NAMBAR 25 - PATHIAN LEKHABU IRTHIANG C.L. Bible (BSI)

Peor hmuna Israelhai an tung

¹ Khan Israelhai chu Sitim-ah an om lai khan, Moab nupanghai le om pualoia omin an siat tâka.

² An pathianhai kuang, an irbôlna hruaithena khan an fialhaia; khanchu an fâka, an pathianhai chu chubai an mûkhai tâka.

³ Israelhaiin Peor-a Baal chu an pom tâka, khanchu Israelhai chunga Rengpa ning an mur pea,

⁴ khanchu Mosia kuang, “Mipui hruaituhai murdi hruaihaiin lân, Rengpa ningmurna ichiom tak chu Israelhai chung ata a’rkiang theina hrangin sûn khovâra, Rengpa makunga inkhâi thathai ro,” a tia.

⁵ Khan Mosia’n Israel roirêltuhai kuang, “Peor-a Baal biakhai kai chu thatpaihai ving roi,” a tia.

⁶ Khan irngai roi, Israel laia mi inkhat, Midian nupang hi Mosia le mipuihai chu irtongna Biakbuk kotbâi kôla an chap lai tak hin an mithmua puan ina a hruaia.

⁷ Khan, ochai Arona nâipa Eliazara nâipa Finehasa’n a lei hmua, mipuihai lai ata kha a thoia, ufei a lâka,

⁸ khan pasal le nupang kha puan in sûnga a’rzûlhaia, an ruaiin a sun thathaia.

⁹ Khanchu Israel chunga hripui lêng kha a mong tâka, khannisian mi sînghni le sângminlihai chu an lei thi irman tâka.

¹⁰ Rengpa’n Mosia a chongpuia,

¹¹ “Ochai Arona nâi Eleazara nâipa Finehasa sintho sika hin Israelhai chunga hin ki ninginmur ta maka, ama’n chu keima ti bana pathian dang bîk chu irngai thei maka, khasika khan anni chu ki ningmurin inboipaihai ta ma ung.

¹² Khasikin ama le kumtuangin thuthungna siam hrang ki nih ti hril roh.

¹³ Ama le a’rchi suanpârhai chu kumtuanga ochai nina pêk an nia, a ni doipuituhai chu irngai thei maka, mipuihai sualna ngaidamna khom an tungtir sikin,” a tia.

¹⁴ Israel mi Midian nupang le an ithatpai irhming kha Zimria, Simeona, panama mi hruaitu Salua nâipa a ni.

¹⁵ Khan Midian nupang an ithatnu irhming kha chu Zura nâinu Kusii a ni; a pa chu Midian mihai panamhai laia hruaitu a ni.

¹⁶ Khan Rengpa’n Mosia a chongpuia,

¹⁷ “Midian mihai chu doi unglân, inboipaihai ving roi.

¹⁸ Peor-ah nangni an huanga thil saloi tak nin chunga an thôna sika khan Kusii chungchâng thua vârirleta nangni an ihruai ang khan nangni an la huang mai sika hin,” a tia.