NAMBAR 12 - PATHIAN LEKHABU IRTHIANG C.L. Bible (BSI)

Miriami hremna thu

¹ Miriami le Arona’n, Mosia’n Kus mi dôngma’n a nei sikin, an hrilinsiata.

² Anni khan, “Mosia kuang vai hin mo a inih Rengpa’n thu a ihril bîk? Keini kuang khom hin a ihril mo ni ma?,” an tia. Rengpa’n an thuhril kha an hriata.

³ Mosia chu irnêng chunga mihriam murdihai laia phûkdâi tak a nia.

⁴ Khan Mosia le Arona le Miriami kuang khan Rengpa’n, “Nin inthumin hong suak unglân, irtongna Biakbuka hin hong roi,” irningloiin a zuang ti tika khan chu an inthumin an fe tâka.

⁵ Khanchu Rengpa chu sûm lai ata zuang chumin Biakbuk kotbâia khan a ngîra, Arona le Miriami chu a koihaia, an ruaiin an honga.

⁶ Ama’n, “Ki thu hi irngai roi, nin laia deipu nin oma ni’n chu, keima chu an ni kuang inlâr ki ta, an irmang tiang chongpuihai ki ti.

⁷ Khannisian ki sinthotu Mosia ki ichongpui lam hi chu khaang kha ni no ni, ama chu ki mi Israelhai enkoltu’n ki isiam kêng.

⁸ Khasikin ama chu hmâi ir-enin, chongkôlâta ni loiin fel takin ki ichongpui a ni, khan ki hmêl khom a ni ihmu infel tâk a ni. Khasikin ki sinthotu Mosia hi itina nin ihrilinsiat lam mo a ini?” a lei tia.

⁹ Khan Rengpa chu an chunga a ning an mura, a fe tâka.

¹⁰ Khanchu sûmin Biakbuk kha a’rkiangsan tena chu, irningloi zelin Miriami kha ivur anga vârin an phâr tâka, khan Arona’n Miriami kha a ena, inphâr a ni tah ti a hmua.

¹¹ Khanchu Arona’n Mosia kuang, “Ka pu irngaihoi takin kin sual intona sika hremna hi kin chunga intungtir no roh.

¹² Mi a thi saia suak, a taksa a chimrip fâkpaia om ang hin chu Miriami hi inomtir hrâm no ro,” a tia.

¹³ Khanchu Mosia’n, “O Rengpa, irngaihoi takin indamtir nôk ta ro,” a tia.

¹⁴ Khanchu Rengpa’n, “A pa’n a hmâi an chilkhum khomin sûn sari sûng chu a hmâimôkna kha a ituang hrang mo ni ma, khasikin riakbuk pên tiang sûn sari irkhumin om sian, kha hnunga hruai inlûttir nôk ni ri se,” a tia.

¹⁵ Khanchu Miriami chu riakbuk pên tiang sûn sari a’rkhuma, Miriami kha an hruai inlûttir nôk mâka chu mipuihai kha irthon mahai.

¹⁶ Kha zoiin chu mipuihai kha Hazerot rengata kha an suaka, Paran ramchâra omhmun an khuar tâka.