JOBA 20 - PATHIAN LEKHABU IRTHIANG C.L. Bible (BSI)

ZOFARA

¹ Khanchu, Naama mi Zofara’n hiang hin a sâma.

² “Ngûktaka irngaitua’n nang a san ki’rzuka, itika mo nang san ta ning ti ki nghâkhmoa.

³ Ni ni halirchu dân hin a nin zaktira, Kin hriatthiamna lungrîl khan a ni isâm a ni.

⁴ Irnênga mihriam om phut ata atûn ten hin ama thu hi inhre ngai mak che mo?

⁵ mi sual râifân chu sôt ngai maka, Pathian inhre loi mi lômna chu mit khapkâr vai hrang ang a ni.

⁶ A irngaiirsângna khan irvân phâk khomsian, A lu khomin sûm hong phâk khom sianlân.

⁷ Ama mizun le êk angin kumkhua’n irhmang a ti. Ama hmu ngaihaiin chu, “Kho tiang mo a iom tâk?” ti an tih.

⁸ Irmang angin hek a ta, hmu thei ta no nihai, zân inlârna angin boi nôk zel a ti.

⁹ Mita hmuhai ngai khom khan hmu thei ta no nihai, a omna ngai hmuna khan hmu ta no nihai,

¹⁰ A nâihaiin mi inrianghai ditsakna zong an ta, A kutin a sum le puanhai pe khîrhai nôk a ti.

¹¹ A takpum kha vânglai hrâtna’n a sipa, Khannisianlân, ama chu inrang takin irnêng pil la chang a ti.

¹² Sualna hi a bâia thumin a milei hnuaia irthup khom sian.

¹³ Inlem loiin hmuam chian khom sian,

¹⁴ A thil fâkin a phîngpui sûnga hong khâ a ta, a phîng sûnga mirûl tûr a chang pe ta.

¹⁵ Mi pualoiin irchon a inrûkhai kha an luak suakpaia, Pathianin a phîng sûnga khom lapai pe a ti.

¹⁶ Mi pualoiin a invol murdi chu tûr ang a nia, Rûlsok inchuk angin tûrin ama chu that a ti.

¹⁷ Vadunga tui luang chu hmu ta no ni, khuaitui le dûttui luangna chu.

¹⁸ A sinsôl rahai chu fa thei loiin om a ta, ar chon neihai chunga khom hoiinpârin om no ni.

¹⁹ inrianghai kha opbe’n a’rheisanhaia, mi in sin sai kha ar chûpuihaia.

²⁰ A huatirhamna kha omchian thei maka, a lômna tak thil chu hmu ual no ni.

²¹ Fâk loi zel hi ite nei ta maka, Khannisian, a sum le puan khomin daih ta mah.

²² A’rchongna a’rsâng lai takin, a dinghmun siat pe a ta, vânduainain a chunga chum a ti.

²³ Fâk nêkin mar zap khom sian Pathian ningmurna irkhêltak a chunga tung a ti. A phîng sûnga bit khakin om pe a ti.

²⁴ Thîr ufei chiin intân khomsian, Dâr thalin kâp irhlet a ti.

²⁵ Ufei kha a pum ata kaisuak a nia, ufei hmora khan a thisen a kopa, a lungrîl chu chitna’n a sipa.

²⁶ Inthim irkhêltak tong a ta, a’rchonhai chu mihriam isêm ni loi meiin kâng a ta; a puan ina la om sunhai khom kâng irhmang zit a ti.

²⁷ Irvânhaiin a sualna chu inlangtir an ta, irnêng khomin theiloi inchangtir an ti.

²⁸ Tuilianin a in tânpai pe a ta, Pathian ningmur ni tena a inei murdi hekpai pe ving a ti.

²⁹ Hi hi Pathian ata mi sualhai dongtum chu a nia, Pathianin an irchon lua hranga a inkung pehai chu,” tiin.