NAMBAR 13 - PATHIAN LEKHABU IRTHIANG C.L. Bible (BSI)

Kanaan enirchik hranga sômhleihni tîrna

¹ Khan Rengpa’n Mosia kha a chongpuia,

² “Israel irchihai ki ipêk Kanaan ram va enirchik hrangin mi tîrhai ro; an panam tina mi, an hruaituhai laia mi inkhat ni itîrhai hrang a ni,” a tia.

³ Khanchu Paran ramchâr ata Mosia’n Rengpa thupêk angin hruaituhai chu hiang hin a tîrhaia:

⁴ Reubena panama hruaitu Zakura nâipa Samua,

⁵ Simeona panam mi Horia nâipa Safata,

⁶ Juda panam laia mi Jefunea nâipa Kaleba

⁷ Isakara panam laia mi Josefa nâipa Igala,

⁸ Efraima panam laia mi Nuna nâipa Hosea,

⁹ Benjamina panam laia mi Rafua nâipa Paltia

¹⁰ Zebulun panam laia mi Sodia nâipa Gadiela,

¹¹ Manasea panam laia mi Susia nâipa Gadia

¹² Dana panam laia mi Gamalia nâipa Amiela

¹³ Asera panam laia mi Mikaela nâipa Sethura

¹⁴ Naftalia panam laia mi Vopsia nâipa Nabia

¹⁵ Gada panam laia mi Makia nâipa Geuela.

¹⁶ Hihai hi ram enirchik hranga Mosia’n a itîrhai chu an ni. Nuna nâipa Hosea kha Mosia’n Josua tiin a’rhming a thûla.

¹⁷ Khan Mosia’n a tîr suakhai lai hin, an kuang, “Sim tiang fe phot unglân, tâng ram tiang khan fe phot roi.

¹⁸ Ram chu i ang mo a ini, idôr mo mi an iom le idôra hrât mo an inih ti khom,

¹⁹ An omna ram chu a sa le saloi tihai, an omna khuahai chu i ang mo a ini, puan in papai mo a ini, aninole, kul nei in mo a ini, khan an ram khan bu le bâl satna mani, a ram irchang le chang loi khom va enirchik roi.

²⁰ Khanchu ngam takin om unglân, kha rama thei rahai kha hong pêl roi,” a tia. (Grep ra masa zoro lai tak a ni.)

²¹ Khanchu an suak tâka, ram chu Zin ramchâr ata Hamath lûtna Rehob dênin an enirchik vinga.

²² Sim tiang khan an fe baka, Hebron an va tunga, khataka khan Anaka irchihai Ahimana mihai, Sesai mihai, Talmai mihai an oma. (Hebron chu Aigupta rama Zoan om mâna kum sari mâna lei om a ni ta.)

²³ Khanchu Eskol ivapang an va tunga, khataka khan grep ra irku khat a ônpumin an sâta, hmol leh mi inhni’n an irzôna, dalim le theipui khom an chôi sa.

²⁴ Kha hmun kha Eskol ivapang an tia; Israel irchihaiin khataka grep ra irku an sât sikin.

²⁵ An ram va enirchikna khan sûn sômminli an innanga, khanchu an hong kîr nôka.

²⁶ Khanchu Paran ramchâr Kades-ah khan Mosia le Arona le Israel irchihai kuang an hong tunga, an ni le mipui murdihai kuang khan thu kha an intunga, kha rama thei an hong ichôihai kha an irhmuhaia.

²⁷ Mosia kuang, “Ni ni itîrna rama khan kin fea, dûttui le khuaihlutui luangna chu a lei nia; hi hi a rama thei chu a ni.

²⁸ Khannisian a rama mi omhai chu a sâna mi hrât an nia, an khuahai khom kulnei, roiinpui tak tak a ni. Khanchu Anaka irchihai khom kin va hmuhai sa.

²⁹ Amalek mihai chu sim tiang an oma, Hit mihai, Jebus mihai, Amor mihai chu tâng rama an oma, Kanaan mihai chu tuipanga le Jordan tuipanga an om,” tiin an hrila.

³⁰ Khannisian Kaleba’n Mosia makunga mipuihai kha an dâipaihaia, “Hong doihai ei ta, anni nêkin ei hrât uala, an ram chu lapai zel ei ti,” a tia.

³¹ Khannisian a ifepuihai khan, “Inhnêhai no ih, eini nêkin an hrât sikin,” an tia.

³² Khanchu an ram hong enirchik kha Israel irchihai kuang khan dik loi takin an hrila, an kuang, “Khi rama a sûnga mipui omhai fâk hrang ten lua irzir pehai maka, kin mihriam hmuhai laka chu mirumlian tatak an ni.

³³ Khan Anaka irchi mi hrâthai khom kin hong hmuhai sa. Keini chu khâitehai ang dôrin kêng kin irbe; anni khomin khâitehai ang dôrin kêng an ni ibe,” tiin an hrila.