JOBA 13 - PATHIAN LEKHABU IRTHIANG C.L. Bible (BSI)

¹ Irngai ta hihai murdi hi ki mitin a hmu, ki mikuarin an hriata, a’rngaina lam khom ki thei ta,

² Nin inhriat ang kin hriat theia, nangni nêkin irhnuai ual ma ung.

³ Khannisian El-sadai kôla Itinrêngthothei khan thu hril ki nuama, Pathian le hmunkhata ki chungchang hi hril ki irzuk a ni.

⁴ Nangnihai hi minlak tho ngai nin nia, hril insa ngai indamtir theiloi daktor ang hi nin ni.

⁵ Dâihrek unglân chu! nin hrangin vâr ualna chang nin ti.

⁶ Ki ingaituana hi inhre unglân, ki bâiin nangni a izongna hi irngaitua roi.

⁷ Pathian ta hranga fel loi taka thuhrilin, Ama ta hrangin hmusitin nin ichong hrang mo?

⁸ Ama sanin theibîk nin inei hrang ma ni? Pathian roirêl hin nin irêl hrang mo?

⁹ Nangni hmu’nfel sianlân, a sa mo nangni ti thei ni? Nangni’n mi nin ihuang ang hin, Pathian hi huang nin itum mo?

¹⁰ Inrûka theibîk nin neiin chu nangni halirchu a ti.

¹¹ A roiinpuina hin nangni a inchitir loi hrang mo? A irchi omna chu nin chunga a itâk loi hrang ma ni?

¹² Nin ulianhai Thuvârhai lak meirivâm ang dôr a nia, nin irsêlnahai khom hi pilbêl anga om a ni.

¹³ Dâihrek unglân, chongna zoro ni pe roi. ki chunga tung hrang hi chu, tung zel ri se.

¹⁴ Ki taksa hi ki ha’n sê ki ta, ki hringna hi ki kuta ki isia hrang mo?

¹⁵ Ama khan ni thatpai khomsian, Ama chu la sabei ki ta, A makunga ki thiamna thu ki la hril hrang sikin.

¹⁶ Hi hi ki saninhringna ni a ta, Pathian ngaisak no mi chu a makunga hin hong om no nihaia.

¹⁷ Ki thuhai hi a dik takin irngaitua unglân, ki thuhril hi nin mikuara lût ri se.

¹⁸ Irngai roi ki dikna thuhril hrangin ki irzoi diam a ni. Thiamchang ngêt ki tih ki’rsabei.

¹⁹ Tu mo ki sualna ni phorsuak thei hrang? Khaanga hrang ni sian, dâihrekin om ki ta, thi ki ti.

²⁰ Thil inhni vai ni tho pe’n lân, Ni hmêl vâr hnuaia ki hmâi thup no ning.

²¹ Ki chunga ni kuttum thâk hi mong tan lân, ichiomnahai hi nin omtir pe ta no ro.

²² Khanchu, ni koiin lân, khanchu nang sâm ki ti. A ni no’n chu keima changin lân, nangma’n ni sâm roh.

²³ Ki dik loina le ki sualnahai idôra tam mo a ini hrang? ki sin insiatna le ki sualnahai nin hriattir roh.

²⁴ Ithoa mo ni ni imâksana, râl anga ni ni insâp hi?

²⁵ Phâivua’n sûlhna a isêm irlêng hi deng ni inthei hrang mo? Fapôl châr hi ni irzûl mai hrang mo?

²⁶ Ki chungchâng saloi takin ni’rziaka, ki thoibopa ki sualna man ni nin pêltira.

²⁷ Ki kehai thîrkol ni nin buntira. ki lampui tinrêng ni en irchika, ki kezaphahaia khom irsinsiana ni siam zita.

²⁸ Kei chu thing hmon anga irhmang hrang le, silkai, leida ifâk anga ki om lai hin.