NAMBAR 1 - PATHIAN LEKHABU IRTHIANG C.L. Bible (BSI)

Israelhai irtepna maton tak

¹ Israelhaiin, Aigupta ram an suaksan zoi kum hnina, a tha hnina, sûn maton taka khan, Sinai ramchâra irtongna Biakbuk khan Rengpa’n Mosia kha a chongpuia,

² “Nangma le Arona hin Israel irchihai chu an panam dungzuiin le an in sûng mi angin tephai roi.

³ Râl doi thei tak pasal kum sômhni le a chung tianga mi chu tephai ving roi.

⁴ Nang changpui hrangin panam tina pâfonghai chu inhrilhai ro,” a tia.

⁵ Hi sinthopui hranga panam tina an inthang suakhai chu hihai hi an ni: Reubena panama mi Sedeura nâipa Elizura,

⁶ Simeona panama mi Zurisadaia nâipa Selumiela hai,

⁷ Juda panama mi Aminadaba nâipa Nasona hai,

⁸ Isakara panama mi Zuara nâipa Nethanela hai,

⁹ Zebulun panama mi Helona nâipa Eliaba hai,

¹⁰ Josefa irchi Efraima panama mi Amihuda nâipa Elisama hai, Manasea panama mi Pedazura nâipa Gamaliela hai,

¹¹ Benjamina panama mi Gideona nâipa Abidana hai,

¹² Dana panama mi Amisadaia nâipa Ahiezera hai,

¹³ Asera panama mi Okrana nâipa Pagiela hai,

¹⁴ Gada panama mi Deuela nâipa Eliasapha hai,

¹⁵ Naftalia panama mi Enana nâipa Ahira hai hi.

¹⁶ Annihai hi mipuihai inthang, an panam sûnga hruaitu, Israel in sûngkua pâfonghai kha an ni.

¹⁷ Mosia le Arona chu hi mi sômhleihnihai hin an isanhai a nia,

¹⁸ khanchu Israel nam murdihai chu tha hni sûnga sûn masa taka khan an koibukhaia, panam tin le in sûngkuahai an tephaia. Pasal kum sômhni chung tianga mi chu irziakin an itephai a ni tâka.

¹⁹ Rengpa’n thu a ipêkhai ang takin, Mosia’n Sinai ramchâra khan mipuihai kha a itephai a ni.

²⁰ Pasal kum sômhni le a chung tianga râl doi theihai kai chu, an panam le an in sûngkua ang takin an irhming an irziakhaia, Jakoba nâilutîr, Reubena panam ata phutin hiang hin an tam dân chu a ni.

²¹ Reubena panama mihai chu sîngminli sângruk le irzaringa an ni.

²² Simeona panama irchihai chu an itam lam angin pasal kum sômhni chung tianga râlkâp thei dôrhai chu,

²³ Simeona irchihai murdi chu sîngringa sângkuak irzathum an ni.

²⁴ Gada panama irchihai chu an irhming tam dân angin kum sômhni chung tianga râl doi thei dôr chu,

²⁵ Gada irchihai chu sîngminli sângringa irzaruk le sômringa an ni.

²⁶ Juda panama irchihai chu an irhming tam dân angin kum sômhni chung tiangahai chu,

²⁷ râl doi thei dôra mi a chung tiang Juda irchihai chu sîngsari sângminli le irzaruk an ni.

²⁸ Isakara panama irchihai chu an itam dân angin kum sômhni chung tianga râl doi thei dôrhai chu,

²⁹ Isakara irchihai chu sîngringa sângminli irza minli an ni.

³⁰ Zebulun panama irchihai chu, an irhming tam dân angin kum sômhni chung tianga mi chu

³¹ râl doi thei tena mihai chu an rêngin sîngringa sângsari le irzaminli an ni.

³² Josefa panam laia mi Efraima irchia mi an tam dân angin kum sômhni chung tianga râl doi thei

³³ Efraima irchihai chu sîngminli irzaringa an ni.

³⁴ Manasea panama irchi an irhming tam dân angin kum sômhni chung tianga râlkâp thei

³⁵ Manasea irchihai chu an rêngin sîngthum sânghni irzahni an ni.

³⁶ Benjamina panama irchihai, an irhming fe dân angin kum sômhni chung tianga râl doi thei,

³⁷ Benjamina panamhai chu sîngthum le sângringa irzaminli an ni.

³⁸ Dan panama irchihai chu an irhming irziak dân angin kum sômhni chung tianga râl doi thei

³⁹ Dan irchihai chu sîngruk sânghni irzasari an ni.

⁴⁰ Asera panama irchihai chu an irhming irziak dân angin kum sômhni chung tianga râl doi thei

⁴¹ Asera irchihai chu an rêngin sîngminli sângkhat le irzaringa an ni.

⁴² Naftalia panama irchihai chu an irhming irziak lam angin kum sômhni chung tianga râl doi thei

⁴³ Naftalihai chu sîngringa sângthum irzaminli an ni.

⁴⁴ Hihai hi an ni, Mosia le Arona’n Israel nam pâfonghai sômhleihni an itephai thei chu an ni.

⁴⁵ Khanchu râl doi thei dôrhai chu Israel irchi, a panama tepin kum sômhni chung tianga itephai chu an ni.

⁴⁶ An rênga tep theia om dôr chu nuairuk sângthum irzaringa le sômringa an ni.

⁴⁷ Levi mihai chu panam danghai laia khan tep sa ni mahaia,

⁴⁸ Rengpa’n Mosia kuang khan,

⁴⁹ “Râl kâp thei hrang dôr pasal ni tephai tena khom Levihai chu ni itep sahai hrang ni ma;

⁵⁰ Levi irchihai chu inhriattirna Biakbuk le a neinun hmangruahai kha inenkoltirhai roh. A neinunhai kha irzônhai sianlân, donsuihai sian, a kôlvêla khan an puan inhai inzar ngai an ti.

⁵¹ Khan, nin Biakbuk kha nin son hrang rikipa, Levia irchihai khan insiat an ta, nin inzar nôk hrang khomin Levia irchihai khan an inzar hen hrang a ni; mi dang hong irrol tumhai chu thatpaihai hrang an ni.

⁵² Khanchu Israel mihaiin an omna hmun senga, a pa pâlin, an tam dân izirin riakbukhai chu siam an ti.

⁵³ Khannisian Levia irchihaiin chu Biakbuk vêla khan riakbuk irfûktir hrang a ni. Biakbuk kha enkol an ta, kha no’n chu mihaiin hong nâi an ta, Israelhai chunga ningmurna hong tungna lik a ti,” a tia.

⁵⁴ Khaang tak khan Israel mihai khan Rengpa’n Mosia kuanga a ihril pe lam ang takin an tho tâka.