१ कोरिन्थी 12 - ह्योल्मोयिहक्तेन काबापया़ 1 आदा-नो़ह दाङ आज्यी-नुहमुया़, नाम्पार-ताहक्पा थुगी काबापकी तेहन्दाला ङाह ख्याया़ला तेहन्दामकी तामया़ प्रा साल्गो येह। 2 ख्याया़ला क्यी़हराङ येह, चो़वोला यिह मे़हछ्य़ेएँमु ख्याया़ च्या च्यी़ले ताम माॱराङ मी़हखुएँगी कुया़ ङो़ले सेम ग्युरक्यो येहकें। 3 ओ़ह सोङबे ख्याया़गी दि ताम ङोह स्ये़ज्यु माएँ ङाहगी सेम्बा येहबा, किन्ज्योगी थु लाहमले स्याहल सुङगे सुज्यीगीॱआङ येशूला मे़मु मेहक्याहप्कें, ओहले नाम्पार-ताहक्पा थु लाहमले च्यी़राङ “येशूॱराङ चो़वो यिहन” म़ेदी मा ख़ूएँ। 4 नाम्पार-ताहक्पा थुगी काबापया़ ना माहङबुराङ ओहङगे यिहॱनाङ काबाप नाङगे नाम्पार-ताहक्पा थुनी च्यी़राङ यिहन। 5 चो़वोला स्याहप्तो स्युहएँगी ल़ेहया़नी यिहन्जेराङ ओहङगे, यिहॱनाङ चो़वोनी च्यी़राङ यिहन। 6 किन्ज्योगी छ्या़लेया़ ना माहङबुराङ येहबा, यिहॱनाङ मिह थाम्ज्यीला दि थाम्ज्यी नाङगेन्गी किन्ज्योनी च्यी़राङ यिहन। 7 ता़ह मिह थाम्ज्यीला रो़हराम पेहच्येगी तेहन्दालाराङ नाम्पार-ताहक्पा थुगी छ्या़लेया़ थोङ ख़ूज्यु म़ेदी किन्ज्योगी मिह ऱेह-ऱेहला काबाप नाङदी येह। 8 लाहलाला नाम्पार-ताहक्पा थु लाहमले रिहक्स्यीगी तामया़ माएँ, लाहलाला ओ़ह थु लाहमलेॱराङ येहन्देनगी तामया़ माएँ, 9 लाहलाला ओ़ह नाम्पार-ताहक्पा थु लाहमलेॱराङ तेहपा पेहकें दाङ लाहलाला नेहपाया़ टा़ह च्य़ूएँगी काबापया़ नाङदी येह। 10 लाहलाला ल़ेह याहम्जेम्बा पेहकेन्गी काबाप नाङगे, लाहलाला लुहङदेन प्रा साल ख़ूएँगी काबाप नाङगे, लाहलाला नाम्स्यीया़ खा फे़ ख़ूएँगी काबाप नाङगे। लाहलाला यिहन्जेराङ साम्बा-साम्बा तामया़ माएँगी काबाप नाङगे, ओहले लाहलाला ओ़ह ताम साम्बाया़गी तेहन्दा स्येकेन्गी काबाप नाङगे। 11 यिहॱनाङ दि थाम्ज्यी ओ़ह च्यिमे च्यी़राङ नाम्पार-ताहक्पा थुगी छ्या़लेया़ यिहम्बा। नाम्पार-ताहक्पा थुगी राहङगी सेम थेप्क्यो थाम्ज्यीला काबाप नाङगे। ज़ुबु च्यी़ला माहङबुराङ ओङबुया़ 12 पे यिहॱना़, ओहराङगी ज़ुबुला ना माहङबुराङ ओङबुया़ येहबा– दि नामे नाजो ओङबुया़ डी़दी ज़ुबु च्यी़राङ डोएँ। मास्यीकाॱआङ ओ़ह ल़ेहमुराङ यिहम्बा। 13 च्यिबेमाना च्यिमे च्यी़राङ नाम्पार-ताहक्पा थु लाहमले ओहराङ थाम्ज्यीगी ज़ुबु च्यी़लाॱराङ बप्तिस्मा ज्योर्ती येह– यहूदी यिहॱना़ यिहन, ग्रीक यिहॱना़ यिहन, योक्पु यिहॱना़ यिहन, सुज्यीगी योक्पु माहबेबाकी मिह यिहॱना़ यिहन, ओहराङ थाम्ज्यीला च्यिमे च्यी़राङ नाम्पार-ताहक्पा थु लाहमले थुङज्येला नाङसीन। 14 च्यिबेमाना मिहगी ज़ुबुला ओङबुया़ च्यी़राङ मेहयोहङगे यिहॱनाङ ना माहङबुराङ ओङबुया़ डी़दी ज़ुबु काहल्ग्यो ओहङगे। 15 का़हलेॱआङ काङबागी “ङाह लाहक्पा मिहम्बा, ओ़ह सोङबे ङाह ज़ुबुकी ओङबु मिहन” म़ेदी मासीमाना, च्यि ओ़ह ज़ुबुकी ओङबु मेहयोहङगे ले? 