KOLOSA 1 - PATHIAN LEKHABU IRTHIANG C.L. Bible (BSI)

Chubai mûkna

¹ Pathian nuamlam anga Krista Jisua Tirtôn Paula le ei urêngpa Timothea khan,

² Kolosa khuaa mi irthiang om Kristaa urêng iamomhai kuanga khan, Pathian ei Pa kuang ata lungkhamna le irngeina nin kuang om ri se.

Kolosa Kristianhai sika Paula lômthu

³ Nin ta hrangin kin chongchai rikipin ei Rengpa Jisua Krista Pa, Pathian chu, lômthu kin insîr ngai.

⁴ Krista Jisua nin iiam tâk thu hai, mi irthiang murdi nin lungkham tâk thuhai kin lei inhriata.

⁵ Thurchi Sa thutak nin inhriat ata sabeina nin lei nei tâk sika a ni, kha sabeina kha nin ta hrangin irvâna sia insa a ni.

⁶ Nin kuang Thurchi Sa a hong tunga Pathian lungkhamna kha nin inhriat infel nî ata thil om dân ang khan rammual ram tina Thurchi Sa khan ra a suakin a indarh ta a ni.

⁷ Kin ta hranga Krista sinthotu iamom Epafra; kin suak chanpui inditom tak, Thurchi Sa hriltu khan,

⁸ Irtha zâra lungthungna nin nei thu hi a ni hril a ni.

⁹ Khasika khan irtha tiang vârna le inhriat thiamna tinrêng nuamlam nin inhriat irkip theina hrangin, nin thurchi kin inhriat ni ata chongchai le ngên pe mong ma ung.

¹⁰ Rengpa mi nin rukin, lam tinrênga inhriatnaa nin irsôn inlian theina hrangin kin ngên ngai a ni.

¹¹ A sinthotheina roiinpui tak ata suak irzukna khan lam tinrênga sôina le tuangdiarna nei hrangin nangni inhrât a ti.

¹² Khanchu mi irthianghai le a ram vâra irchon nei inruka siamtu Pathian kha raifân takin lômthu hril thei nin ti.

¹³ Ama khan inthim irchamneina ata a ni san suakin, a Nâipa lungthung taktu rama khan a ni hruai inlût ta a ni.

¹⁴ Nâipaa khan irtan suak ei nia, ei sualhai ngaidam a ni ta.

Krista mizia le a sintho

¹⁵ Krista kha hmu theiloi Pathian angpui, thil siam murdi mahruaitu a ni.

¹⁶ Amaa khan itinrêng, irvâna om hai, irnênga om hai, hmu thei hai, hmu theiloi hai siam a nia; rêngtoihmun hai roirêlna hai, inlalna hai, irchamneina hai, itinrêng hi ama sika siam a nia, ama ta hranga a ni sa.

¹⁷ Ama chu itinrêng om mâna, amaa khan itinrêng a irnghat sa a ni.

¹⁸ Ama kha Koiindang hi a takpum a ni sa; ama kha itinrêng bul a nia, itinrênga inchungtak a nina hrangin mithi laia thoinôkna mahruaitu a ni.

¹⁹ Amaa Pathian nina irkip a om hi Pa nuamlam a ni.

²⁰ Krista sikin Ama leh a’rngeitir nôka, Krosa a Nâipa thisen khan irngeina a siama, Krista sika khan irnênga omhai, irvâna omhai kha Ama leh irngeina a siam ta.

²¹ Nangni khom tiana khan chu Pathian ata mikhual nin nia, thil sual nin irngaituaa nin tho ngai sikin râl nin ni.

²² Nikhomsianlân, atûn chu A Nâipa taksa thina sikin a rual hrangin nangni a siam tâka, a makunga irthiang le demnaboi le sêlnaboia nin om theina hrangin, Pathianin Ama leh nangni a irngeitir ta a ni.

²³ Khanchu iamna khan om mai unglân, det taka ngîrin Thurchi Sa nin inhriat sika sabeina nin nei tâk kha irtôl irhmang no roi. Thurchi Sa kha irvân hnuaia thil siam murdi hril a ni ta, kei Paula hi kha sinthotua siam ki ni.

Koiindang ta hranga Paula sinthôna

²⁴ Nangni sika ki tuangna hin atûn hin ki râi a ifân a ni. A takpum, Koiindang ta hranga Krista tuang bakhai kha ki takpumin ki isunzom mai a ni.

²⁵ Pathian thu le a lei inkung kha nin kuang irkip taka inpuang hrangin Pathianin sin a ni pêka, Koiindang sinthotu’n kei hi a ni isiam a ni.

²⁶ Mi murdi ata kumkhuaa a lei ithup ngai, thu’rthup kha, atûn a mi irthianghai kuang an langtir ta.

²⁷ Kha mihai kuang khan Nam tin ta hranga thu’rthup roiinpui le hlu tak kha Pathianin inhriattir a nuam ngei a ni; kha thu’rthup kha, Krista nangnia om, roiinpuina sabeina san kha a ni.

²⁸ Krista thu kha mi murdi laia kin hrila, Kristaa ei puihling chit theina hrangin vârna tinrêngin mi tin kin irchuin kin kaihruai ngai a ni.

²⁹ Kha sintho hranga khan Krista hrâtna, keinia sin ngai kha hmangin kin beia, a sân irnak songin kin isin a ni.