NAMBAR 14 - PATHIAN LEKHABU IRTHIANG C.L. Bible (BSI)

Mipuihai Rengpa chunga chiarna

¹ Khanchu kha zâna khan mipuihai chu chardongin inring takin an chapa.

² Israel irchihai murdi chu Mosia le Arona chunga an chiara, an kuang, “Aigupta rama lei thi kha ni inlân chu o! aninole, hi ramchâra hin thi thei inlân sa no ni mo!

³ Itho sika khandai leh thata om hrangin Pathianin hi rama hin a ni ihruai ma ni? Ei dôngma nâi le tehai lak chu chelhai an ta, khasikin Aigupta rama kîr nôk hi ei ta hrangin chu a isa mo ni ma?,” an tia.

⁴ Khanchu anni le anni an chonga, “Aigupta rama ni hruai inkîrtir hrangin hruaitu inthang ei ti,” an tia.

⁵ Khanchu Mosia le Arona chu Israel mipui irbukhai makunga an khûksadela.

⁶ Khan Nuna nâipa Josua le Jefunea nâipa Kaleba ram enirchiktuhai laia mihai khan, an puanhai a kaithêra;

⁷ Israel irchia mi irbûmhai kuang khan, “Enirchik hranga kin va irfangna ram kha ram satak a nia,

⁸ ei chunga hin Rengpa a lômin chu, kha rama khan ni hruai a ta, ni pe a ti; dûttui le khuaihlutui luangna ram chu.

⁹ Khasikin Rengpa chunga chiar no unglân, kha rama mihai khom kha chihai viat no roi, oltengin inhnêhai ei ti, Rengpa chu ei kuang a om sikin, an pathianhai chu a inhnêhai zoi tâk kêng, khasikin chi no roi,” an tia.

¹⁰ Khannisian mipuihaiin lunga dêng an tumhaia, khannisian irningloiin Rengpa roiinpuina chu irtongna Biakbuka khan Israel irchihai makunga a zuang inlanga.

Mosia’n mipuihai ta hranga a chongchaina

¹¹ Khanchu Rengpa’n Mosia kuang, “Hi mihai hin idôr ten mo an ni ihnôl hrang? Anni laia sinirkhêl tamtak ki tho hnung khomin, idôr ten mo ni iamzoi loiin an la iom mai hrang?

¹² Hripui zuang tîr ki ta, inboipaihai ki ti. Khannisian nangma chu nam tinhai pa nang inchangtir ki ta, anni nêka tam ual le hrât ual la ni an ti,” a tia.

¹³ Khannisian, Rengpa’n Mosia kuang, “Hi mipuihai hi Aigupta ram ata nangma sinthotheinaa ni ihruai suakhai an nia, hi mipuihai chunga ni sintho hi, Aigupta mihaiin inhria an ta,

¹⁴ hi rama mihai kuang hin hril an ti; hihai hin nang Rengpa ngêt hi kin kuang hin ni om ti an inhriat tâka, ni sûm chu kin chunga omin, nangma chu fel takin nang an hmu ta, nang chu sûna sûm indingin le zâna meichokin kin mân tiang ni fe ngai ti khom an inhriat tâka.

¹⁵ Khasikin atûn ni mihai hi ni thatpaihai vinga a ni’n te, nir hming inthangzia inhriattu namhaiin,

¹⁶ chonginkung pe hranga a inkung rama khan a hruaihai thei no sikin ramchâra khan a thatpaihai tina an ti.

¹⁷ Khasikin Rengpa, atûn nang ki ngên, ni sinthotheina chu zuan langtirin lân, ni chonginkung chu zuan diktir roh.

¹⁸ Rengpa chu milung ir-uai tak zaidamnaa sip, pualoina hai, tho’nsualna hai, ngaidam thei ngai, thiamno inchangtira omhai insuaktir zel ngai loi, an pahai pualoina sika an nâihai le nâi nôkhai ten irlo thumna le irlo minli tena hrem ngai a nih ti kha.

¹⁹ Ni lungkhamna danglam ngailoi khan, Aigupta rama ni ingaidamhai angin, mipuihai sualna hi ngaidamhai hrâm ro,” a tia.

