JOBA 7 - PATHIAN LEKHABU IRTHIANG C.L. Bible (BSI)

¹ Irnêng chunga mihriamhai hi, sin intak taka sin zong hrang an ini loi mo nin isôn? A dam sûng chu irhlo fâk anga sin hrang a nih ti nin inhriat loi ma ni?

² siahlo dâihlîm irzuk ngôi ngôi le irhlo fâk a hlo nghâktu angin:

³ A tha tin hin ki’rtha a’rzal mai ngaia, a zân tin beidongna a tung ngai.

⁴ Ki zâlin, itika mo ki thoi ki tia; Khannisian, zân hi a sôttak taka, Zîng khovâr nghâkin in thei loiin hongirlet var letin ki oma.

⁵ Ki taksa pumpui lak a pânin a zor zoi tâka, ki vunhai inkhirin a chila vun tharin a hong om ta.

⁶ Ki dam lai sûnhai hi puan khôngtu’n a puan không bit inrangin an rang tâka, sabeina dang boiin a hek inrang a ni ta.

⁷ Ki hringna hi phâivua ang a nih ti inhre’n lân, ki mit hin thil sa zel a ihmu thei ta loi a ni.

⁸ Atûna a ni hmutu hin ni hmu ta no nia, ni hmu tum khomsian ni hmu thei ta no ni.

⁹ Sûm ar kianga, a irhmang ang hin Seol-ah zu fe tâkhai chu suak nôk ta ngai mahai.

¹⁰ In sûng tiang hong kîr ta no nia, a hmunin ama inhre nôk ta no nihai.

¹¹ Khasikin, ki hmûr insum viat no ninga, milung hoiloi takin hril ki ta, lungrîl natakin chiar ta ki ti.

¹² Tuipui ual mo ki nia, tuipui rûlpui ang mo ki nia? A ni hrung hrang ni ni isia pe?

¹³ Zâlhmuna zâlin sôl irngam ki tuma, ki natnahai mo a hoi ual, ki tia.

¹⁴ Nangma’n irmang ichiom pahai ni nin phantira, inlârnahai hmangin ni nin chitira,

¹⁵ hianga natna tuang puma om mai nêkin chu, ki hringna hin irvit that hi a inthang ual a ni ta.

¹⁶ Hringna hi ki hnông ta, dam sôt nuam ta ma unga, ki hringna hi ite omzia nei ta mah ni masan ta roh.

¹⁷ Mihriam hi imo a ini, ni irngaisâng hi? A chunga ni lungrîl ni’rnghata.

¹⁸ A sûn tin ni kana, itiklai khom hin ni ifia mai ngai?

¹⁹ Pathian keima tiang en loi rêng rêngin om ngai mak chea, michil invol kâr sûng lua, ni ensan loiin om mak chea?

²⁰ Nang mihriamhai enkoltu, ki sual a ni tâk khomin i zât tak hi mo ni chunga ki itho? Itho mo nangma irsinsiana hrangin ni ni isia? Itho sika mo ni ta hrangin puakrik tak ki ni tâk hi?

²¹ Ithoa mo ki sinsiatna ni ni ingaidam thei loi, ki dikloinahai ni ilâkpai loi hi? kei chu thi duai hrang ki ni tâka, Ni zong khomin lân, ki iom loi hrang a ni ta.