LEVI DÂN 22 - PATHIAN LEKHABU IRTHIANG C.L. Bible (BSI)

Thilinhlan irthiang

¹ Rengpa’n Mosia kuang:

² Arona le a nâihai kha hril ro; “Israel mihai ki makunga thil ser an hong inhlanhai kha kuluk takin lei dong sianlân, ki’rhming mualinphoitir no ri se, kei hi Rengpa ki ni.

³ Israel mihaiin keima hranga thil irthiang an hong inhlan kha nin irchi thiaihai an porinche laiin an tônin chu ochai ata inmatir hrang an ni; kei hi Rengpa ki ni.

⁴ Arona irchi, vuna pân saloi irvei mani, a ser ata thil suak nei mani chu a porinchena a boi mâka chu thilinhlan irthiang hi a itôn hrang ni ma. Ochaiin mithi ruak tôntu a tônin mani, ama chi a tâkin a porinche tâk a ni.

⁵ A boka irvâk sâ porinche mani, mi porinche mani a tôn khomin a porinche a ni; tui a’rsil mâka chu thilinhlan irthiang fa thei no ni.

⁶ Ochai porinche tâk ka chu khohloi dênin a porinchea, tui a’rsil mâka chu thilinhlan ser irthianghai kha fa thei no ni.

⁷ Misa a tâk tena irthiang a ta, thilinhlan irthiang kha fa thei ta a ta, a dongtum hranga ti a ni sikin.

⁸ Sa thi sai tâk mani, sâ isê mani chu a ifâk hrang ni ma, kei hi Rengpa ki ni.

⁹ “Thil tho hrang dân ki itihai hi an izôm zit hrang a ni, an zôm nuam no’n chu a mô pêl an ta, thi an ti; anni indangtu Rengpa ki ni hi.

¹⁰ Ochai in sûng mihai vaiin thilinhlan irthiang hi fa thei an ta; ochai iompui mani, mi sin hranga om mani, mi dang tukhomin an ifâk hrang ni mah.

¹¹ Ochai suak, ama poisa le ngeia a irchôk mani, a in sûnga suak ngei mani chu fa thei an ti.

¹² Ochai nâinu khom ni sian, ochai ni loi pasal a neiin chu thilinhlan irthiang hi fa thei no ni.

¹³ Pasal isûn mani, imâk tâk mani, nâi nei loia a pa ina lût nôk chu fa thei a ti; ochai irchi vaiin fâk irthiang a ni.

¹⁴ Ochai irchi ni loiin ochai dongtum thil irthiang kha lei fa pal sianlân, a ithuan zit hrang a ni, hmun ringaa hmunkhat a ipêk bel hrang a ni.

¹⁵ Ochaihai khan thilinhlan irthiang hi an porinchetir hrang ni ma.

¹⁶ Fâk loi hrang irchihai an infâktir hrang ni ma; an fâkin chu thiamno chang an ti, tuang an ti. Hi thilinhlan irthiangtu Rengpa kha ki ni,” a tia.

¹⁷ Rengpa’n Mosia kuang:

¹⁸ “Arona hai, a nâihai le Israel mihai chu hril ro: Israel mi’n mani, an laia om nam dangin mani, chonginkungna thilinhlan mani, mâni nuam thua thilinhlan mani, Rengpa kuang hâlirvôm hrang an hong chôiin chu,

¹⁹ a lei pom theina hrang chu sehrâtchal mani, belra mani, kêl mâni, a chal hmêlveiloi a ni.

²⁰ Hmêlveina nei chu inhlan khomsian Rengpa’n lei pom no ni.

²¹ “Mi’n chonginkung suana hrangin thilinhlan, mâni nuam thilinhlan mani, irpôlkhômhai thilinhlan hrangin Rengpa kuang an hong inhlanin chu, an sâ inhlan chu hmêlveiloi a ini hrang a ni; khanchu, lei pom thei a ti.

²² Sa mitcho mani, ke’nbâi mani, sirirdul mani, pân hnâi lâk nei mani, a vun phâr mani, Rengpa kuang inhlan no ro, a maichâma inhlan sa no roh.

²³ Nuam thilinhlana khan sehrât mani, belra mani, irningloiin khom, inhlan thei a ni; chonginkung suana hranga thilinhlana rêk chu pom ni no ni.

²⁴ Sa tillâk tho mani, inolkhiak mani, pop iliam mani, zêm irdulhai ang mani chu Rengpa kuang inhlan hrang ni mah. Nin ram sûnga hiang hi khap a ni.

²⁵ “Nam dang sâ chu fâk hrang thilinhlan inhlan hrang ni ma; khaang inhlan chu hmêlveiloi nei anga tep sa hrang a ni, pom ni thei no ni.

²⁶ Rengpa’n Mosia kuang,

²⁷ Belra mani, sehrât mani, kêl mani, a chal chu a pui kôla sûn sari om a ta, a sûn riat nî ata chu hâlirvôm hrangin hmang thei ni ta a ti.

²⁸ Sehrâtpui le a tê, belrapui le a tê, kêlpui le a tê sûn khata thilinhlana inhlan hrang ni mah.

²⁹ Lômthu hrilna thilinhlan nin hlanin dân ang takin itinrêng tho ro, pom thei ni a ti,

³⁰ fa zit unglân, a tûka hrangin hôi no roi.

³¹ “Ki thupêkhai hi zôm unglân, zôm roi, kei hi Rengpa ki ni,

³² ki’rhming hi nin iporinchetir hrang ni ma, Israel mihaiin chu ki’rthiang ti hi an inhriat hrang a ni, nangni indangtu Rengpa kha ki ni.

³³ Nin Pathian ni hrangin Aigupta ram ata nangni ki hruai suak a ni, kei hi Rengpa ki ni,” a tia.