MARKA 2 - PATHIAN LEKHABU IRTHIANG C.L. Bible (BSI)

Zenginthî indam

¹ Khan, sûn iza tena mani chu Kapernaum a hong lût nôka, ina a om tih thu an thang tâka.

² Khanchu, pên tiang khom mikot kôl sip khakin mi tamtak an lei pungkhôma, an kuang thu a hrila.

³ Zenginthi inkhat, mi minliin an hong irzôna, a kuang an hong panpuia.

⁴ Mipui sika khan nâi thei mahaia, a omna irdîna a zâlna pumin an zun thâka,

⁵ Jisua’n an iamzia a hmu’n chu zenginthî kuang khan “Ki nâipa, ni sualhai ngaidam a ni ta,” a tia.

⁶ Dân irchutirtu senkhat toi sahai khan an lungrîlin an ngaituaa,

⁷ “Hi mi hin itho sika mo hianga a iti; Pathian a ihril insiat a ni hi te; Pathian ni no’n chu, tu mo sualhai ngaidam thei?” tiin.

⁸ Khaang khan an ngaitua tih Jisua’n an hriat zôia, an kuang, “Itho sikin mo lungrîla khaang kha nin ingaitua?

⁹ Zenginthi kuang khan, ‘Ni sualhai ngaidam a ni tah ti le thoiin lân, ni zâlna kha lan lân, ke’n fe roh,’ ti hi, a kho hi mo a ol ual?

¹⁰ Rammuala hin Mihriam Nâipa hin sual ngaidam theina a nei ti nin inhriat theina hrangin nangni ki hong inhriattir a ni,” a tia; zenginthi kuang khan,

¹¹ “Thoiin lân ni zâlna kha lan lân, ni in tiang kîr roh, nang ki hril,” a tia.

¹² Khanchu, a thoia, a zâlna kha a lâka, an rênga mit hmua a suak zôi tâka; an rêngin ar khêl an ti tak taka, “Hiang hi ei la ihmu ngai viat loi kêng,” tiin Pathian an inpâk tâka.

Jisua’n Levia koi thu

¹³ Khan, dîl tiang khan a fe nôka, mipuiin an hong pan sup supa, ama’n a lei irchuhaia.

¹⁴ Khan, a fe malamin, Alfaia nâipa Levia kha khâzana irfuangna hmuna toi a hmua, “Ni zui roh,” a tia. Ama khan a thoia a zui tâka.

¹⁵ Khan Jisua chu Levia ina khalâi a ota, irchutirhai kha khâzana irfuangtuhai le mi sual tamtakin Jisua le irchutirhai an hong otpuia. Khan ama zuipuhai chu tamtak an nia.

¹⁶ Farisaihai laia Dân irchutirtuhai khan khâzana irfuangpuhai le mi sualhai khalâi otpui an hmu’n chu a irchutirhai kuang, “Itho sika mo khâzana irfuangpuhai le mi sualhai laia a iot sa?” an tia.

¹⁷ Jisua’n kha kha an hriatin an kuang, “Mi hrisêlhaiin daktor innang ngai mahaia, mi irveisiahai kêngin an innang ngai a ni. Mi felhai donsui hranga zuang ni ma unga, mi sualhai donsui hranga zuang kêng ki ini,” a tia.

Bu nghei chungchâng thua irdonna

¹⁸ Johana irchutirhai le Farisaihai bu nghei ni khan mi tuhai manni an honga, a kuang, “Itho sika mo Johana irchutirhai le Farisai irchutirhaiin bu an ngheia, ni irchutirhaiin chu an inghei loi?” an hong tia.

¹⁹ Jisua’n an kuang, “Irneinaa mikhualhai kha bu nghei an ti, nin itûng ma ni? Ni thei no ni! Moineipu an kuang a om sûng kârka chu bu nghei no nihai.

²⁰ Khannisian, Moineipu kha an kuang ata hruai zoro la om a ta, kha tika chu la nghei an ti.

²¹ “Tukhomin puan milui phoa, puan thar irhlek leh pho ngai mahai, pho ta sianlân, a thar khan puan milui kha kai set a ta, chet nôk ual ual a ti.

²² Tûte’n Uain thar khom savun kok miluia thun ngai mahai, thun ta sianlân, uain thar khan savun kok kha mût set a ta, uain le savun kokhai kha hmanghmunboi chang zit a ti. Khasikin, uain thar chu savun kok thara thun an ti,” tiin a sâma.

Sabat chungchânga irdonna

²³ Jisua chu Sabat niin bubil hmunhai a hroa, a irchutirhai khan fe malamin bu vûihai kha an kai dûka.

²⁴ Farisaihai khan a kuang, “En ta, itho sika mo Sabat dân iphal loi an itho?” an tia.

²⁵ Jisua’n a kuang, “Davida’n, a rualhai le phîngchâma fâk hrang an nei loi laia a thil tho kha nin itep loi mo?

²⁶ Abiathara Ochai inlaltak a ni laia Pathian ina a lûta, Ochaihai vai fâk thei bai kha a fâka, a rualhai khom a ipêk sa thu kha?” a tia.

²⁷ Jisua ngêtin, “Sabat hi mihriam ta hranga siam a nia, mihriam hi Sabat ta hranga siam ni mah.

²⁸ Khasikin, Mihriam Nâipa hi Sabat chung tena khom hin Rêng a ni,” a tia.