ROIRÊLTUHAI 8 - PATHIAN LEKHABU IRTHIANG C.L. Bible (BSI)

Midian mihai an inhnêna

¹ Efraima mihaiin Gideona kuang, “Midian mihai doi hrangin itho sika mo ni ni ikoi loi?” an tia, natakin an hala.

² Gideona’n, “Nangni lei itho ngai leh hin kin itho thei sun hi ite hrilirkhîna om mak! nangni Efraima mihaiin nin itho sunhai khom hi keini namhai, Abiezera mihai itho nêkin chu a roiinpui daih kêng.

³ Pathianin Midian hruaitu lian Oreba hai, Zeeba hai chu nin kuta a pêk tâka, keiin ite ki itho om ual mah hi te,” a tia. Khaang khan a chong zoiin an nuarna khom chu a hong dâi tâka.

⁴ Gideona le a mi irzathumhaiin Jordan dung an irkâna, an sôl ok khomin, an râlhai chu an irzûl mai,

⁵ Sukoth khua an tunga, kha khuaa mihai kuang, Gideona’n, “Midian rêng Zeba le Zalmuna kin irzûla, ki mihai hi a sate’n an sôl tâka, ngaihoitakin fâk nêk pehai ro duah,” a tia.

⁶ Khannisian, ‘Sukoth nin kuta nin ichel tâk khom la ni loiin, itin mo ni sipai sôlhai fâk nêk kin ipêkhai hrang?’ an tia.

⁷ Gideona’n, “A dik Rengpa’n Zeba le Zalmuna kin kuta a ni pêk tika chu ramchâra ilhling le sûl ilhling neiin nin vun kai thêr zit ki ti,” a tia.

⁸ Kha rengata Penuel-ah an fea, an kuang, Sukoth mihai a ti ang ngêt khan a ngênhaia, anni khomin Sukoth-hai isâm ang ngêtin an sâma,

⁹ Penuel-ah mihai kuang khom khan, “Hoitak le dam taka ki hong kîr nôk tika nin khua hi inram chit ki ti,” a tia.

¹⁰ Zeba le Zalmuna chu Karkor khuaa, an sipaihai leh an oma, ramchâra omhai chu mi nuai khat le sînghni irdoinaa an thi tâka, a thi zoiloi la damhai mi sîngkhat le sâng ringa’n chu an la zui mai a ni.

¹¹ Gideona chu Noba le Zogbeha nisua tiang thingtâng lampuia a fea, irningloiin a râlhai le an irtok thuta.

¹² Midian rêng Zeba le Zalmuna chu an intâna; khannisian an irzûla, an chela; an sipaihai chu a saterengin an buai tâka.

¹³ An irdoi zoiin chu Gideona chu Heres lam tunga a hong kîra.

¹⁴ Sukoth mi ruatharte inkhat hi a chela, an khuaa hruaituhai le upahai irhming ar dona.

¹⁵ Gideona chu Sukoth khua a va fea, an kuang, “Zeba le Zalmuna hi en ta roi, Zeba le Zalmuna hi, nin kuta om tâk mannia, ‘nin sipai sôlhai hi fâk nêk itin mo kin ipêkhai hrang’ tia nin ni ihril kha,” a tia.

¹⁶ Ramchâra ilhling le sûl ilhlingnei a lâka, an khuaa hruaituhai chu a chela, Sukoth mihai mit hmua, kha ilhling leh khan a zêmhaia.

¹⁷ Penuel kul banghai chu ansiata, a sûnga mihai chu a that zita.

¹⁸ Gideona’n Zeba le Zalmuna chu, “Tabor tânga mi nin ithathai kha i ang mi man ni?” tiin ar donhaia. Anni’n, “An ir-ang zit, rêng nâihai nia irhoi tak an ni,” an tia.

¹⁹ Gideonan, “Ka uhai, ka nu tak nâihai ngêt an ni. Rengpa irhming sâmin ki hril hi, thathai no unglân nangni khom nangni that no ning,” a tia.

²⁰ A nâipa upatak Jethera kuang, “Thoiin lân, thathai ro,” a tia. Khannisian, khandai chu irlek ma, a la nâipang hrai sikin, a ithat ngamhai loi a ni.

²¹ Zeba le Zalmuna khan, Gideona kuang, “Nangma kha hongin lân, ni that ro, pa le pa irdoi hrang a ni hi te,” an tia. Gideona chu a thoia, Zeba le Zalmuna chu a thathaia, an sakuartung ringa irtheihai khom a lâkpai pehaia.

²² Israel mihaiin Gideona kuang, “Midian mihai kut ata ni ni sansuaka, kin chunga roirêltua om roh, ni nâihai, ni tuhai khom roirêltua hong chang zêl ri sehai,” an tia.

²³ Gideona’n, “Nin chunga roirêltua chang no ning; ki nâihai khom chang no nihai, nin chunga roirêltu hrang chu Rengpa a ni,” a tia.

²⁴ Gideona’n an kuang, “Thil inkhat nangni ngên hrang ki nuam a ni, mi tinin râlhai bômzoi nin ilâk kha inkhat ni pe chit unglân ki nuam!” a tia. (Ismaela mihai an ni sikin rângachak bômzoi an nei seng a ni.)

²⁵ Anni’n, “Inhnar ma ung, pe kin ti,” an tia. Puan an dâpa, râl bômzoi an lâk chu an pêk senga.

²⁶ Khaang khan an ipêk khom rângachak bômzoi chu her sôminhni vêl a ni. Midian rênghai irvôna, ringzêlhai, hnâr bethai, puan sendukhai le an saringsei ring khita neihai chu tep sa ni mah.

²⁷ Gideona’n kha rângachakhai leh khan Efod a siama, a omna khua Ofra-ah khan a siaa. Israelhaiin an Pathian an mâksana, Gideona le a in mihai ta hrangin châng ichiom tak a hong ni tâka.

²⁸ Khanchu, Midian mihai chu Israelhaiin an inhnêhaia, ite châng thei ta mahai. Gideona dam sûng chu ram kha kum sômminli irngeina a lêng.

Gideona thi thu

²⁹ Gideona, Jerubaala an ti ngai chu, ama in tiang a fea.

³⁰ Gideona’n dôngma a nei intama, nâipasal sômsari a neia.

³¹ Sekem khuaa a lâksîrin nâipasal a nei pe saa, ar hming chu Abimeleka an phuaa.

³² Joasa nâipa Gideona chu a tar ok tena a thia, Abiezera mihai ram Ofra khuaa, a pa Joasa thâna an phûm sa tâka.

³³ Gideona a thi hnunga chu Israel mihai chu hnungtôlin an oma, Baal an biak tâka, Baal-berith chu pathiana an hong siam tâk.

³⁴ Hmun tina an râlhai kut ata sansuaktu Rengpa, an Pathian chu Israelhaiin inhre ta mahai.

³⁵ Gideona’n chu Israelhai chunga theidôra irnak songin a om ngaia chu anni’n Gideona insûng mihai chu inren viat ngai mahai.