NAMBAR 18 - PATHIAN LEKHABU IRTHIANG C.L. Bible (BSI)

Ochaihai le Levi irchihai sintum

¹ Rengpa’n Arona kuang, “Nang le ni nâipasalhai le Levi irchihai hin hmun irthianga tho’nsualna mô chu nin chunga chum a ta, khanchu nang le ni nâipasalhai hin ochai nin inina tho’nsualna mô chu nin chunga chum sa a ti.

² Ni sûngsuak, Levi mihai chu ni nâipasalhai leh thu inhriattirna puan ina sin nin tho zoroa nangni an san theina hrangin ni kôla a nâinaa inomtirhai roh.

³ Ni sinthôna nang san an ta, Biakbuk tiang sin murdi chu tho an ta, khannisian hmun irthianga bêl le bûr le maichâm chu hong nâi no ri sehai, an tôna a ni’n chu anni le nang khom thatin om nin ti.

⁴ Anni chu nangma leh sintho nin ta, Biakbuk sina an sintum khom chu tho an ta, khannisian nam dang mi’n chu nangni an hong inai hrang ni mah.

⁵ Nangma le ni nâipasalhai vaiin hmun irthiang le maichâm sin tho nin ta; khanchu ki ningmurna hi Israel mipuihai chunga insum ta no ning.

⁶ Khan irngai ro, keima hin ni sûngsuak Levi mihai chu Israel irchihai lai ata kin thangsuakhaia, Biakbuka sintho hrang Rengpa kuanga pêk, ni ta hranga thilpêk ni a ti.

⁷ Nang le ni nâipasalhai vai hin maichâm le hmun irthianga ochai sin murdi chu tho thei nin ti. Ochai sin hi ki thil nangni pêk a ni sikin, hihai hi nin sintum chu a ni. Nam dang hong nâituhai kai chu thatpai ni an ti,” a tia.

Deipuhai dongtum hrang

⁸ Khanchu Rengpa’n Arona kuang, “Irngai ro, ngaihoi thilinhlana ki kuanga an inhlan murdi pum hâlirvôm an inhlan loi kai chu, nangma tum hranga nang ki ipêk ving a ni. Hihai hi nangma le nir chi suanpârhai tena hrangin kumtuanga nang ki ipêk chu a ni.

⁹ Meia an ihâl mihlia thil irthianghai chu ni ta ni a ta; an thilinhlan tinrênghai, an sual irbôlna hai, an theiloi changna thilinhlan ki kuanga an inhlan hrang ten hin nangma le ni nâipasalhai tum hrang chu ni a ti.

¹⁰ Hmun irthiang taka fa nin ta, pasal murdi’n fa nin ti, nin ta hrangin chu irthiang ni a ti.

¹¹ Khabana Israel irchihaiin ngaihoi thilinhlan an ni ipêk murdi chu nangma ta ni sa a ti. Hi hi nangma le ni nâipasalhai le ni nâinupanghai ta hranga kumtuanga hrangin nangni ki ipêk chu a ni. Ni in sûnga mi murdi Pathian dâna irthianghaiin chu fa thei an ti.

¹² Oliv hriak satakhai, grep ra satakhai, bu satak hai, ra maton tak Rengpa ta hranga an ipêk murdi chu nang ki ipêk a ni.

¹³ Khahai murdi kha ni ta an nia, ni in sûnga mi murdi, Pathian dâna irthiangtu kaiin chu fa thei an ti.

¹⁴ “Israelhai thilinhlan murdi chu ni ta ni a ti.

¹⁵ Rengpa ta hrang nâilutîr mani, ra irzir maton tak mani, an ipêkhai kai chu mihriam khom ni ta ni a ta; khannisian nâilutîr chu irtan ni ta, sâ Pathian dâna irthiang loi a tê suak maton tak chu irtan sa ni a ti.

¹⁶ Tha khata nî’n chu irtan hranghai chu irtanna man ni inkung angin hmun irthianga sekel tep dân angin, sekel ringa leh ni irtan hrang a ni.

¹⁷ Khannisian sehrât, kêlbelra le kêl irzir maton tak chu irtan nang no nia; khahai kha chu keima ta an ni sikin, inhlan ni an ti. An thisen chu maichâma inthek ni a ta, Rengpa ta hrangin mirimhoi tak le an thâihai chu meia thilinhlanna khan ni irô hrang a ni.

¹⁸ An hmê chu ni ta ni a ta, ngaihoia thilinhlan a rôp le a mal chang tianga chu ni ta a ini ang hin.

¹⁹ Nangma le ni nâipasalhai le ni nâinupanghai kuanga kumtuanga an inhlanhai hi nangni ki ipêk a ni. Hi hi indanglamtir thei loi thuthung nangma le nir chi suanpârhai kuanga ki inkung chu a ni,” a tia.

²⁰ Khanchu Rengpa’n Arona kuang, “Irchon lua hrang nei no chi nia, Israel ram rêng rêng khom pêk ni sa no chi ni; Israel irchihai laia nir chon chu keima hi ki ni,” a tia.

Levi irchihai dongtum

²¹ Rengpa’n, “Israel mihaiin sôma inkhat an ipêk murdi chu Levi mihai ki pêka, hi hi irtongna Biakbuk an sinthôna irthûla ki ipêkhai chu a ni.

²² Khasikin Israel mi danghai rêng rêngin irtongna Biakbuk an hong inai hrang ni maka, an sual man chu pêlin an thi loina hrangin.

²³ Atûn ata chu Levi irchihai vaiin irtongna Biakbuk sin chu tho’n an mophurna ni a ti. Hi hi nin irchi suanpârhai tena om mai hrang chu a ni. Levi mihai hin Israel irchihai lai hin irchon nei no nihai.

²⁴ Israel irchihaiin sôma inkhat thilinhlana keima an ni ipêk hi ki pêkhai tâk sikin. Khasikin kêng Israel irchihai laia hin irchon nei no nihai ki iti,” a tia.

Levi irchihai sôma inkhat pêk hrang dân

²⁵ Khanchu Rengpa’n Mosia kuang,

²⁶ “Kha ti no khom khan Levi mihai chu inhrilin lân, an kuang, nin irchon hrang Israel irchihai sôma inkhat kha Rengpa kuang ngaihoi thilinhlana hrangin nin inhlan hrang a ni.

²⁷ Khanchu nin ngaihoi thilinhlan kha hruizôla bu le uain tui sômna uain anga pom thei ni a ti.

²⁸ Khaang khan Israel irchihai laia sôma inkhat nin idonghai kha Rengpa ta hranga ngaihoi thilinhlana hrangin nin inhlan ngai hrang chu a ni; khanchu Rengpa ta hranga ngaihoi thilinhlan kha ochai Arona chu nin ipêk hrang a ni.

²⁹ Nin thil dong murdi laia a satak, a’rthiang tak chu Rengpa kuang ngaihoi thilinhlana nin inhlan hrang a ni.

³⁰ Khasikin an kuang, khataka a satak nin ipêk, Levi mihai ta hranga hruizôla ra suak ang le uaiin sômnaa suak a ibe ni a ti.

³¹ Kha hmuna khom fa thei nin ta, nangni le nin in mihai khomin, irtongna Biakbuka nin sintho man a ni sikin.

³² A satak nin ipêk kha a sual man nin chunga chum no nia, Israel irchihai thil irthiang chu porinchetir no roi, nin thi loina hrangin ti ro,” a tia.