ROIRÊLTUHAI 14 - PATHIAN LEKHABU IRTHIANG C.L. Bible (BSI)

Samsona le Timna khuaa dôngmate

¹ Samsona chu Timna khuaa a zu fea, Timna khuaa Filistia dôngmate inkhat chu a zu hmua,

² a hong kîr nôka, a nu le pa kuanga, “Timna khuaa Filistia dôngmate inkhat ki zu hmua, ki dôngma hrangin ni biak pe roi,” a tia.

³ A nu le a pa’n, “Ei irchipui laia mani, ei mihai laia mani dôngma hrang an om loi mani na? Itho sika mo ser tanloi Filistia mi dôngmaa nei ni inuam tâk?” an tia. Samsona’n a pa kuang, “Nin neitir zel roi, ki indit tak a ni,” a tia.

⁴ Khannisianlân, a nu le pa’n, kha kha Rengpa itho a nih ti inhre mahaia; Filistia mihai chunga zoro inchum a zong a ni, kha lai khan Filistian mihaiin Israel mihai chunga roi an rêl a ni.

⁵ Khanchu, Samsona chu a nu le pa leh khan Timna-ah an zu fea, Timna-ah grep irhuan hi an zu tunga; khan irngai ta, kâmkeibaknei hrâtlai hin a hong inhrâm khumhaia.

⁶ Irningloiin Rengpa irtha chu a chunga a zuang chum thuta, ite khom chôi maka, kêlte ang takin an pot indi chita, khannisianlân, a sintho kha a nu le a pa chu inhrilhai viat mah.

⁷ Khan, khuaa khan a zu fea, nupang chu a zu chongpuia, Samsona’n a sân an dita.

⁸ Zoro idôr mani fe hnunga chu zu neia zu hruai hrangin a zu fe nôka, kâmkeibaknei ruak kha en hrangin a va pêta, kâmkeibaknei puma khuai lei om mur mur le khuaihlutui tamtak om kha a va hmua.

⁹ Khuai hlutui chu a lâka, a fe balamin a fâk zêla, a nu le a pa khom a pêka, an fâka, kâmkeibaknei ruak ata a lâk a nih ti a pahai hril mah.

¹⁰ A pa chu dôngmate ina khan a zu fea; khataka khan ruathartehai iti ngai dân angin Samsona’n hruai an thêa.

¹¹ Filistian mihaiin ama rual hrangin ruatharte sômthum an inkung pea.

¹² Samsona’n an kuang, “Irôro nangni irdon ki ti, hruaithe sûng sûn saria a omzia nin inhriatin chu puansil irnêm sômthum le irsakna puan irnêm sômthum nangni pe ki ti.

¹³ Nin inhriat no’n chu puansil irnêm le irsakna hrang puan sômthum nin ni ipêk hrang,” a tia. “Ni irôro chu lei hril ta, lei irngai kin ti,” an tia.

¹⁴ An kuang, “Fâktu rengata fâk hrang a hong oma, Hrât tak rengata thil thum a hong suak,” ti hi, a tia.

¹⁵ Sûn thum an ngaitua khomin a omzia inhre thei mahai. A sûn sari nî chu Samsona dôngma kuang an fea, “Ni pasal chu a irôro hril hrangin ngên ro; khano’nchu, nang le ni insûng mihai hi kin ihâl thathai hrang. Hmâimôk ni sak hrangin mo ni ni ifial?” an tia.

¹⁶ Samsona dôngma chu a pasal makunga a chapa, “Ni lungthung viat loia, ni ni ihnôl a ni hi; kin mi ruathartehai irôro nir donhaia, a omzia khom nin hril nuam mak che,” a tia. A kuang, “Ka nu le pa lua khom hril loiin, nang ki inhril hrang mo?” a tia.

¹⁷ Hruai an inthê sûng sûn sari sûng chu a chap a chapa, a ngên ngut ngut sikin a sûn sari nî chu a hril pe tâka, a dôngma’n a mihai a hril tâka.

¹⁸ Khataka khuaa ruathartehaiin a sûn sari nî, misa tâk mân a kuang an honga, “Khuai hlutui nêka thum imo om? Kâmkeibaknei nêka hrât ual i mani?” an tia. Samsona’n, “Ki sehrât irla hi irnêng inpholtir no unglân chu, ki irôro hi inhre viat no chin ni,” a tia.

¹⁹ Rengpa Irtha chu a chunga irningloi rengin a zuang chum thuta, Askelon khuaa a zu fea, mi sômthum a zu thata, an neinun chu a lâkpai pehaia, a irôro inhriattuhai kha irsakna puanhai chu a pêkhaia. Ningmur takin a pa in tiang a kîr nôk tâk.

²⁰ Khan, Samsona dôngma chu inneinaa rual hranga a ihmang, a rualpa kha a dôngma hrangin an pêk tâka.