JOBA 14 - PATHIAN LEKHABU IRTHIANG C.L. Bible (BSI)

¹ Nupang inei mihriam hi, zoro sôtnote sûng dama, buainaa sip a ni.

² Pâr anga hong pâr suaka, a ichuai nôk ang hin a ni. Irhlîm angin an langa, om mai thei ni mah.

³ Ama anga mi chunga khan ni mit ni menga, Roirêlnaa ni kuang ama kha ni ihruai hrang mo?

⁴ Tu mo irthiang loi ata irthiang la suak ngai? Tukhomin la thei no nihai.

⁵ A nikhuahai chu inkung sai a nia, a tha hrang dôr chu ni kuang a oma, A khêk thei loi hranga ramri kha nin kung hnungin,

⁶ Irheisanin lân a’rngam theina hrangin, Irhlo fâk anga a nikhua an thikpai dênin.

⁷ Thingkunghaiin chu sabei hrang an la nei, phûrhai khomsian, a hon cher nôk ngaia, irzîk thar a hong isuak mai ngai a ni.

⁸ A’rzung tar hong ta khomsian, a kung hnuaihai chu irnêng irchim tena bûiin lei thi ta khomsian;

⁹ A la thi zoi no sikin a hon cher nôk thei, thing ei iphun angin hon chôm a ti.

¹⁰ Khannisian mihriam chu thi an ta, phûm an ti. A phûksân a’rngama, khôna om mo a ini tâk?

¹¹ Tuihai chu tuipuia a hong irhmanga, Ivadung chu a hong kanga, A hong ichâr rol rol angin;

¹² khaang khan mihriam chu a zâla, thoi ta loiin, irvân a hek mâka chu har ta no ni, A zâl chu kaithoi ni ta no ni.

¹³ O, Seol-ah khan ni thup thei tan lân ki tia; Ni ningmur a hek mâka chu ni thupin lân, khannisianlân zoro inkung bîk ni siam pe’n lân, ni nin hriat maina hrangin.

¹⁴ Mi a thi hin a ihring nôk hrang ma ni? Keima’n chu zoro sa ual la nghâk ki ti, Ki buaina hi a hek mâka chu nghâk mai ki ti.

¹⁵ Ni koiin lân, nang sâm ki ti, Ni kut sinthohai chu ni’rngaiirsâng ngai a ni.

¹⁶ Khanchu ki fena tina ni en chak ta ni ta, ki sualnahai chu sui nuam ta no chi ni.

¹⁷ Ki inchâinahai nangin ngaidamin, khâipai ni ta; Nangin ki sualna murdihai chu hmu’nfâi zit ni ti.

¹⁸ Tânghai chu chimin irnôisiat chit a nia, Lungpui khom a hmun ata irson a nia;

¹⁹ Tuipuiin lungtehai a tâna, tuilianin, irnêng an siat theia, khaang khan mihriamhai sabeina nin siat thei.

²⁰ Ama chu kumtuangin nin hnêa, a boi tâka. A hmêl chu nin danglama ni tîrpai ta.

²¹ A nâihai chôiindôm an ni khomin inhre mak chea. Siatna an tok khomin irngaisak ual mak che.

²² Ama taksa natna vai kha an hriata, A lungrîl chu a sûnga khan an hrûma.