TITA toc2 TITA 3 - PATHIAN LEKHABU IRTHIANG C.L. Bible (BSI)

Thil sa tho mai hrang

¹ Roirêltuhai le irchamneihai kuang irpelûta an thu zôm hrangin le lam tinrênga sin sa tho hranga irzoi diama om hrangin inhretir nôk roh.

² Tûte hrilsiat loia, irngeisîpa rual irchanga, mi tin chunga zâidam hrangin ti pe roh.

³ Tiana khan chu eini khom inmôltak, tukullian tak, hruai irhmanga om, irzukna le inhoina chi tinrêng suaka om ei nia, mi hnarsaa êsêlin ei oma; nunse tak, irkhôkmâk irhlôm uar mi ei ni ngai.

⁴ Aniachu, a ni saninhringtu Pathian khonzazia le a ni lungthungzia a hong inlanga khan, a ni saninhring ta.

⁵ Eini’n thil ei tho’n sa sika ni loiin, a lungkhamna sikin, a ni saninhring tâka, siamtharnaa irsûkinfâi le Irtha Irthianga siamthar ei ni tâk a ni.

⁶ A ni saninhringtu Jisua Krista zâra ei chunga hin ar tha kha a bun intam ok tâka,

⁷ khanchu lungkhamna sika thiam nin changtirin kumtuang hringna sabeina irchon luatuhai ei ni thei tâk a ni.

⁸ Hi thu hi a dik a ni. Pathian iam tâkhai chu thil sa tho nuamna lungrîl an irput zêl theina hrangin hi thu hi uar hrangin nang ki nuam a ni; kha kha a saa, tu hrang khomin a inlâp a ni.

⁹ Irsêlna kâmboi hai, irchibulhai sui sui hai, Dân thua irsêl irsêl hai masan roh; inlâpna nei maka, ar fêna om ual mah.

¹⁰ Irsen indarna insuaktu chu voikhat voihni ngo’n lân irngaitua zui no roh.

¹¹ Khaang mi kha chu lungrîl kôi siat tâk an nih ti khom an inhriat chian a ni.

Inthâna chongbe

¹² Artema mani, Tukika mani ni kuang ki hong tîr le chu Nikopoli khuaa ni hong pan lat roh, kha khan phalbi sûng chu om ki itum a ni.

¹³ Zena, dân inhre mi le Apolova chu, an inzinna lampuia ite an irsam loina hrangin ni thei ang tôkin changpuihai roh.

¹⁴ Ei mihai kha ra loia an om loina hrang le thil kâmom poimohai kha irsam loi hrangin sin tho nuam mai hrangin irchutirhai roh.

¹⁵ Ki kuanga om murdihaiin chubai nang an mûk a ni. Iamnaa ei rualhai kha chubai ki mûk. Nin rênga kuang Pathian lungkhamna om ri se.