MIKA 1 - PATHIAN LEKHABU IRTHIANG C.L. Bible (BSI)

¹ Juda rêng Jothama, Ahaza, Hezekia hai inlal laia Moreset mi Mika kuang Rengpa thu zuang tung, Samari khua le Jerusalem khua chungchâng thu a ihmu chu.

² Nangni nam murdihaio, nin rêngin inhre unglân; O irnêng le a sûnga om murdihaio, irngai roi: Rengpa pathian, Rengpa kha a biak in irthiang ata nangni doiin nin chungthu inhretu ni ri se.

³ Irngai u ta, Rengpa kha a hmun ata zuang suakin zuang chum a ta, irnêng hmun irsânghai kha a ichîl hrang a ni.

⁴ Mei kôla khuaihlu ang le rôla chêntâk ang dênin, tânghai kha a hnuaia khan zôi an ta, irhôrhai kha hong kik chat a ti.

⁵ Hihai murdi hi Jakoba-hai tho’nsualna sika le Israel in sûng mihai sualna sika a ni. Jakoba-hai tho’nsualna kha imo a ini? Samari a ini loi ma ni? Juda hmun irsânghai kha i ma ni? Jerusalem a ini loi ma ni?

⁶ Khasikin, Samari kha sûla thil siat om khôm angin siam ki ta, grep irhuan hmun ang dênin: khan, kha hmuna lunghai kha ivadung rôl tiang inhlumpai ki ta, a lungphûmhai kha inlang ki ti.

⁷ A millim siam chop murdihai kha inkhoi irnôi chit ni a ta, a notizuar hlohai kha meia hâlpai zit ni a ta, notizuar mana a ilâk khôm a nia, a notizuar mana pe nôk an ti.

⁸ Hi sika hin chap ki ta, khêk rak rak ki ta, irkhek le silkai boiin om ki ti; sihalhai angin inrung ki ta, va ringseihai angin inhrâm ki ti.

⁹ A sâbêhai kha indam thei ni ma: Judai ram a tung rak tâka; ki mihai, Jerusalem ten khom a itung a ni.

Râlhai Jerusalem an hong tung

¹⁰ Gath khuaa hril no unglân, chap viat no roi: Beth-le-Afra khuaa khan vâiphina irbual roi.

¹¹ O Safir hmuna omhaio, silkaiboi le inzak takin fe irhmang roi: Zanan hmuna omhai chu hong suak ngam no nihaia, Beth-ezel mihai chu kamangin an inhrûma, kha kha nin inhriatin chu zôk thei ual bîk chi ni mah ti inhria nin ti.

¹² Maroth mi khan dongtum sa chang a nghâkhmo tak tak a ni, Rengpa kuang ata thil saloi kha Jerusalem mikot kôl dênin a zuang chum thâk sikin.

¹³ O Lakis mi, tâli kha sakor hrâta khan kop ro; hi hi Zion nâinu sualna bulpui a ni, Israelhai tho’nsualna kha nangmaa hin a lei iom a ni.

¹⁴ Khasikin Moreset-gath kuanga khan inthâna thilpêk ni ipêk hrang a ni; Akzib inhai kha Israel ram inlalhai ta hrangin huangna ni a ti.

¹⁵ O Maresa mi, nangma neitu hrang ni kuang la hong hruai ki ti: Israel roiinpuina khan Adulam va tung a ti.

¹⁶ Irziat inkolin lân, ni nâi inditom takhai sikin ep inkol ro: râikoso angin irvoi inkol intam ual ro; ni kuang ata sala hruaiin an om tâka.