16 ओहले नाम्ज्योगी “ङाह मी़ मिहन, ओ़ह सोङबे ङाह ज़ुबुकी ओङबु मिहम्बा” म़ेदी मासीमाना, च्यि ओ़ह ज़ुबुकी ओङबु मेहयोहङगे ले? 17 का़हलेॱआङ ज़ुबु काहङग्याराङ मी़ च्यी़राङ मी़ येहसीमाना का़हलेगी ङ्यिहन्ज्ये? ओहले नाम्ज्यो च्यी़राङ नाम्ज्यो येहसीमाना का़हलेगी टिहमा नोम्ज्ये? 18 यिहॱनाङ किन्ज्योगी राहङगी थु ङ्य़ेबु, मिहगी ज़ुबुला थाम्ज्यी ओङबुया़ डी़दी ज़्या़ नाङग्यो येहबा। 19 का़हलेॱआङ ना च्यी़राङ ओङबुया़गी ज़ुबु थाम्ज्यीराङ काहङसीमाना ज़ुबु ओहङॱराङ मेहयोहङगे। 20 ओङबुया़ माहङबुराङ येहबा, यिहॱना़ ज़ुबुदी च्यी़राङ येहबा। 21 मी़गी लाहक्पाला “ङाहला ख्येती कोहपु म़ेह” म़ेदी मा मी़हखु, ओ़हठीॱराङ पेहती गो़गीॱआङ काङबाला “ङाहला ख्याती कोहपु म़ेह” म़ेदी मा मी़हखु। 22 तोहरोङ ज़ुबुकी थाम्ज्यी म़ेदी स्युक फेमा येहकेन्की ओङबुया़लाॱराङ ओहराङगी चारा माहङबु पेहकें। 23 ओहराङगी का़हन्दी ओङबुया़ला चा़ फेमा म़ेदी नोम्साङ ताङगे, ओ़ह ओङबुया़लाॱराङ ओहराङगी चारा माहङबु पेहकें। ओहले मिहया़ला तेन्ज्ये मेहयोहङगे ओङबुया़ला ओहराङगी या़हबु पेहती उप्ती ज़्या़गे। 24 मिहया़गी थेकाराङ थोङगेन्गी ओङबुया़लानी चारा माहङबु पेह मेहकोहएँ। यिहॱनाङ चा़ फेमा येहकेन्गी ओङबुया़ला माहङबु ची़नाङ पेह कोहएँ छ्याप्स्यी पेहती किन्ज्योगीॱराङ दि ओङबुया़ला डी़दी ज़्या़ नाङग्यो येहबा। 25 च्यिबेमाना ज़ुबु च्यी़ले सुॱआङ खा फ़ेदी डोएँगी केच्याया़ माहयोहङज्यु यिहॱनाङ ओङबु च्यी़गी च्यी़ला चारा पेह ख़ूज्यु। 26 का़हलेॱआङ ओङबु च्यी़ला तुहक्पु काहल्सीमाना ज़ुबुगी थाम्ज्यी ओङबुया़गी ङ्याम्बुराङ तुहक्पु खुर्के, ओहले ओङबु च्यी़गी ज़िज्यिद ज्योर्सीमाना थाम्ज्यीराङ ओङबुया़गी काहसो पेहकें। 27 ख्या मास्यीकागी कुसो यिहम्बा, ओहले थाम्ज्यी ओ़हगी ओङबुया़ यिहम्बा। 28 किन्ज्योगी छेन्छोकला तोहङस्यो ल़ेह-पेनया़, ङ्यिपाला लुहङतेम्बाया़, सुम्बाला लोबेनया़, याहम्जेम्बागी छ्या़ले पेहकेनया़, नेहपाया़ला टा़ह च्य़ूगेन्गी काबाप ज्योरक्योया़, रो़हराम पेहकेनया़, गोबाया़, नामे नाजो ताम साम्बा माएँगी काबाप ज़्योरक्यो मिहया़ ज़्या़ नाङदी येहबा। 29 च्यि थाम्ज्यीराङ ल़ेह-पेनया़ यिहम्बा ले? च्यि थाम्ज्यीराङ लुहङतेम्बाया़ यिहम्बा ले? च्यि थाम्ज्यीराङ लोबेनया़ यिहम्बा ले? च्यि थाम्ज्यीराङ याहम्जेम्बागी छ्या़ले पेहकेनया़ यिहम्बा ले? 30 च्यि थाम्ज्यी ङ्याम्बु नेहपाया़ला टा़ह च्य़ूगेन्गी काबापया़ ओहङगे ले? च्यि थाम्ज्यीगीराङ ताम साम्बाया़ माएँ ले? च्यि थाम्ज्यीगी ताम साम्बाया़गी तेहन्दा स्य़े ख़ूएँ ले? 31 यिहॱनाङ थाम्ज्यी म़ेदी चा़ छ्येवा काबापया़ ज्योर्च्येला ख्याया़गी ज्यिबुराङ निङरु पेहतोङ। ओहले ङाह ख्याया़ला ओ़ह म़ेदीॱआङ जेन या़हबुगी लाहम तेन्ज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.