JOBA 19 - PATHIAN LEKHABU IRTHIANG C.L. Bible (BSI)

JOBA

¹ Joba’n hiang hin a sâma;

² Idôr ten mo ningmurin ni ni ichongpui hranga, deng ni ni intheitir hrang?

³ Voisôm ni ni hal tâka, saloi taka ki chunga ni itho hi inzak viat mak chea.

⁴ Ki lei idik loi a ni’n chu, ki sual man chu chôi ki ti.

⁵ Keima nêka sa ual nin irtia, ki sual sika mualphoi irlâk nin nih ti maiin chu.

⁶ Inhre ta roi, Pathianin a ni hnôla, a lên leh a nir khu tâk hi.

⁷ “A ni soisaka” tia ki khêk khomin tûte’n ni sâm mahai, ki khêk inring khomin a ni sâm thei tûte om mahai.

⁸ Ki lampui ar bôn tâk sikin fe thei ta ma ung, ki lampuihai chu inthimin a irkhu a ni.

⁹ Ki roiinpuina ar khu zoi ta, ki lua rênglukhum chu a ni lâkpai pea.

¹⁰ Kil tina a nin siat zoia, ite ni ta ma ung, ki sabeina irzung chu a phôipaia, chuai hrang le thi hrangin a ni mâksan rak ta.

¹¹ Ki chunga a ningmurna a chuma, a râlhai laia tep ki ni ta.

¹² A sipai rualhai an honga, keima tiang lampui an hong siama, ki puan in kôla irpuk an khuara.

¹³ Ki urênghai chu keima ata hlataka a siaa, ki hmêlhriathai ta hrang khomin mikhual ki lei ni ta.

¹⁴ ki sûngsuakhaiin an ni rotsana, ki rual sahaiin an ni’rnghil ta.

¹⁵ Ki mikhualhai le ki siahlo dôngmatehaiin, mikhual angin an ni ena, an hmêl inhriat loi ram dang mi enin an ni en ta,

¹⁶ ki siahlo chu ki koia, ni sâm maka, Ama chu chong hoitak hmanga ngên a nang ta.

¹⁷ Ki dôngma’n ki bâi mirim an nam a tia, ki irzirpuihaiin an nin tir zoi ta.

¹⁸ Nâipangtehai khomin an ni êsêla, ki hor thoi leh, ki chunga an ni hrilsiata.

¹⁹ Ki rual sa murdihaiin an nin tira, ki rual lungthunghaiin an ni rotsan ta.

²⁰ Ru le vun ituam vai hi ki ni ta, ki hâ mani vai kêng ki izôkpui tâk.

²¹ Lung nin kham roi, ki rualhai lung nin kham roi, Pathian kutin a ni itôn a ni ta hi te.

²² Pathian angin te, nangni khomin deng nin nin theitira? Ki tuangnahai hi a ruk mo ni la tipui mak chêi?

²³ O, ki thurchihai hi irziak ni thei sianlân, Lekhabua chuang thei ni sianlân chu o!

²⁴ Irziakna thîr le irziakin, kumkhuaa hranga irziak ni thei sianlân chu o!

²⁵ A ni’rtantu chu a hring a nih ti kin hriat, nakana chu nêngpila hin la ngîr a ti.

²⁶ Ki vunhai hi a siat zoi le, ki taksa hin Pathian la hmu ki ti.

²⁷ Keima hrang ngeiin la hmu ki ta, ki kut hin la thîr a ta, mi dang ni loiin, ki sûng lungrîl a’rzal ta.

²⁸ “Itin mo ama kha deng ei intheitir hrang, Amaa khan thil bul hmusuak chakin,” nin ti’n chu.

²⁹ Khandai chu chi unglân, khandaia tuangna hi Pathian ningmur inlangna a ni, khanchu, roirêltu a om ti inhria nin ti.