JOBA 21 - PATHIAN LEKHABU IRTHIANG C.L. Bible (BSI)

JOBA

¹ Khanchu Joba’n hiang hin a sâma.

² “Ki thu hi ngûk takin irngai unglân, hi hi nin irtharngamna chu ni ri se.

³ Ni le’rngai pe unglân, hong hril ki ti, ki hril zoi le nin nuam le ni lan nuisan ta roi.

⁴ Mihriamhai laia ki ichiar mo nin ni isôn? Itho mo tuang thei loiin om ki ta?

⁵ Ni en unglân, ar khêl ti unglân, nin kutin nin hmûr chu hîp roi.

⁶ Ki chunga thil tung hi ki’rngaitua’n chu ki milung a zînga, chitna’n a ni sip ngai.

⁷ Itho sika mo pualoihai hi an ihring mai ngai, tar kûna damin thuneina an inei ngai?

⁸ An nâi le tûhai hlochuk takin an dampuihaia.

⁹ An in le loihai khom chiom tamtak ata an zôkpuihai ngaia, Pathian tôkhmol khom an chunga insum ual no ni.

¹⁰ An sehrâtchalhai chi kha a saa, An sehrâtpuihai kha tê an neia, siat ngai mah.

¹¹ An nâihai chu belra rual angin an tîrsuaka, râifân takin an lêng ngai.

¹² Têngrep le perkhuang sukin hla an saka, an theihlehai irhâi leh râifân takin an lâma.

¹³ An dam sûng chu hoitakin an oma, Irtha’rngam takin Seol-ah khan an fe irhmang tâka.

¹⁴ Pathian kuanga, ‘Ni rotsan ro! ni lampui hro irzuk ma ung.

¹⁵ Itinrêngthothei chu imo a ini, a sin kin itho pena hrang chu; a kuang kin chongchaiin imo inlâpna kin la ihmu hrang?’ an tia.

¹⁶ En u ta, an sum le puan chu an kuta om ni maka, Mi sualhai ngaituana lampui chu pom thei ma ung.

¹⁷ Mi sual meiser chu a thi kochoka, vânduaina a tung pehai mai ngaia, Pathian ningmurna hin siatna a intungtir mo ni ma?

¹⁸ Fapôl phâivua isêm invuang ang a nia, phâivuapuiin bu’rsi a isêm invuang ang hi a ni.

¹⁹ ‘Pathianin an nâihai ta hrangin siatna a bukkhôm,’ nin tia. An inhriat theina hrangin an chunga khan intungtir ni ri se.

²⁰ A mit ngêtin a chunga siatna hong tung chu hmu sianlân, Itinrêngthothei ningmurna chu tuang ri se.

²¹ A dam lai sûn a hek tena chu, a imâksan a in mihai a la inhriat mai ngai mo nin isôn?

²² Chung tianga irvâna thil omhai chunga roirêltu Pathian chu tu mo ar chutir thei?

²³ Mi senkhat chu raifân tak le hoitakin an oma.

²⁴ An tak a hong saa, an mar tâka, an ru sûnga irtin a hong bita.

²⁵ Khan, senkhathai chu thil sa irtem loiin, intak takin an oma, an thia. Ite satna irtem viat loiin.

²⁶ Nêngpila an zâla, irlungin an bômhai ngai.

²⁷ Irngai ro, ni irngaituanahai kin hriat, Dik loitakin nin ni manêp ti khom kin hriat.

²⁸ Kho tiang mo mi roiinpui in chu a om ta? Mi sualhai omna puan in khom khôn mo a om ta?” nin tia.

²⁹ Khual inzinhai nin irdonhai ngai mo ni ma? An ihrilhai kha zôm mak chêi mo?

³⁰ Mi sual chu vânduai nia hrangin a khêka ningmur nia hruaisuak a ni, ti thu hi.

³¹ Tu mo a hmâi makunga sualna phorsuak hrang. A thil lei tho chu tu mo thuan thei ngam hrang?

³² Thâna fepui ni a ta, a thân chu takirtâi takin hrung an ta,

³³ irhôra pil satak leh irkhu an ta, a matona mi tamtak an lei ife tâkhai angin mi tamtakin a hnung zui an ta.

³⁴ Itin ual takin mo nangma’n minlak thopumin lungngam ni irsak thei hrang? Nin ihril chu ite bê luan bê no ni.