MATHAIA 24 - PATHIAN LEKHABU IRTHIANG C.L. Bible (BSI)

Jisua’n tempil siat hrang thu an sîrna

¹ Khan, Jisua a suaka, Tempil ata a fe laiin, Tempil inen hrangin ar chutirhai a kuang an honga.

² Ama khan an kuang en roi, “Thudik nangni ki hril, hitaka lung inkhat khom hi a hmuna om no ni; an rêngin paiin om zit an ti,” a tia.

Buaina le dengintheitirna

³ Khan, Jisua’n oliv tânga a toi laiin, a irchutirhaiin a bingin an hong irhmupuia, “Nin hril ta, hihai hi itika mo a itung hrang? Ni zuang nôkna hrang le rammual mongna hrang irsinsiana sinirkhêl kha i imo a iom hrang?” tiin an irdona.

⁴ Jisua’n an kuanga, “Tukhomin nangni an huang nona hrangin, irdîn roi.

⁵ Mi tamtakin, ‘Mesia kha ki nih,’ tiin keima irhming songin hong an ta, mi tamtak huang an ti.

⁶ Nin kôla irdoina thuthang lan hriat nin ta, khannisianlân, nin milung inbuai no roi. Kha thilhai kha chu a hong itung ngêt hrang a ni, khannisianlân, a mongna chu la ni no ni.

⁷ Nam le nam irdoi an ta, ram le ram irdoi an ti. Hmun tina châm tâk a ta, hnîngnu inhnîng a ti.

⁸ Khahai kha nâiha sê ar phut ta tihna a ni.

⁹ “Khanchu, deng nangni inthei hrang le nangni that hrangin nangni lan cheltir an ti. Keima sikin nam tinin nangni khôkmâk an ti.

¹⁰ Kha tika chu mi tamtakin an iamna masan an ta, irchel irhlômtir an ta, irkhôkmâk irhlômtir an ti.

¹¹ Khanchu, deipu dol tamtak la hong suak an ta, mi tamtak la huang an ti.

¹² Khan, sual a la pung hrang sikin mi tamtak lungthungna la dâi a ti.

¹³ Khannisianlân, tukhom a mong dêna tuang diar ka chu saninhringin om a ti.

¹⁴ Khan, hi Ram Thurchi Sa hi nam tin inhriatna hrangin rammual pumpuia ihrilin la om a ta, khanchu, a mongna hong tung a ti.

Intakna ichiom tak

¹⁵ “Khanchu, intakna ichiom porinche tak, deipu Davida lei insîr kha hmu nin ta, hmun irthianga khan ngîr hmu nin ti,” (khan a tep murdi’n chu a omzia inhre ri se).

¹⁶ Khanchu, “Judai rama omhai kha tânga rot ri sehai.

¹⁷ Mi, a in chunga om khom in sûnga a neinun la suak hrangin chum no ri se.

¹⁸ Mi, loia om khom a puan la hrangin kîr no ri se.

¹⁹ Kha nî khan chu inrâihai le nâite pom laihai chung chu a rik vang na!

²⁰ Nin rot hrang zoro kha phalbia mani, Sabat nia mani, a hong tung nona hrangin Pathian kuang chongchai roi.

²¹ Kha zoro dengthei inthang om hrang kha chu rammual irsiang ata atûn ten hin la om ngai mah, om khom om nôk ta no ni.

²² Khannisianlân, Pathianin kha sûnhai kha an bong ta ni no len vâng sian chu tûte hringin suak no nihai. A mi inthanghai sikin Pathianin kha sûnhai kha inbong a ti.

²³ “Khanchu, tukhomin nin kuang, en u ta, Krista chu, ‘Hi hi mani, so so mani,’ an ti khomin taksôn no roi,

²⁴ Krista dolhai le deipu dolhai an la isuak hrang a ni, khahai khan thei len vânghai sian chu inthanghai lua an huang theina hrangin irsinsiana le thilirkhêl inthang tho an ti.

²⁵ Irngai roi! A zoro a hong tung mân nangni ki lei ihril a ni,

²⁶ Tukhomin nin kuang, ‘En ta, ramchâra a om,’ an ti khomin fe suak no roi, ‘A chontan sûnga a om’ an ti khomin taksôn no roi.

