NAMBAR 28 - PATHIAN LEKHABU IRTHIANG C.L. Bible (BSI)

A nî tina thilinhlanhai

¹ Khanchu Rengpa’n Mosia a chongpuia,

² Israel irchihai kha thu pehaiin lân, an kuang, fâk chi thilinhlan ki ta hranga mirimhoi chu a zoro taka nin inhlan ngai hrang a ni, ti roh.

³ Khan an kuang, hi hi meia thilinhlan Rengpa kuanga nin inhlan hrang chu a ni. Kêlbelrate a chal kum khat mi demnaboi a sûn tin inhni inhlan nin ta.

⁴ Kêlbelrate inkhat kha zîng tiang inhlan nin ta, inkhat dang kha khohloi tiang inhlan nin ti.

⁵ Khan baidi thilinhlan hrangin, oliv hriak le irzêl baidi her khat chu inhlan sa nin ti.

⁶ Hi hi a ni, a nitina pum hâlirvôm thilinhlan chu, Sinai tânga khan fâk chi thilinhlanhai a lei om baka. Kha kha Rengpa ta hranga mirimhoi chu a ni.

⁷ Khan uain thilinhlan hrangin uain khilât sei khat chu maichâma ni ibuak hrang a ni.

⁸ Khan khohloi tiang khom zîng tianga ang dênin belra inkhat dang kha inhlan ni ta, uain thilinhlan khom kha ni inhlan sa hrang a ni. Hi khom hi fâk chi thilinhlanhai a ni sikin, Rengpa ta hranga mirimhoi chu a ni.

Sabat nia thilinhlan

⁹ Khanchu Sabat nia belrate a chal kum khat mi demnaboi chu baidi thilinhlan, oliv hriak leh irzêl baidi her hni le uain thilinhlan leh inhlan nin ti.

¹⁰ Hi pum hâlirvôm thilinhlan hi a nitina thilinhlan le uain thilinhlan, inhlana om ti bana chu, Sabat nikhua rikipa nin inhlan sa hrang chu a ni.

A tha tina thilinhlan

¹¹ Pum hâlirvôm thilinhlan chu tha thar rikipa Rengpa kuang inhlan nin ta, sehrât tuai inhni, belrachal inkhat belrate kum khat mi sari leh; an rêngin demnaboi an ini hrang a ni.

¹² Khanchu sehrâtchal tin leh khan, baidi thilinhlan hrangin bai indi tak, hriak leh irzêl her thum; khan belrachal tin leh khan baidi her hni sengin;

¹³ khanchu belrate le baidi thilinhlan hrangin baidi her khat sengin inhlan sa hrang a ni. Hihai hi pum hâlirvôm thilinhlan mirimhoi Rengpa ta hranga thilinhlanhai chu a ni.

¹⁴ Uain thilinhlan chu hiang hi ni a ti, sehrâtchal leh khan khilât sei inhni ni a ta, belrachal leh khan khilât sei inkhat le a chimrip ni a ta, khan belrate leh khan khilât sei inkhat seng ni a ti. Hi hi kumtuanga a tha tina nikhua masa taka pum hâlirvôm thilinhlan dân hrang chu a ni.

¹⁵ Khan a nitina pum hâlirvôm thilinhlanhai le uain thilinhlan ti bana, kêlchal inkhat sual irbôlna hrang inhlan sa nin ti.

Bai chol pol loi kût nia thilinhlan

¹⁶ Khanchu tha maton tak le sûn sômhleiminli nî hi Rengpa Ferkân kût nî sûn a nia,

¹⁷ kha tha sûn sômhleiringa nî rengata kha kût nî sûn sari om a ta, kha ni chu bai chol pol loi vai fâk thei ni a ti.

¹⁸ Khanchu kût nikhua masa tak nî khan, Pathian biak hrangin inkhôm nin ta, sin nin itho hrang ni mah.

¹⁹ Pum hâlirvôm thilinhlan chu Rengpa kuang inhlan nin ta, sehrât tuai inhni, belrachal inkhat, belrate kum khat mi sari inhlan nin ta, an rêngin demnaboi an ini hrang a ni.

²⁰ Baidi thilinhlan dik tak chu oliv hriak leh irzêlin inhlan ni a ti; baidi her thum chu sehrâtchal leh khan inhlan sa ni ta, belrachal leh her hni baidi inhlan sa ni ti;

²¹ khan belrate le baidi her khat seng inhlan sa nin ti.

²² Khabana, kêlchal inkhat sual irbôlna hrangin inhlan sa nin ta, khaangin mipuihai thâr irthiang chu tho nin ti.

²³ Hihai hi a zîng tina pum hâlirvôm thilinhlan ti bana nin inhlan hranghai chu a ni.

²⁴ Khaangin sûn sari sûng chu, Rengpa ta hranga mirimhoi fâk chi thilinhlan chu nin inhlan hrang a ni. Hi hi a nitina pum hâlirvôm thilinhlan le uain thilinhlan ti bana nin inhlan hrang chu a ni.

²⁵ Khanchu sûn sari ni chu Pathian biak hrangin inkhôm nin ta, sin rêng rêng nin izong hrang ni mah.

Pentikos kût thilinhlan

²⁶ Khanchu Pentikos Kût sûn maton tak nia Rengpa kuang bu thar nin inhlan tika, Pathian biak hrangin inkhôm unglân, sin rêng rêng nin izong hrang ni mah.

²⁷ Pum hâlirvôm thilinhlan Rengpa ta hranga thil mirimhoi chu hiang hin inhlan roi. Sehrâtchal tuai inhni, belrachal inkhat, belrate kum khat mi sari a chal, an rêngin demnaboi an ini hrang a ni.

²⁸ Baidi thilinhlan chu oliv hriak leh irzêl, hiang hin inhlan roi; sehrâtchal kha baidi her thum leh inhlan nin ta, belrachal chu baidi her hni leh inhlan nin ti.

²⁹ Belrate a chalhai kha baidi her khat leh inhlan nin ti.

³⁰ Khan sual irbôlna hrangin kêlchal inkhat inhlan sa nin ta, khaang khan mipuihai thâr irthiangna chu tho nin ti.

³¹ Hihai hi uain thilinhlan le a nitina pum hâlirvôm thilinhlan le baidi thilinhlan ti bana nin inhlan sa hranghai chu a ni.