JOBA 36 - PATHIAN LEKHABU IRTHIANG C.L. Bible (BSI)

¹ Elihua’n a hril maia,

² zoro sôtloite nir ngai pe’n lân, nang la hril hi rong, Pathian irhmingin hril hrang ki la nei intam.

³ Kin hriatnahai la hong irchunkhôm nôk hi rong, A ni siamtu dik lam târinlang ki ti.

⁴ Ki thuhril hi minlak ni mah ti inhre ro, Inhriatna irkip neitu kuang ni om a nih ti inhre’n lân.

⁵ Irngai ro, Pathian chu a hrâttak a nia, tûte hnuaisia ngai ma, Lungrîl inhriatna roiinpui tak a ni.

⁶ Mi pualoihai chu hôihai ngai maka, Mi ihnuaisiahai laia diktakin roi a rêl pehai ngai.

⁷ Mi felhai chu irnghil ngai maka, Rêngtoihmuna rênghai kuang kumtuangin an toitira, chôiindômin an om ngai.

⁸ Khannisian mihaiin kol an irbuntirhaiin chu, Hnuaisiana hrui leh khit an ni’n chu,

⁹ An sintho le insiatnahai an hriattirhaia, An lei mualinphoinahai leh,

¹⁰ Irchutirna tiang an mikuar a vâra, An sual irlet hrangin thu a pêka.

¹¹ Thu zôm taka a sin an tho’n chu, An dam sûng chu lungthi takin om thei an ta, Hoitakin lêng an ti.

¹² An irngai no’n chu khandaia that ni an ti, Tûte hmêlhriat nei loiin thi an ti.

¹³ Lungrîla Pathian inhre loi mihaiin chu, ningmur an irtika, A soisakhai khomin, changpuina zongin khêk nuam mahai.

¹⁴ Mi porinchehai lai ata an vânglaiin thi an ti.

¹⁵ Ama khan intak tuanghai chu intak tuangin a kêlsuahaia, Hnuaisiana hmangin an mikuar an vârtira.

¹⁶ Ama’n chu chardongna hmun rengata a hruai suak ngaia, hmun irthôl taka, tûte inbuai loiin an omtir thei. A bu dâi tang khom kha tuitak a chang thei.

¹⁷ Khannisian nangma chu mi sualhai sêl ni tuanga, Sêlna le roirêl dikna’n nang a ichel a ni ta.

¹⁸ Ningmurna sikin hnuaisiana lungrîl irput pal ni ti. Irtanna hlutna hin nang hruai no ri se.

¹⁹ Chardonga ni om loina hrangin, Ni hrâtna irthahrui kha a iruk mo ni ma?

²⁰ Zân chu nghâkhmo no roh, Mihaiin an omna hmuna an irhmang zoro a ni ta.

²¹ Irdînin lân, dik loina lam masan roh. Hi hih intak tuang nêka ni inthang a nia.

²² Irngai roh, Pathian chu, sinthothei chungirchuan inhnê takin a izoi tâk a ni; Tu mo ama anga mi’rchupu om?

²³ Tu mo a sintho hrang dân irfûktir pe? “Ni itho indik loi a ni,” tu mo a ti thei?

²⁴ A sintho roiinpuihai hi inhre maiin lân, Mihaiin inpâkna hla sakin an ichôiindôm ngai a ni.

²⁵ Mi tinin ama kha an ena, Hlatak ata an ithîr mai a ni.

²⁶ Irngai ro, Pathian chu roiinpuitak a ni, ei lei inhriat no khomin. A zoro sôt dân khom suisuak thei zât ni mah.

²⁷ Rotui irmal tâkhai khom an hultir theia, Tui porche khom rotui irthiang an changtir theia.

²⁸ Irvân ata a zuan thotir theia, Mihriamhai phâ hrangin a itho ngai a ni.

²⁹ Sûm irlôi dânhai khi mihriamin an hriat thei ngai mo? A’rbukna hmun ata khua a inritir dânhai hi?

³⁰ Irngai ro, chung tiang kôl a’rtêktir zor zora, Tuikhanglian chunghai chu an thimtira,

³¹ Hiang hin mihai thu a rêl pea, fâk hrang tamtak a pêkhai ngai.

³² Michêk kha a kut leh an lêna, A ititak dêng hrangin an tâktir ngai.

³³ Khopui irhâiin a chungchâng an puanga, Sâhai khomin a nâi lam chu an inhriat thei ngai.