ROM KHUAA MIHAI KUANGA TÎRTÔN PAULA LEKHATHON 15 - PATHIAN LEKHABU IRTHIANG C.L. Bible (BSI)

Mâni lôm lam ni loiin mi dang lôm lam zong hrang

¹ Eini iamnaa a hrâthai hin mâni lômna zong loiin hrât no ualhai an hrâtloinaa ei ichangpui hrang a ni.

² Iamnaa ei phun indet theina hrangin mâni bômhai inlômin an ta hranga thil sa tho tum seng ei ti.

³ Krista khomin mâni lômna zong ual mah, “Nang êrôtuhai êrôna kha ki chunga a chum ta,” ti irziak ang khan a ituang tâk a ni.

⁴ Pathian Lekha thua lei irziak tâk rêng rêng chu nir chutir hranga irziak a ni, thu irziak ata dorôina le irtharngamna ei dong zâra sabeina ei nei theina hrangin.

⁵ Dorôina le irtharngamna Pathian kha Krista Jisua nuamlam angin lungrîl inkhat nang innei sianlân,

⁶ Khanchu, lungrîl inkhat inrualin ei Rengpa Jisua Krista Pa le Pathian kha zâi inrualin inpâk thei nin ti.

Judahai le Jentailhai hranga Thurchi Sa.

⁷ Pathian roiinpuina hrangin Krista khan nangni a ipom angin pom irhlôm seng roi.

⁸ Nangni ki hril, Pathian iam omzia infelna hrangin irchibulhai kuang a thu’nkung kha hlenin, Krista chu sertanhai sinthotua a lei oma.

⁹ Jentailhai khomin a lungkhamna sika Pathian chôiindôm theina hrangin. Pathian Thu bu’n, “Khanchu Jentailhai laia nang inpâk ki ta, Ni’rhming inpâkin zâi ki ti,” ti irziak ang khan.

¹⁰ Hiang hin a ti sa a ni: “Jentailhaio, mihai leh lôm roi,”

¹¹ Hiang khom hi a ti: “Jentail murdihaio, Rengpa chu inpâk roi, Ama mihai murdi khomin inpâk ri sehai,”

¹² Isaia khomin hiang hin a ti: “Jesaia irzung hong irzâm ata, Jentailhai rêng hrangin hong suak a ti. Ama chunga Jentailhai khan an sabeina kha irnghat an ti,” ti a ni.

¹³ Irtha Irthiang sinthotheina zâra sabeinaa nin sip theina hrangin sabeina hnâr Pathiana khan nin iam sikin lômna le irtharngamna tinrêngin nangni vur ri se.

Paula tirtôn a nina san

¹⁴ Ki urênghaio, nangnihai hi satnaa sip, vârna tinrêng neiin tam, irchutir irhlôm thei hrangin nangni ki iam ngita;

¹⁵ aniachu, thil senkhat nangni inhriattir nôk hrangin ki la hong irziaka. Jentailhai hranga sin hrangin Pathian khan Krista sinthôna sin a ni zuang inhlan phuta khan, hâi taka ki irziak a ni.

¹⁶ Jentailhai chu Irtha Irthianga Pathian kuang, lôm inruka irbôlna hranga, inhlan hrangin Thurchi Sa hril hi ki ochai sin a ni.

¹⁷ Krista Jisuaa khan Pathian sin ki tho hi a sân ki isong a ni.

¹⁸ Jentailhai in-iamtir hrangin Krista’n sintho le thuhrilin keima ni hmanga a sinthohai vai no chu i khom hril ngam no ninga;

¹⁹ Irsinsiana le sinirkhêlhai, Irtha Irthiang sinthotheinaa khan a ni hmang a ni, khasika khan Jerusalem khua le a kôlvêl rama irthokin Illurikon dênin, Krista Thurchi Sa chu hmun tina ki hril irkip tâka.

²⁰ Mi dang lungphûm chunga sin inding ki ni loina hrangin Krista lan hriatloina hmun kipa Thurchi Sa inpuang hi ki nuamlam a ni.

²¹ “A thurchi an la ihril ngai loina mihai khan chu hmu an ta, La’nhre ngailoihai khan inhria an ti,” ti irziak ang khan hril ki itum ngai a ni.

Paula’n Rom hro a tum lam

²² Khasika khan kêng, nin kuanga hong ki irlêk chian ngai a ni.

²³ Atûn hin chu hi ramhaia hin fena hrang nei ta ma unga, kum tam tak sûng nangni hong hro ki itum mai ngai ang khan.

²⁴ Spain ram fe malamin hong hrangin ki’rsabeia, nangni irpôlkhômpui bakin, ki ife tumna tiang nin sua hrangin nangni ki sabei sa a ni.

²⁵ Atûnlai taka hin chu mi irthianghai sintho hrangin Jerusalem khuaa la fe bak ki ti.

²⁶ Makedonia le Akaia rama mihai khan irphal takin Jerusalem khuaa mi irthianghai laia inrianghai ta hrangin tholôm an thoa.

²⁷ Irphal taka tho an ni, aniachu an ni ata lâkai an nei mai ngai a ni. Jentailhaiin an irtha tiang thila Judahai an irkoppuiin chu, rammual tianga thila khom Jentailhaiin Judahai sin an itho a inang a ni.

²⁸ Khasikin, kha kha ki thoa, tholôm kha an kuang kin hlan infel tika nangni hong hro malamin Spain rama fe ki ti.

²⁹ Khan, nin kuang ki hong tika chu Krista satvurna famirkip pumin hong ki ti, ti kin hriat.

³⁰ Urênghaio, ei Rengpa Jisua Krista le Irtha Irthiang zâra lungirthungna’n Pathian kuang ni chongchaipui ngut ngut hrangin nangni ki ngên a ni.

³¹ Judai rama iam loihai ata ki zôk theina hrang le Jerusalem ta hranga changpuina thil ki ichôi hi, mi irthianghai lômlam tak a hong ni theina hrangin.

³² Pathian irfûktir lam anga, lungrîl raifân taka nin kuang ki honga, ei irkaiinhar irhlôm theina hrangin ni chongchai pe roi.

³³ Irngeina Pathian chu nin rênga kuang om ri se. Amen.