THUPHUANG 13 - PATHIAN LEKHABU IRTHIANG C.L. Bible (BSI)

Sahrâng inhnihai

¹ Khan, sahrâng irki sôm le lu sari nei, tuikhanglian ata hong suak ki hmu. A’rkihaia khan rênglukhum a om senga, a luhaia khan Pathian hrilsiatna irhminghai a om sa.

² Sahrâng ki ihmu kha keiârsi a anga, a kehai chu savom ke a anga, a bâi chu kâmkeibaknei bâi a ang. Dragonin sahrâng kuang khan a sintho theina le a rêngtoihmun le ar chamneina liantak kha a pêk.

³ Sahrâng lu inkhat kha thi theina dôra popin ki hmu, khannisianlân, kha sâbe kha a hong dam ta. Irnênga mi murdi’n ar khêl an tia, sahrâng kha an zui ta.

⁴ Sahrâng kuang ar chamneina a pêk sikin dragon kha mi tinin chubai an mûk. Sahrâng khom kha an mûk saa, “Sahrâng anga hi tu mo a om? Tu mo a doi thei hrang?” an tia.

⁵ Khan, sahrâng kha irpâk thei hrang le Pathian hrilsiat thei hrangin phal a ni, tha sômminli tha hni sûng ircham nei hrangin phal a ni sa.

⁶ Khanchu, Pathian le ar hming le a omna le irvâna omhai murdi hrilsiat an phut ta.

⁷ Pathian mihai doia inhne hrangin phal a ni, chi tin, nam tin, chong tin, le zât tin chunga irchamneina a kuang pêk a ni sa.

⁸ Irnêng le irvân siam mâna that tâk Belrate hringna bua irhming chuanghai ti no’n chu irnêng chunga om mi murdi’n chubai mûk an ti.

⁹ “Mikuar nin neiin chu irngai roi!

¹⁰ Tukhom sala om hranga a niin chu sala hruaiin om a ta, khandaia thi hrang a niin chu, khandaia thatin om a ti. Hitaka hin Pathian mihai chu ngîrindetna le iamom taka an om a nangzia an lang,” a tia.

¹¹ Khan sahrâng dang irnêng ata hong suak ki hmua. Belrate irki angin irki inhni a neia, dragon angin a chonga.

¹² Sahrâng masa irchamneina murdi kha sahrâng masa mit hmua a hmanga. Irnêng le a chunga mihriam om murdihai kha sahrâng masa thi theina dôra pop tâk, a dam nôk kha, chubai mûk hrangin an phût ta.

¹³ Sahrâng inhnina khan, mi tin mit hmua irvân ata irnênga mei zuang chôiin sinirkhêl liantak a sina.

¹⁴ Sahrâng masa mit hmua sinirkhêl sin hranga phalna a hmu sika khan irnênga mi murdihai a huanga; an kuang, sahrâng khandaia pop tâk la dam nôk chôiirsângna hrangin ama irlim siam hrangin thu a pêka.

¹⁵ Sahrâng masa irlim kha phûk hong neia, a chong theina hrang le chubai mûk loihai murdi a that theina hrangin sahrâng inhnina kuang khan phûk pêk theina irtha pêk a ni sa.

¹⁶ Khanchu, sahrâng khan mi murdi, a lian a chîn, ar chong an riang, suak le suakloi khom, an kut chang tiang mani, an michala mani, irsinsiana nei seng hrangin an phûta.

¹⁷ Sahrâng irhming mani, a’rhming nambar mani, indangna nei loihai ka chu, tûte’n ite irchôkin an zuar thei loina hrangin.

¹⁸ Ama hin vârna a nang. Inhriat theina neiin chu sahrâng nambar kha sût ri se, mihriam nambar a ni sikin. A nambar chu irzaruk sômruk kiruk a ni.