NAMBAR 27 - PATHIAN LEKHABU IRTHIANG C.L. Bible (BSI)

Zelofehada nâinupanghai ngênna

¹ Khan, Manasea nâipa Makira, a nâipa Gileada, kha nâipa Hefera, kha nâi nôk Zelofehada nâinupanghai chu an honga, an irhming chu Malaii, Novaii, Hoglaii, Milkaii le Tirzaii an ni.

² Irtongna Biakbuk kotbâia Mosia le ochai Eleazara le mipui murdihai maton tiang an va ngîra,

³ “Kin pa chu nâipasal boiin ramchâra khan a thia, ama chu Rengpa doihai, Kora pâlhai lai khan kop sa maka; khannisian a binga sualna sikin a thia.

⁴ Nâipasal a nei no sik ringotin itho mo kin pa irhming hi a’rchihai lai hin boi zelin a iom hrang? Kin pa urênghai lai hin keini khom hi irchon ni pe roi,” an tia.

⁵ Khan Mosia’n an thu chu Rengpa kuang an tunga.

⁶ Rengpa’n Mosia a chongpuia,

⁷ “Zelofehada nâinupanghai kha a dik pehai, an pa dongtum kha pehai roh.

⁸ Khan Israel irchihai kuang khan, mi nâipasal nei loiin a thiin chu, a’rchon chu nâinupang kuang pe roi.

⁹ Nâinupang a nei noa ni’n chu, a’rchon chu a urêng pasalhaiin lua an ti.

¹⁰ Khan urêng pasal a nei noa ni’n chu, a pa urêng pasalhaiin lua an ti.

¹¹ Khan a pa khan urêng pasal a nei noa ni’n chu, a parual irnaipui takin lua a ta, ama’n a’rchonhai chu bukkhôm a ti. Khan Mosia’n Rengpa thupêk angin Israel irchihai ta hrangin dân thupêk det ni a ti, tiin hril ro,” a tia.

Mosia thûl hrangin Josua inkungna

¹² Rengpa’n Mosia kuang, “Abarim tânga khin hong fe’n lân, Israel irchihai kuang ki ipêk hrang ram chu hong thîr roh.

¹³ Khan ni hong hmu zoi tena chu ni urêngpa Arona chu a’rchihai kuang hruai a ini ang dên khan nang khom hruai ni ta ni ti.

¹⁴ Zin ramchâra mipuihai an chiar laia an mithmua tuia khan ni chôiindôm hranga thu nang ki ipêk kha, pom loiin ni om sika khan,” a tia. (Kha kha Zin ramchâra Kades-ah Meriba tuihai khan a ni).

¹⁵ Khan Mosia’n Rengpa a ngêna,

¹⁶ “Rengpa mihriam murdi irthahai Pathianin mipuihai chunga hin hruaitu inkung sianlân,

¹⁷ Rengpa mipuihai chu a hrungtu nei loi belra anga an om loina hrangin, an makunga suak le lûta, anni hruaisuaka hruai inlûttu hrangin,” a tia.

¹⁸ Khan Rengpa’n Mosia kuang, “Nuna nâipa Josua thiltho thei tak kha hruaiin lân, a chunga ni kut irnghatin lân.

¹⁹ Ochai Eleazara le mipuihai makunga inngîrtirin lân an mithmua irchamneina chu pe roh.

²⁰ Khan Israel irchi murdihaiin a thu an zômna hrangin a chunga nir chamneina senkhat irnghat roh.

²¹ Khanchu ama chu ochai Eleazara makunga ngîr a ta, a’rchamin suak an ta, ama le Israel irchi murdihai leh,” a tia.

²² Khan Mosia’n Rengpa thupêk lam ang takin a thoa, Josua chu a hruaia, Eleazara le mipuihai makunga an ngîrtira.

²³ Khan a chunga a kut a’rnghata, Mosia hmanga Rengpa’n a ihril ang khan ircham neina a pêk tâka.