²⁰ Khan Rengpa’n, “Ni thu angin ngaidamhai ki ti,

²¹ khannisian ki ihring mai hrang le Rengpa roiinpuina irnêng murdi a la isip hrang ang hin thu kin kung,

²² Aigupta ram le ramchâr ki roiinpuina le ki sinirkhêl thohai an hmu hnung khomin voisôm an ni la fiaa, ki thu la pomloi mihai hin,

²³ an irchibulhai kuang khomâkirsâma ram ki inkung kha hmu thei no nihai.

²⁴ Ki sinthotu Kaleba hi chu a va fena rama khan hruai ki ta, a’rchihaiin la lua an ti.

²⁵ Atûn hin, Amalek mihai le Kanaan mihai chu iva irhôra hin an om, nangtûk chu kîr nôk unglân, tuipuisen lampui tiang ramchâra lût ta roi,” a tia.

Chiartuhai chunga Pathian hremna

²⁶ Rengpa’n Mosia le Arona a chongpuihaia,

²⁷ “Idôr ten mo hi mi pualoihai hi ki chunga an la ichiar mai hrang? An ichiarna chu tamtak kin hriata.

²⁸ An kuang, ‘Ki hringna sâlin ki ihril a ni, ki mikuar inhriata nin ihril ang takin nin chunga tho ki ta;

²⁹ khanchu thi nin ta, nin ruhai chu ramchâra hin irthekindarh a ti. Ki chunga nin chiarna sikin nangni laia mi kum sôminhni chung tianga mi rêng rêng, kha rama khan lût no chin ni.

³⁰ Kha rama om hrangin chong nangni kin kunga, khannisian Kaleba le Josua ti bana chu tûte lût no chin ni.

³¹ Ei nâi le tehai chu chelin om an ti, nin tia. Khannisian ram nin ihnôla khan hruai inlûthai ki ta, khataka khan vângsak an ti.

³² Khannisian nangni chu hi ramchâra hin thi nin ti.

³³ Nin thi zoi ving mâka chu nin iamom loina sikin nin nâihai chu ramchâra hin kum sômminli sûng chu dengthei takin om an ti.

³⁴ Ram nin va enirchikna sûn dôr, sûn sômminli chu, sûn khat irthûla kum khat angin, kum sômminli chu nin tho’nsualna sikin kum sômminli tuang nin ta, khanchu keima nin ni idoina hi a omzia inhre suak ta nin ti.

³⁵ Kei Rengpa hin mi pualoi, keima ni doia irbukkhômhai chunga hin hihai hi tho ngêt ki ti. Hi ramchâra hin thi an ti, Rengpa’n a ti’ ti roi,” a tia.

^36-37 Khan ram enirchik hranga Mosia’n a itîrhai kha, ram thurchi dikloi hong hrilin mipuihai Rengpa chunga inchiartira. Khasikin, Rengpa’n hripuiin a hremhaia an thi tâka.

³⁸ Enirchiktu sômhleihnihai laia Josua le Kaleba vai an hringa.

An ilua hrang ram va doi masa tak tumna

³⁹ Khan, Mosia’n kha thuhai kha Israel irchihai a hrila; khanchu mipuihai chu a sân an char a dong tâka.

⁴⁰ Khanchu zîng nôka chu inmân takin an thoia, tângsîpa an hong fea. “Irngai ro, hi hin kin ihong a ni, Rengpa’n a ni inkung pena hmuna khan fe kin ti. Kin lei itho’nsual a ni ta,” an tia.

⁴¹ Khan Mosia’n, “Tuanintungna ni no nih ti inhriat chakin nin om khomin Rengpa thupêk nin la izôm loi?

⁴² Nin laia Rengpa lak om maka, nin râlhai nangni lei that hrangin chu fe no roi.

⁴³ Nin mâna khin Amalek mihai le Kanaan mihai an oma, khandaiin nangni lei that an ti. Rengpa kha nin irnghatna tak a ni sikin, nin laia Rengpa chu om ta ma,” a tia.

⁴⁴ Khannisian tângsîpa khan fe ngêt an tuma, Rengpa Thuthungna Bôm le Mosia chu riakbuk rengata chu suak mahai.

⁴⁵ Khanchu kha tânga om Amalek mihai le Kanaan mihai chu an zuang chuma, an doihaia, Horma dênin irzûlin an thatpaihai tâka.