JOBA 27 - PATHIAN LEKHABU IRTHIANG C.L. Bible (BSI)

JOBA

¹ Joba’n a thuhril a sunzoma, hiang hin a tia;

² Ki theithiamna thu lâkpaitu, ki’rtha beiindongtirtu, Itinrêngthotheitu Pathian irhmingin ki hril.

³ Ki dam sûngin Pathianin ki hnâra phûk a sia kâr ka chu,

⁴ ki hmûrin thu chanlamboi hril no ni, ki milei khomin minlak tho no ni.

⁵ Theiloi chang no ninga, ki dam sûng chu ki dikna hi ma viat no ning.

⁶ Ki dikzia hi inhre mai ki ta, intha loiin ite inzak no ning, ki dam sûng chu ki thei loi changna inhre viat no ning.

⁷ Ki râlhai chu mi sual nihai khom sian, A ni doitu chu mi sual angin soisak nihai sian.

⁸ Pathian uksak loihai hrangin sabei hrang imo a la om? Pathianin a hnôla, a hringna a lâkpai pe’n chu.

⁹ Buaina’n a del laiin, Pathianin an khêkna mo irngai pehai ni?

¹⁰ Itinrêngthotheitu chunga mo lôm ni? Pathian chu itiklai khomin koi thei ni mo?

¹¹ Pathian irthiang lam nangni hril ki ti, Itinrêngthothei thu’nkung chu ite thup no ning.

¹² Irngai roi, Nangni’n annihai hi nin hmu thei ving, Ithoa mo a omzia boia nin la ichong mai?

ZOFARA

¹³ Pathianin mi sualhai dongtum a inkung chu,

¹⁴ Mi ihnôlhai dongtum chu Itinrêngthotheitu’n a nei. An nâi le te an pungin chu, An rîla rahaiin fâk khop hmu zoi no nihai.

¹⁵ A’rchi la dam sunhai khom hrîin thi an ti. An dôngmahaiin sûnhai thei no nihai.

¹⁶ Nêngpil nêka tam sumru buk khômin, silkai khom buk zuathai sian.

¹⁷ A ibuk khômhai chu mi dikhaiin irbel an ti. A tangka sum khom mi ite ti loihaiin irsempai an ti.

¹⁸ A in sin khom româi tebop anga irbômin sin khom sian, A hrungtu’n irpuk a isin mamai ang hi a ni.

¹⁹ Irchong takin a oma, a in kârin a sum hek pe zoi a ta, A hong harin chu ite nei ta no ni.

²⁰ Tuilianin a ide zut angin, Zâna phâivopui tho’n sêm inzuan a ti.

²¹ Sim phâivua’n sêm inthek a ta, om thei ta no ni.

²² Khonzâna boiin sêm inzuan a ta, A sintho theina kôla khan sêm insiat zoi a ti.

²³ Mihaiin an kut inbên khum an ta, vîkphiarin a omna rengata irzûlpai an ti.