JOBA 28 - PATHIAN LEKHABU IRTHIANG C.L. Bible (BSI)A vârna an inpâk 1 Tangkarua laih suakna hmun a oma, Rângachak irthiangtirna hmun khom a om. 2 Thîr chu irnêng ata lâksuak a nia, Dâr sen chu lung hâl inhmin ata suak a nia. 3 Mihaiin inthimna hin an invârtir ngaia, khur inthûktak takhai hin an lûta, inthimna kâra lung omhai chu an lâk theina hrangin. 4 Mi om loina hmuna khur an choia, A chung tiang an irlôi khomin inhre loiin. Mi inhriatpuihai loiin an irkhâia. 5 A’rlangna tiang chu bu songna reng a anga. A sûngrîl rêk chu mei ikâng reng a ang. 6 Irnêng sûnga lung omhai chu Safir lunghlu a nia, Rângachak di a kopa. 7 Ama omna kha chu râikoso khomin inhre thei mahai, Irmu khomin hmu thei ngai mahai. 8 Ram sahrâng danghai khomin sir thei mahaia, kâmkeibaknei khom fe ngai mahai. 9 Mihaiin lung ngar chang chu an lâka, Tânghai chu a bul phutna ata an laia, 10 Lungpui khom an inverhaia, thilhlu ta tak an hmu doka. 11 Tui khom a fe hmu loiin thil irlang thei loihai, an inlangtira, 12 Khannisian vârna kho tiang mo an ihmu hrang. Inhriat theina chu khôn mo a iom hrang? 13 Mihriamin a hlu lam inhre mahai, Mi hringna rama hin hmu thei ni no ni. 14 Tui inthûkhai khomin, “Kin kôla om mah,” an tia. 15 Rângachak leh irchôk thei khom ni mah, A man hrangin tangkarua varh zoi zât khom ni mah. 16 Ofir rângachakin phâk zât ni maka, Onik le safir lunghlu khomin phâk zât ni mah. 17 Rângachak le lung irfîmin insiat thei ni maka, Rângachak enhoi ta tak leh thûl thei khom ni ual mah. 18 Koral le Krustal lunghlu leh irkhî thei khom ni mah. Vârna man chu lunghlu manhai nêkin a itam a ni. 19 Ethiopia rama lunghlu topaz khomin pha maka, Rângachak irthiang nêkin a hlu ual. 20 A ni vârna chu khô tianga irthoka om mo a ini? Inhriat theina chu khôn mo a iom? 21 Thilhring inkhat lua’n hmu theiloia irthup a ni, Chung lêng vatehai ten lua’n an ihmu thei loi a ni. 22 Irhmangna le thina’n, “A’rhâi chu kin mikuara kin inhriat ngai,” an tia. 23 Pathian vaiin a lampui chu an hriat, Ama vai kêng a omna hmun inhriat thei. 24 Nêngpil hek dênin a thîra, vân hnuaia thil tinrêng an lang vinga. 25 Phâivua le tui hrâtlamhai ar khi lai khoma khan, 26 Rotui tho hrang dân an sâp laiin, khonri le kôlirtêk lam a siam lai khan. 27 Vârna chu a hmua, an puanga, an dettira, a suisuaka. 28 Mihriamhai laia, “Irngai ro, Rengpa chi hi vârna a ni, thil saloi mâksan hi inhriat theina chu a ni,” a tia. |
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
Bible Society of India