NAMBAR 20 - PATHIAN LEKHABU IRTHIANG C.L. Bible (BSI)

Kades hmuna thil tung

¹ Khanchu Israel irchi murdihai chu tha khatna khan Zin ramchâra an lûta, Kades hmuna omhmun an khuar tâka. Khataka khan Miriami chu a thia, kha khan an phûm tâka.

² An omhmun khuarna khan, tui om ta maka, khasikin mipuihai irbukkhômin Mosia le Arona chunga an chiara.

³ Rengpa makunga ei urênghai an thi lai khan eini khom hi Pathianin a ni ithat lolo lei ni sianlân a isa ok hrang a nia,

⁴ itho sika Rengpa’n mipuihai hi thi hranga hi ramchâra hin ni ni hong ihruai suak mo, keini le kin sahai dênin?

⁵ I lo hranga Aigupta ram rengata hi ram saloi taka hin ni ni hong ihruai inlût? Ansûlhloihna hai, theipui hai, grep hai, dalim omna ram sa lak ni maka, tui in hrang lua hi teh om ri se ba! an tia.

⁶ Khan Mosia le Arona chu mipuihai lai ata fe suakin irtongna Biakbuk kotbâia an va fea, an lu irnêng sikin an inboka, khanchu Rengpa roiinpuina kha a zuan lang tâka.

⁷ Khan Rengpa’n Mosia a chongpuia,

⁸ “Thuthung Bôm maton tianga khianghrol kha lan lân, nang le Arona’n mipuihai kha bukkhômhai unglân, an mithmu ngeia lungpui kha chongpui unglân, tui chu hong suak a ta, khaang khan mipuihai ta hrangin lungpui ata tui kêlsua ni ta, mipui le an sahai ta hrangin tui kha pehai ro,” a tia.

⁹ Khan, Mosia’n Rengpa makung ata khianghrol kha a thupêk lam ang takin a lâka.

¹⁰ Ama le Arona’n mipuihai chu an bukkhômhaia, khanchu Mosia’n an kuang, “Irngai roi, nangni mi têngtôngsiahaio! Hi lungpui ata hi tui nangni kêlsua pe ni ung mo?” a tia.

¹¹ Khanchu Mosia’n khianghrol kha a lâka, lungpui kha voihni a hei vîka, khanchu tui tamtak a hong suak tâka, mipui le an sahaiin tui kha an in tâka.

¹² Khanchu Rengpa’n Mosia le Arona kuang, “Ni iam mak chêia, Israel irchihai mithmua nin ni chôiindôm no sikin, hi mihai hi ki ipêk rama khan hruai intunghai no chin ni,” a tia.

¹³ Hi hi Israel mipuihaiin Rengpa chunga an chiarna hmun Meriba hmuna thil tung a nia, hitaka hin ama chu a’rthiang a nih ti an langtirna a ni.

Edom rêngin Israelhai khapna

¹⁴ Mosia’n Kades rêng kuang ata Edom rêng kuang palai a tîra, “Ni sûngsuak Israel irchihaiin hiang hin an ti, kin chunga dengtheina tung murdi hi nin hriata,

¹⁵ kin pi le puhai Aigupta rama an fe tâka, zoro sôttak Aigupta rama kin omna thuhai, Aigupta mihaiin kin pi le puhai le kei ngei khom deng an ni intheitir lam kha,

¹⁶ khanchu Rengpa kin koia, kin koina kha a le’rngaia, vântirtôn a zuang tîra, Aigupta ram ata a ni hruai suaka. Khanchu irngai ro, nangma ram dep Kades-a hin kin om.

¹⁷ Irngaihoi takin ni ram hi nin hrotir ro, loia mani, irhuana mani khom fe no ni unga, rungtuia tui suakhai khom in no ni ung, lamliana fe pat kin ta, ni ram kin khêl mâka chu chang tiang mani, vei tiang mani khom pêt viat no ni ung,” a tia.

¹⁸ Khannisian Edoma’n a kuang, “Nin ni ihrôthal hrang ni ma, nin ni hroa ni’n chu, nangni doi hrangin khandai leh hong suak kin ti,” a tia.

¹⁹ Khanchu Israel irchihaiin an kuang, “Lamlian vai hro kin ta, keini’n mani, kin sahaiin mani, ni tui an lei ina ni’n chu, a man nang pe kin ta, a hro vai nin hrotir hrâm ro,” an tia.

²⁰ Khanchu Edoma’n, “Ni hrothal thei no chin ni,” a tia. Khan, Edom chu mipui tamtak le mi hrâthai le anni doi hrangin an hong suak tâka.

²¹ An ihro kha phal pehai ta maka, khanchu Israel mihaiin an rotsan nôk ta.

Hor tânga Arona thina

²² Khanchu Kades ata kha an suaka, Israel mipui tam dôrhai khan Hor tâng kha an va tunga,

²³ khan Rengpa’n Mosia le Arona chu Edom ramri khan a chongpuihaia, “Arona chu a’rchihai kuang hruai ni a ta,

²⁴ Meriba khan ki thu sêlin a têngtông an setir sikin, Israel irchihai ki ipêkna rama khan lût no ni.

²⁵ Arona le a nâipa Eliazara chu Hor tânga khan hong hruaihai roh.

²⁶ Arona chu a ochai tukfamhai kha khekpai pe’n lân, a nâipa Eliazara innghâktir roh. Arona chu a’rchihai kuang hruai ni a ta, kha khan thi a ti,” a tia.

²⁷ Mosia’n Rengpa thupêk ang lam takin a thoa, mipuihai mithmua Hor tânga khan an hong fea,

²⁸ khanchu Mosia’n Arona tukfamhai kha a khekpai pea, Eliazara kha an nghâktira; khanchu Arona chu tângsîpa khan a thi tâka; khanchu Mosia le Eliazara chu tâng ata kha an zuang chuma.

²⁹ Mipuihaiin Arona a thi tah ti an inhriatin chu, sûn sômthum an chûla.