JOBA 30 - PATHIAN LEKHABU IRTHIANG C.L. Bible (BSI)

¹ Atûn chu keima nêka nâipangtehaiin an nin nuisana, An pahai khom ki insûng sa enkol ngai an nia, Ui laia om hrang lua ki inuam loihai khan.

² Irtha ngûi tâk mihriam pâl an nia, I sin ni tho pe hrang khomin an irzal zoi a ni ta.

³ Phîngchâm le irsam pumin thing irzung an khela, Ram hnuaia, ite boina hmuna an irvâk ngai a ni.

⁴ Ramchâra sûl an inpota an fâka, Juniperthing irzung bu’n an ngama,

⁵ Mihai lai ata irzûl an nia, Inru angin an irzûlhaia.

⁶ Irhôr le irhôr kârhaia an oma, khurpadop le lungpui kârhaia.

⁷ Hnîmbuk hnuaihaia an om rem ruma, Mei ikâng sel laia an irbîka.

⁸ Mi itep loi le irngai ta loi, Mihriama tep inruk ni ta mahaia.

⁹ Atûn chu hla’n an nir khena, An irkam innôtna’n an ni hmang ta.

¹⁰ An nin tira, ki kôl ata an irdîna, Ki hmâia nin chilthuan khom an ngam ta.

¹¹ Pathianin ki hrâtna a ni lâkpai pea, Khasikin ki thu hi ite bêin bê ta mahai.

¹² Ki chang tiang mipualoihai an hor siama, ki ke an ni pheta, Ki siatna hrang an zonga.

¹³ Kin tânna hranghai an insiata, ki vânduaina an ni bôk pea, Tûte’n khaphai mahai.

¹⁴ Kulbang chimna laia an hong lûta, A chimhai khan a ni del phaa.

¹⁵ Thil ichiom takin a ni bôma, Mi ni inzânahai chu phâivua angin a fe zoi ta. Ki râlvânsatna khom sûm angin a fe zoi ta.

¹⁶ Atûn chu ki ithi hrang a ni ta, Tuangnahai lakin nin tha maka,

¹⁷ Zân khovârin ki ruhai khom a na zoi ta; A nin rêthai hi boi thei ta mah.

¹⁸ Ki natna hin ring zeng angin a nin rêta, Ki silkai khom a isiat zoi a ni ta.

¹⁹ Pathianin tuichira a ni pai tâka, Irvut le nêngpil angin ki om rak ta.

²⁰ O Pathian nang ki koia, ni sâm mak chea, ki ngîr khomin ni en mak chea.

²¹ Keima iti ite bê’n ni bê ta mak chea, Irdîn viat loiin ni ni soisaka.

²² Nangin phâivua ni nin sêmtira. Ruapui inrik kâra ni ni siaa.

²³ Nangin ni that ni ta, mihringhai omna hranga ni indangna khan, Ni hruai ni tih, ti kin hriat.

²⁴ A siat thei dôr siat zoia hin imo ni ni ilo hrang, Ite tho thei ta loi, Lungkhamna zongtu chunga hin?

²⁵ Buaina tonghai hrangin ki ichap moh ni ma? A’rsamhai lung ki inkhamhai loi ma ni?

²⁶ Thil sa ki tûng laiin thil saloi ki chunga a tunga, A vâr ki nghâka, inthim a changa,

²⁷ ki ningmurna hi dâi thei ta maka; Intak tuangnahai hin a ni de ta.

²⁸ Inthim kâra ki fea, misa vâr boiin, mipuihai laia ngîrin changpuina ki zonga.

²⁹ Sihalhai sûngsuak kêng ki ang ta, Ostrich vâhai hranga rual sa ki ni.

³⁰ Ki vunhai a duka, an lôngin ki taksa a ilum hut hut a ni ta.

³¹ Ki perkhuang irhâi lei hoinahai kha, ki theihle irhâi khom chapna’n a sip zoi ta.