१ कोरिन्थी 13 - ह्योल्मोचेवा 1 ङाहगी मिहया़ दाङ स्यिहङगामकी स्याहप्च्यीया़गी स्याहल ङो़ले ताम मासी माॱनाङ ङाहला चेवा मे़हसीमाना, ङाहनी ना़ छाएँगी टिहल्बु दाङ झ्याङ-झ्याङ पेहती क़े तेन्गेन्गी पुहप्च्याल ल़ेहमु च्यी़राङ डोज्ये येह। 2 ङाह ङ्याम्बु तिङला ओहङगेन्गी तामया़ स्ये ख़ूएँगी ओङॱआङ येहटो, ओहले थाम्ज्यी तिहङ-रिहङबुगी तामया़ ङोह स्य़े खू़रो, थाम्ज्यी येहन्देनया़ॱआङ ङोह स्य़े खू़रो, ओहले लाह काहङदोया़ला ग्या़ च्यी़ले लेहमेन ग्या़या़ला पो ख़ूएँगी थाम्ज्यी यिह-छ्य़े ङाह ङ्याम्बु येहटो, यिहॱनाङ ङाह ङ्याम्बु चेवा मे़हसीमानादी ङाह च्यिॱआङ मिहम्बा। 3 का़हलेॱआङ ङाहगी राहङगी रेबेॱराङ क्युहया़ क्य़ेहदी तेर्सीन, ओहले ङाहगी ज़ुबु सा़ज्येला तेर्सीन, यिहॱनाङ ङाह ङ्याम्बु चेवा मे़हसीमाना ङाहला च्यिॱआङ ख्येप्साङ मेहयोहङगे। 4 चेवाला स्य़िहदे ओहङगे ओहले निङज्यी पेहकें, चेवागी स्यिहताङ मेहबेकें, छ्य़ेन्दो मेहतेन्गे ओहले राहङला छ्यिम्बु मे़हनेगे। 5 चेवागी ताम ठोक्पु पेहती मेहमाएँ, चेवागी राहङदीराङ तामला मे़हक्याहल्गे, स्यिहताङ ग्यो़बा मेहबेकें, चोक्पा तामला नाङदा मेहताङगे। 6 ल़ेह ङ्येहम्बागी तेहन्दाला चेवागी काहसो मेहबेकें, यिहॱनाङ तेहन्दामगी तामला क़ेहनाङ पेहकें। 7 चेवागी ताम थाम्ज्यीराङ ना़गे, ताम थाम्ज्यीला यिह छ्य़ेगे, ताम थाम्ज्यीला रेहवा पेहकें, ताम थाम्ज्यीला सेम थिक-चि पेहती तेहकें। 8 चेवा नाहमॱआङ मेहतोङगे। लुहङदेनया़ था़ छ्येच्ये येह, तामया़ चो़हदी डोज्ये येह, येहन्देनकी तामया़ तोर्ती डोज्ये येह। 9 ओहराङगी येहन्देनया़ छाङबु म़ेह, नाम्पार-ताहक्पा थु लाहमले ताम माएँ ओहराङगी काबाप छाङबु म़ेह 10 यिहॱनाङ छाङबु ओहङ फान्ज्यो, छाङबु मे़हबादी तोर्ती डोज्ये येह। 11 ङाह फेमा येहकेंमु ङाहगी पेहजागी ल़ेहमुराङ पेहती ताम माउ येहकें, पेहजागी ल़ेहमुराङ सेम येहकें, पेहजागी ल़ेहमुराङ पेहती ङोह स्ये़उ येहकें, यिहॱनाङ ता़ह ङाह स्यारा काहल्दी येह ओ़ह सोङबे ङाहगी पेहजागी ल़ेहमु च्येपाया़ क्युर्सीन। 12 ताहन्दा ओहराङ मेहलोङला ल़ेहमुराङ टाक्पु पेहती मेहथोङगे, यिहॱनाङ ओ़ह ती़हजीला छ्यिसाल-नाहङसाल पेहती थोङज्ये येह। ताहन्दा ङाह ङ्युहङसे़ च्यी़राङ ह्अ कोहएँ, ओ़ह ती़हजीलादी किन्ज्योगी ङाहगी तेहन्दाला थाम्ज्यीराङ केच्याया़ ङोह ख्येन्गे ल़ेहमुराङ ङाहगीॱआङ ङोह स्ये़ज्ये येह। 13 ता़ह दि केच्या सुमदी नाहम्स्यी किन्दुॱराङ लिहच्ये येह– यिह-छ्य़े, रेहवा दाङ चेवा। ओहले दि सुम नाहङला थाम्ज्यी म़ेदी छ्येस्योदी चेवाॱराङ यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.