NAMBAR 23 - PATHIAN LEKHABU IRTHIANG C.L. Bible (BSI)

¹ Khanchu Balaama’n Balaka kuang, “Hitaka hin maichâm sari ni sinsiam pe’n lân, sehrâtchal sari le kêlbelra chal sari ni ngaitua pe ro,” a tia.

² Khanchu Balaka’n Balaama ihril lam angin a thoa. Balaka le Balaama’n maichâm tina sehrâtchal inkhat le belrachal inkhat an inhlana.

³ Balaama’n Balaka kuang, “Ni hâlirvôm kôla hin lei ngîr maiin lân, kei chu ki bingin hong fe ki ta, Rengpa kha ni chongpui hrangin a zuang khom a ni thei; khan a ni ihril murdi chu nan hril ving ki ti,” a tia. Khanchu a bingin tângsîpa hin a hong fe tâka.

⁴ Pathianin khataka khan a le’rtongpuia, khan Balaama kuang, “Maichâm sari chu ki lei siam tâka, maichâm tina khan sehrâtchal inkhat le belrachal inkhat seng chu kin hlana,” a tia.

⁵ Rengpa’n Balaama bâia thusuak chu a hrêa, Balaka kuang kîr nôkin lân, van hril ro, a tia.

⁶ Khanchu a kuang a kîr nôka, Balaka chu Moab upahai murdi leh khan pum hâlirvôm thilinhlan kôla khan a lei ngîr kha a va hmua.

⁷ Khan Balaama’n hi leihrilna thu hi a hril tâka: “Balaka Moab rêngin Suria ram nisua tianga tânga a ni hruaia, ‘Hongin lân, Israel mipuihai khua ni sâl pe ro,’ a tia.

⁸ Itin mo Pathianin khua a isâl loihai kha khuasâlhai thei ki ta? Itin mo Pathian khosâl a inpêl loihai kha khosâlna a inpêlhai hrang?

⁹ Lungpui irsâng tak ata ki hmuhaia, tângsîp ata khom ki hmuhai theia; anni chu nam a binga om indet sai an nia; nam danghai nêk khomin satvurin an om ti an inhriata.

¹⁰ Israel irchi le suanpârhai chu pildi ang dôr an nia, tep zoi zât ni no nihai. Pathian mihai angin, ki nikhuahai hi hmang zoi inlân, mi felhai angin lungngam takin thi inlân,” a tia.

¹¹ Khanchu Balaka’n Balaama kuang, “Imo ni ni itho pe ta ngai? Ki râlhai khua ni sâl pe hrangin kêng nang ki ikoi, khannisian sat te ni vurhai tâka!” a tia.

¹² Khanchu ama’n, “Rengpa’n hril hrang a iti vai kêng ki ihril thei,” a tia.

Balaama leihrilna voihnina

¹³ Khanchu Balaka’n a kuang, “Hmun danga fe nôk ei ti, khatak ata kha hmuhai ni ta, maton tianga omhai khom hmuhai thei ni ta, an rêngin chu hmuhai zoi no chi ni; khatak ata kha khua ni sâlkhum pehai ro,” a tia.

¹⁴ Khanchu Zofim hai omna Pisga sîpa a hruaia, maichâm tina khan sehrâtchal inkhat le belrachal inkhat an hlana.

¹⁵ Khanchu Balaama’n Balaka kuang, “So taka son Rengpa ki va chongpui kâr chu ni hâlirvôm thilinhlan kôla hin lei ngîr mai ro,” a tia.

¹⁶ Khan Rengpa’n Balaama chu a le’rtongpuia, a bâia thu a siaa, “Balaka kuang kîr nôkin lân, a kuang va hril nôk ro,” a tia.

¹⁷ Khanchu a kîra, Balaka chu hâlirvôm thilinhlana khan Moab upahai leh ngîr maiin a va hmua, Balaka’n a kuang, “Rengpa’n imo a lei ihril?” tiin a’rdona.

¹⁸ Khanchu Balaama’n hi leihrilna hi a hril pea: “Zipora nâipa Balaka hongin lân, ki thu hi hor ngai roh.

¹⁹ Pathian chu mihriam minlak ang hi ni maka, Ama chu mihriam milung irletkochok ngai ang hi ni ma; chong a inkung tâk chu a tho ngêt ngai. Thu a hrila, a’rzoi zel ngai.

²⁰ Satvur hrangin hrilin ki oma; Pathianin sat a ivur tâk chu koi kîr thei ni ta no ning.

²¹ Israel sûnmatona hin vânsiatna le buaina ite om no nia; Rengpa an Pathian chu an kuang a om sikin, ama chu an rêng a nih tiin an chôiindôma.

²² Pathianin Aigupta ram ata a hong hruai suakhaia, ramkâra sele angin a doi pehaia.

²³ Dôiâi ihruaina om loiin, Israel namhai chunga hmang hrangin ite dôi om mah. Atûn chu mihaiin, ‘En roi, Pathianin thil a itho lam hi,’ ti an tih.

²⁴ Israel namhai chu kâmkeibaknei hrât tak ang a nia; a sa sê a thatpai mâka chu, a sa sê thisen an dôp mâka chu omchian ngai ma,” a tia.

²⁵ Khanchu Balaka’n Balaama kuang, “Israelhai hi khua ni sâl nuam no khomin sat hi chu vurhai no ro,” a tia.

²⁶ Balaama’n, “Nang ki ihril mo ni ta mah. Rengpa’n a iti vai kêng ki itho hrang tiin,” a tia.

Balaama leihrilna voithumna

²⁷ Balaka’n Balaama kuang, “Hong hi ro, hmun danga nang lei hruai nôk hi rong, khatak ata chu khua ni sâl pe hrang hi Pathian a nuam khom a ni thei,” a tia.

²⁸ Khanchu Balaka’n Balaama chu ramchâr a suk tianga zu en theina hmun Peor sîpa a hruaia.

²⁹ Khanchu Balaama’n Balaka kuang, “Hitaka hin maichâm sari ni siam pe’n lân, sehrâtchal sari le belrachal sari ni ngaitua pe ro,” a tia.

³⁰ Khanchu Balaka’n Balaama ihril angin a tho pea, maichâm tina khan sehrâtchal le belrachal an hlan vinga.