JOBA 6 - PATHIAN LEKHABU IRTHIANG C.L. Bible (BSI)

JOBA

¹ Khanchu Joba’n hiang hin a sâma,

² “Ki chardongna hi varh thei ni sianlân, ki vânduainahai khom hi tûla varh thei ni sianlân chu na!

³ Tuipuia chiai nêkin rik a ti; khasikin ki hê a isuak thei loi a ni.

⁴ Itinrêngthothei Pathianin thalhai leh a ni suna, a tûrin ki taksa a ni zô zita, Pathian chitna’n ki sip ta.

⁵ Rama sakuartungin sûl a fâk laiin, an hrâm ngai moa? Sehrât khom fapôl a fâk laiin inhrâm ngai mah.

⁶ Irthiboi thil hi michi boiin fâk thei zât ma ni? Ârtui kôr hin ite a irhnikna a om mo?

⁷ Kha bu kha irzukna zel nei ma unga, ki ta hrangin nêk intirom tak a ni.

⁸ O, ki izonghai hi hmu thei inlân chu, Pathianin ki inuam lam hi ni pe thei sianlân.

⁹ Pathianin ni’rnôitir chit nuamin, a kutin ni tan irnôi chit khom sian!

¹⁰ Ki milung la’rngam mai a ti, irkhol loiin a na tuang khom inlân, lôm mai ki ta. Pathian chu a’rthiang ti kin hriata, a thupêkhai chu hnôl viat ma ung.

¹¹ Ki hrâtna hi imo a nia ki hong inghâk mai hi? Sabeina dang nei loi hi imo ki dam nasan?

¹² Ki hrâtna hi lung anga ngar mo ki ni? Ki taksa khom hi dâr thîr ang ma ni?

¹³ Keima hin irsongpui hrang nei ma ung, changpui hmûna dang nei ta ma ung.

¹⁴ Irzal taka om tâk chunga khan, lungkhamna a inei hrang a ni. Itinrêngthothei hnung songsantu chunga khan.

¹⁵ Ki urênghai chu vadungte angin an ni huanga, vadungte a tui rel irhmang ang an ni.

¹⁶ Tuipui dung ivur tuia dum ul, vadung kha a hong kanga, a hong duka, ivur irbukna kha,

¹⁷ a lum tena chu ar hmang zôi ngai. An omna ata kha ar hmang zit ta.

¹⁸ Khual inzinhaiin tui zongin an irvâk ang hi a nia, ramchârnaa khan irvâkin an irhmang ngai a ni.

¹⁹ Tema rama bepâr thohaiin an zonga, Seba rama khual inzintuhaiin chu hmu ngêt hrangin an sabeia;

²⁰ sabei ngita an izong chu hmu thei loiin, beidong takin an ikîr nôk a ni.

²¹ Ki chunga hiang hin nin ni ngai, ki siatna tonghai nin hmua, nin ni chia.

²² Thilpêk zongin, nin sum le pâi man boiin ni pe roi moh nangni ki ti ngai.

²³ Râlhai kut ata ni sansuak hrangin mani, ti nangni ki ngên ta mo? Ni opbêtuhai kut ata nir tansuak roh mo ki ti ngai.

²⁴ Ni’rchutir unglân, le’rngaitua rong, ki dik loina nin hril roi.

²⁵ Thudik hin mi an hnê ngaia, khannisian an ni isêlna hi, sêlna chanlamboi mamai mo ni ma?

²⁶ Mi sêl nuam a nih ti’n nin ni insâpa, sabeidong taka ki itihai hi, ki iti papai mo nin ni isôn?

²⁷ Nâi farahai chu lilâmin nin zuarhaia, nin rualsahai khom a zuar nin nuam ngaia.

²⁸ Atûn hin ni hong en hi roi, nin makunga irdôi ual no ning.

²⁹ Irlet unglân, thil dikloi tho ta no roi, ki thu irngaitua infel roi, ki thu hi a dik a ni.

³⁰ Ki ihrilhai laia hin a dik loina nin inhriat mo a oma. Thil saloi chu keima khomin kin hriat infel thei dua?.