²⁷ Mihriam Nâipa zuang nôk hrang chu kôlirtêka, sak tiang ata thang tiang ten irtêk ang kha a ni hrang sikin.

²⁸ “Khoa khom saruak omna rikipa raikosohai omkhôm an ti,” a tia.

Mihriam Nâipa zuang hrang thu

²⁹ “Khan, kha dengthei zorohai kha ar zoi le chu misa inthim a ta, tha vâr ta no ni, irvân ata ârsihai tâk a ta, irvân sinthotheinahai kha inhnîng a ti.

³⁰ Kha zoro tika chu irnênga nam tinrêngin chapin an rôp irchûm an ta, Mihriam Nâipa hi sinthotheina le roiinpuina irkhêl tak le irvân sûm laia a zuang hmu an ti.

³¹ Bekul inring tak tum ni a ta, khanchu, a vân vântîrtônhai kha rammual kil minlia tîr suakhai a ta, kôlkung rengata kiang tianga kôlkung dênin a mi inthanghai chu bukkhômhai an ti.

Theipui kung ata irchu hrang

³² “Khanchu, theipui kung om lam ata hi irchu hrang nin nei; a ôn a hong irnoia, a hna a hong incherin chu kholum a hong nâi tah ti nin inhriat ngai.

³³ Khaang dênin, nangni khomin khahai murdi nin hmu tika chu ama kha a zuang nâi tâka, mikot bula a om tah ti inhre roi.

³⁴ Thudik nangni ki hril, khahai murdi kha a tung mâka chu atûn laia mihai hi boi no nihai.

³⁵ Irnêng le irvân boi a ta, ki thu chu boi no ni.

Tukhomin a nikhua le a zoro an inhriat loi thu

³⁶ “Khannisianlân, kha nikhua le a zoro kha chu Pa ti no chu tûte’n inhre mahai, irvâna vântîrtônhai khomin, Nâipa khomin inhre mahai.

³⁷ Mihriam Nâipa zuang nôkna chu Nova dam laia ang khan ni a ti.

³⁸ Tuilian mân, Nova irkuanga a lût ni dênin an fâkin an nêka, dôngma pasal an irnei ngai,

³⁹ tui a hong liana, an rêngin an irhmang zit mâka chu imo a hong itung ite inhre mahai; Mihriam Nâipa zuang nôkna chu, khaang tak khan nih a ti;

⁴⁰ Kha tika chu mi inhni loia sin an ta, inkhat ihruaiin om a ta, inkhat imâkin om a ti.

⁴¹ Nupang inhni’n bu suk an ta, inkhat chu ihruai ni a ta, inkhat chu masan ni a ti.

⁴² “Khanchu, irtûng chianin om roi, itik nia mo nin Rengpa a izuang hrang inhre mak chêi.

⁴³ Khannisianlân, hi hi nin inhriat, inru hong hrang in neitu’n inhre sianlân, lei irtûng a ta, a in inmok no ni.

⁴⁴ Khasikin, nangni khom irtûng chianin om roi, nin sabei no lai takin Mihriam Nâipa a zuang hrang sikin.

Siahlo iamom le iamomloi

⁴⁵ “Siahlo iamom vâr tak, a pu’n a in sûng charêla, siahlo danghai zoro tina an fâk sem pe hranga hruaitua a isiam kha tu mo ni ni?

⁴⁶ An pu a honga, khaanga sin thoa siahlo a hong ihmu kha a vân a sa.

⁴⁷ Thudik nangni ki hril, a neinun murdi chunga a pu khan a zêk hrangin phun a ti.

⁴⁸ Khannisianlân, siahlo saloi a niin chu, a milungin ka pu chu hong lat no nih ti a ta,

⁴⁹ a siahlo chanpuihai kha lei zêm a ta, zu’nruihai laia fâkin in a ti.

⁵⁰ Khanchu, kha siahlo pu kha a tûng no lai tak le an hriat no zoro lai takin hong pe a ti.

⁵¹ A pu khan inhnot suakpai a ta, vârirlethai idong anga kha indong a ti. Kha khan chap le irkamnôina om a ti.