JOBA 22 - PATHIAN LEKHABU IRTHIANG C.L. Bible (BSI)

Voithum Chongna ELIFAZA

¹ Khanchu Temana mi Elifaza’n hiang hin a sâma.

² Mihriam hin Pathian ta hrangin a inangna mo a oma? mi vârhaiin chu an inlâppui ngai?

³ Mi fel ni ni’n chu Itinrêngthotheitu hrangin a hlu mo ni ma? Ni lampui hro irkiptirna hin imo an lâpna om?

⁴ Ama ni chi sika nang a irchu mo, A roirêlna nang lûtpui a ti.

⁵ Ni sual hrai tâk sik uala mo ni ma? Ni dik loina hi mong nî zel a nei no sika a ni.

⁶ Ite ual ni loia hin ni urênghai changpuina nin phûthaia, A sil le kaihai sutpaiin korongin ni siahaia.

⁷ A’rzalhai in hrang tui pehai mak chea, Phîngchâmhai hrangin bu nin hnara.

⁸ Nakhrâtsongin mi ram ni sutpaihaia, Ni inuamtak ni pêkhaia.

⁹ Meithâihai kut korongin ni tîrhaia, Farahai ni hnuaisiahaia.

¹⁰ Khasikin kêng chângin nang a irhual, Siatna irkhêltak le chiomna’n nang a irhual a ni.

¹¹ Khua a hon thima, hmu thei loiin, Tuilianin a ni inhlî tâk a ni.

¹² Pathian chu vân sânga khin a iom loi ma ni? Ârsihai irsâng dân khi en ro, Pathianin imo an hriat? Inthim irsa dân hi a rêl thei zit.

¹³ Imo Pathianin a zuang inhriat ual hrang? Sûmin a zuar hlia, itin mo a ni irêl thei hrang?

¹⁴ “A hmu thei loina hrangin sûm irsakhakin ar khûa, Vânlaizôla, an lênga,” ni tia.

¹⁵ Mi sualhaiin an ihro ngai lampui chu, Ni ihro hrang ma ni?

¹⁶ A zoro ni loia sonpaiin a oma, An irnghatna khom tuilianin a tânpai ta.

¹⁷ Pathian kuanga khan, “Ni masan ro, Itinrêngthotheiin imo a ni ilo hrang?” tituhai chu.

¹⁸ Kha ten khom khan an inhai thil sa’n an bit pehaia, khasikin mi sualhai irfûktir chu ki inhriat thiam loi a ni.

¹⁹ Mi dikhaiin chu an hmu’n an lôma, Mi ite ti loihaiin chu an innuisana;

²⁰ kin râlhai chu inhnê an ni tâka, Meiin an irchongnahai a kâng zoi ta, tiin.

²¹ Nangma ngêtin ama tûngin lân, irngeina siam ro, khanchu ni ta hrangin sin sa hong suak a ti.

²² A chong suakhai chu pomin lân, Ni lungrîla vong insa mai roh.

²³ Itinrêngthothei kuanga ni kîr theiin chu, ngîr suak ni nôk ni ta, Ni puan in ata ni fel loina ni khâipai thei photin chu.

²⁴ Ni’rchon chu nêngpil anga bêin, Ofir rângachakhai khom, Tuidunga lung mamai angin ni bê’n chu,

²⁵ Itinrêngthothei chu nir chon ni a ta, Tangkarua hlu takhai chu ni ta ni a ti.

²⁶ Khanchu, Itinrêngthotheitu khan lômna nei ni ta, Pathian tiang irbei ta ni ti.

²⁷ A kuang chongchai ni ta, Ama’n nang irngai pe a ti, Khanchu ni thu’nkunghai lôm takin sua ni ti.

²⁸ Ni thil irfûktirhai hlochuk a ta, Ni lampui khom vâr mai a ti.

²⁹ Nang paihai khom sian, ngîrsuakna a om ti ni ti. Mi irngaiintômhai chu saninzôk ni an ti.

³⁰ Mi ite ti loihai chu sansuak a ta, A ni, ni kut a’rthiangin chu, Nang khom nang sansuak sa a ti.