेदी नाम्पार-ताहक्पा सुङरापगी सुङ नाङग्योकी मिहली ल़ेहमु राहङगी मिहजी ताङदोङ, ओहले मेहन्दा च्यी़ ङो़ले छ्यो़ रुहप्ती लेहमेनला ङ्येन्ज्येन पेहकेन ल़ेहती या़हबु मिहम्बा। 7 च्यिबेमाना लेहमेन मिहया़ म़ेदी ख्या च्यि तामला ख्येपार काहल्बा ले? च्यि ख्या ङ्याम्बु येहकेन्की ना थाम्ज्यी किन्ज्योगीॱराङ नाङग्यो मिहम्बा ले? ओ़हठी यिहन्सीमानानी ख्या च्यिबे लेहमेन सुज्यीगी तेरक्योॱराङ मिहम्बा रोहवा पेहती छ्य़ेन्दो तेन्गे ले? 8 ख्यागी कोहएँ थाम्ज्यी से़हया़ ज्योर सिहन्दी येहबा लो? ख्या छ्युक्पु काहल सिहन्दी येहबा लो? ङ्यिह मे़हॱनाङ च्यि ख्याया़ गा क्याहल्बु काहल्बा लो? तेहम्बाराङ ख्या क्याहल्बुराङ काहल्ग्यो यिहन्सीमानानी या़हबु ओहङज्ये येहकें च्यिबेमाना ख्याया़ क्याहल्बु डोएँमु ङ्यिहया़ॱआङ क्याहल्बु डो ङ्युहङज्ये येहकें। 9 च्यिबेमाना ङाहला दि ल़ेहमु ने़उ दु, ङ्यिह ल़ेह-पेनया़लादी किन्ज्योगी थाम्ज्यी म़ेदी चो़स्यो टाहलला ज़्या़ नाङदी येहबा। किन्ज्योगीॱराङ ङ्यिहया़ला जाम्बुलीङ, स्यिहङगामकी स्याहप्च्यी दाङ मिहया़की दिनला स्यि कोहएँकी ङ्य़ेहबा फो़क्यो मिहया़ला ल़ेहमु जेती ते़मु तेन्दी ज़्या़ नाङसीन। 10 ङ्यिहनी मास्यीकाकी तेहन्दाला उल्दुम्बा काहल्दी येहबा, यिहॱनाङ ख्यानी मास्यीकाला ख्येम्बा-ताहक्पु काहल्सीन दु। ङ्यिह ङ्याम्बुनी स्युक म़ेह, यिहॱनाङ ख्या ङ्याम्बुनी स्युक छ्यिम्बु येहबा। ङ्यिहलानी का़हला माॱनाङ मिहया़गी ङ्येन्ज्येन पेहकें यिहॱनाङ ख्याया़लानी चा़ पेहकें। 11 ताहन्दा थुॱआङ ङ्यिहनी साह माहङ्युहङबा, थुङ माहङ्युहङबा पेहती टेहपा तो़बाराङ डोउ येह, काप्च्या बान्दा-बिन्दुया़ केहन्दी डोउ येह, ग्या़ ग्या़ला मिहया़गी ङ्यिहला तुहङदा तेर्के ओहले ङ्यिहती खाङसा-स्यिहङसाया़ च्यिॱआङ म़ेह। 12 ओहले साहज्ये थुङज्येगी तेहन्दाला ङ्यिह राहङदीराङ लाहक्पागी कादुप च्येती ल़ेह पेहको येह। लेहमेन मिहया़गी मे़मु क्याहप्केमु ङ्यिहगी खुङला मेलाम क्याहप्को येह। ओहले मिहया़गी तुहक्पु तेर्केमु ङ्यिह ना़दी तेहको येह। 13 लेहमेन मिहया़गी ङ्यिहला आब्रु तेनॱनाङ ङ्यिह खुङ ङ्याम्बु निङज्यीगी ताम माएँ। ताहन्दा थु ङ्यिह जाम्बुलीङकी ङ्योहक्तोङ दाङ छ्य़ेरोया़ ल़ेहमुराङ काहल्दी येह। 14 ङाहगी ख्याया़ला ङोहजाला छ्यि च्य़ूज्ये म़ेदी दि यिहगी प्रुहक्यो मिहम्बा, यिहॱनाङ राहङदीराङ च्याहम्बु पेहजाया़ला ल़ेहमुराङ पेहती लोप्ताम क्याहप्च्येला दि यिहगी प्रुहक्यो यिहम्बा। 15 च्यिबेमाना मास्यीकाला ख्याला चारा पेहकेन्की लोबेनया़ तोङरा तोङराॱराङ येहनाॱआङ ख्याती आबानी च्यी़राङ येहबा। च्यिबेमाना ङाहगी ख्याला या़हबु लेहङगु लाहमले मास्यीका येशूला ङोह स्य़े च्य़ूदी ङाह ख्याया़गी आबा काहल्सीन। 16 ख्याया़गी ङाहगी पे त़ेदोङ म़ेदी ङाह ख्याया़ला ओहर-छ्य़े स्युहउ येह। 17 ओ़ह सोङबे तिमोथीला ख्यासाला ताङगेराङ येहबा। खो चो़वोला ङाहगी च्याहम्बु दाङ यिह-छ्य़ेबुगी पुह यिहम्बा। ङाहगी थाम्ज्यी ग्या़या़गी छेन्छोकया़ला लोप्क्यो ल़ेहमुराङ मास्यीकाला ङाहगी मिहली काह-ठि येहकें, ओ़ह खोगी ख्याया़ला टेहम्बा साल च्य़ूज्ये येह। 18 ख्या नाहङला लाहलागी, “ता़हनी खो ओहराङ साला मेहयोहङगे” म़ेदी राहङगी राहङला छ्यिम्बु ज़ोउ दु लो। 19 चो़वो छ्येवागी थुला ठुङदी येहसीमाना ङाह ग्यो़बाराङ ख्यासाला ओहङज्ये येह, ओहले छ्य़ेन्दो तेन्दी डोएँ मिहया़गी ताम मिहम्बा, यिहॱनाङ खुङगी ओङ काहजेबा दुबा ओ़ह ङाहगी ताज्ये येह। 20 च्यिबेमाना किन्ज्योगी क्याहल्सी तामला मिहम्बा, यिहॱनाङ ओङला ओहङगे। 21 ख्याया़ च्यि सेम पेहकें? ङाह ख्यासाला ओहङगेमु प्रेहका थो़दी स्योनी, सेमला स्यिहवा दाङ चेवा ख्योङदी स्यो? |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.