JEREMIA 5 - PATHIAN LEKHABU IRTHIANG C.L. Bible (BSI)

Jerusalem sualna

¹ Jerusalem mihai, in kongkâr tina intân unglân, Thîr unglân, nin bingin en roi! Bazârhaia zong unglân, thil diktak thoa, Pathian ta hranga iamom tum inkhat lua nin hmu thei ngân mo? Nin hmu theia ni’n chu, Rengpa’n Jerusalem hi lan zôk a ti.

² Rengpa chubai mûkin irbê ngai khom unglân, Nin iti kai kha a nia, nin itum tatak chu ni mah.

³ A dik takin Rengpa’n iamomna hi a izong a ni. Nangni a vîka, khannisian ite bêin bê mak chêia. Tukullian nin nia, nin sual ata irlet nuam mak chêi.

⁴ Khanchu keima’n, “Hi mihai hi inmôl le inriang an nia, Into changin sin an thoa; an pathianin a iphâkhai, Rengpa’n imo an itho hranga a inuam ti an inhriat loi a ni.

⁵ Mi lianhai kuang fe ki ta, anni chu va chongpuihai ki ti. An Pathianin a innang chu imo a ini. Rengpa’n imo an itho hranga a inuam chu inhre ngêt a ti,” tiin ki ngaituaa. Khannisian an rêngin Rengpa thuneina an hnôla, a thupêk zôm hrangin an inuam loi a ni.

⁶ Khasika khan kêng rampui kâra kâmkeibakneiin thathai a ta, ramchâra irthoka inêhaiin sânphorhai neng an ti. Keiârsihai khom an kho sûnga lût an ta, Tual an suaka niin chu, sânphor ni an ti. An sualhai a tam hrai sikin, zoro tina Pathian hnung an songsan ngai sikin.

⁷ Rengpa’n irdoina a siama, “I lo hrangin mo ki mihai sualna kin inzâhai hrang? Anni mâk raka pathian dang dik loihai chubai an mûk tâk sikin, ki mihai chu an khop mâka kin fâhaia, Khannisian an uire zoi tâka. Notizuarin an zoro an hmang inhek ta.

⁸ Sakorchal infâ inkhop hrai irzukna sip angin, Mâni in kôla mi dôngmahai an irzuk ngai.

⁹ Hi thilhai sika hin anni chu dûk ki ithohai loi hrang mo? Hianga namhai chunga hin phuba ki ilâkhai hrang mo?

¹⁰ Ki mihai grep irhuan sât infâi hrangin ki râlhai tîr ki ta, insiat hrang chu ni loiin. A ônhai sâtpai hrangin hrilhai ki ti. Kha a ônhai kha ki ta an ni no sikin.

¹¹ Israel le Juda mihai khan an ni idoi a ni,” Keima Rengpa hin ki itih a ni ta.

Rengpa’n Israelhai a hnôl

¹² Rengpa mihaiin an ni hnôla, “Ite tho tatak no ni, intak zoro khom tong ual no ia; irdoi mo, châm mo khom tong ual no ih,” an tia.

^13-14 Deipuhai khom Rengpa kuanga irthokin chongbe nei loi, thurchi hlutna boi kêlsua ngai an ni, an tia. Rengpa Pathian itinrêng thothei khan ki kuang, “Jeremia, hi mihai hin hiang hin an ti sikin, nin bâia khan ki thuhai hi mei angin siam ki ti, mipuihai chu thingkung angin om an ta, mei khan kânghai a ti,” a tia.

¹⁵ Israel mihaio, nangni doi hrangin ram hlatak ata irthokin Rengpa’n, nam a hong ihruaihai hrang a ni. Tianlai ata nam inthang bîk a hrât, an chong nin inhriat ngai loi chu.

¹⁶ An thal kâp thei mihai chu mi hrât le khonzâna nei loia mi that ngai an ni.

¹⁷ Nin chîmuhai le nin buhai fâkin ne ving an ti, nin nâipasalhai le nupanghai that an ti. Nin kêlbelra le sehrâthai khom thathai an ta, nin grep kung le theipui kunghai insiat zoi an ti. Nin irnghatna kul nei khopuihai chu an sipaihaiin insiat an ti.

¹⁸ Rengpa’n a ti, “Kha nikhuahai khan ki mihai irhmangtirhai no ning,

¹⁹ Jeremia, i lo hranga hihai hi ki itho mo a inih tiin nang an irdonin chu, hnung an ni songsana, ram dang pathianhai an ram sûng ngêta an itho ang khan an ram ni loia khan ram dang mihai sin an itho hrang a ni,” tiin anni chu hrilhai roh.

Pathianin a mihai a ngona

²⁰ Rengpa’n a ti, “Jakoba irchihai chu hrilhai unglân, Juda mipuihai chu hrilhai roi.

²¹ Nangni mi’ntohai le inhriatthiamna nei loihai, hi hi irngai roi, mit neia hmu thei loi, mikuar nei chaka inhre thei loihai.

²² Keima hi Rengpa chu ki ni, itho mo nin ni ichi loi? Ki makunga hin nin inthing loi hrang mo? Tuipui idîl phâk ten indangna hrangin chiaiphoi ki siama, a ikhêl thei loi hrang ramri det chu. Tuipui irsok khomsian, khêl thei no nia, tuiirsok khomin pha thei no ni.

²³ Khannisian nangni’n mipuihai chu! tukullian le tehelzongin nin kal nin pêtin nin ni imâk a ni.

²⁴ Ni chôiirsâng hrangin ngaitua ngai mak chêia, rua masa le rua hnungkhônhai nangni ki pêka, a kum tin chîmu tharhai nangni ki pêk ngai khomin.

²⁵ Khasikin nin sual sinthôna sikin hi thilhai hi a boi zoia, nin sualna sikin thil sa nin idok a ni ta.

²⁶ Ki mihai laia mi sual an om; vatehai chel hranga lên pharhai angin ki mihai irdîpin an enhai ngai, an chângkama khit theina hrangin.

²⁷ Sekâr thotuhaiin kok sûnga vatehai an ithun insip angin, an inhai chu inru thilin an insip a ni. Khasika khan kêng sin tho thei le irchong an nia,

²⁸ an marin an isa a ni ta. Thil saloi an itho khan a ruk tah ti nei loiin, farahai dongtum pehai loiin, mi sirdea omhai khom irhruaina dik hmu mahai.

²⁹ Khaangin hi thilhai sika hin anni chu intuangtirhai ki ta, hi nam chunga hin phuba ki ilâk hrang a ni.

³⁰ Hi rama hin thilirkhêl le pangza omhai a tung tâka:

³¹ deipuhai khan thu milak bana chu hril suak mahaia; ochaihai chu deipuhai thupêkin roi an rêla, ki mipuihai khomin an lôm lamtak a ni. Nikhua a hek tika chu itin mo an itho hrang tâk?” a tia.