JOBA 8 - PATHIAN LEKHABU IRTHIANG C.L. Bible (BSI)

BILDADA

¹ Khanchu Bildada, Sua mi’n hiang hin a tia.

² Idôr ten mo hiang hin ni iti hrang? ni chong a na bâka?

³ Pathian irêl sai tâk hi an danglam nôk ngai mo ni isôn? Itinrêngthothei hin a dik a iti hi a thûl ngai mo ni isôn?

⁴ Ni nâihai ama chunga an sualin chu, an sual man chu intuangtirhai a ti.

⁵ A dik takin Pathian ni zonga, Itinrêngthothei kuang nghina ni siamin chu, ama’n nang irngaitua ngêt a ta, sat nang vur ngêt a ti.

⁶ Irthiang le diktakin ni om maiin chu, Pathianin nang san a ta, ni insûngkua khom sat nang vur a ti.

⁷ Ni iphutna chînte ni khomsian, inhnunga chu hong lian a ti.

⁸ Tianlai sûnhai hor ngaitua’n lân, an pi le pu thil inhriathai kha hong sût ngaiin lân.

⁹ Mizâna nâihai dôr kêng ei nia, ite lan hre mak me, irnênga ei om sûng hi irhlîm ang mai a ni hi.

¹⁰ Kha laia thuhai khan ni le’rchutir a ta, an inhriat insahai kha an ihril suak loi hrang ma ni?

¹¹ Tuichir ni loia hin tuichir hloi mo a mông thei? Tui om loinahai hin sûl hring thei ngai ma.

¹² Sâtpaia, hmang hrang a la ruk mân khom, Tui a kang pe’n chu, hloisûl danghai nêkin a thêm inmân ngai.

¹³ Pathian a nih ti inhre loihai khom, khaang khan an om ngaia, Pathian inhre loihai chu an beidong a ti.

¹⁴ An irnghatna chu a derindêpa, Âiom râng ang mai a ni.

¹⁵ Kha kha irhnêlin lân a det hrang ngân mo? va chelin lân a idet hrang mo?

¹⁶ Misa suak mân chu a hringa, a tuaihai chu irhuan sûnga khan a hong zapa.

¹⁷ A’rzunghai chu irnêng rîla lûtin lung a kher indeta.

¹⁸ Khannisian an phôipaiin chu tûte’n lung chunga mông sôn ngai mahai.

¹⁹ Irngai ro, hi hi a lampui râifânna chu a ni, Nêngpila irthokin hong mông suak a ti.

²⁰ Irngai ro, Pathianin misa chu pai tha no nia, thilsual thohai ngai chu chel inngîrtir ngai mah.

²¹ Râifân takin nang lan nuitir a ta, lômtakin om nôk ni ti.

²² Ni râlhai chu inzakin kûn chian an ta, mi dukdakboihai puan in omna inkhôm om ta no ni.